اسەتتىڭ مۇراجايى اقىننىڭ تويىنا ءازىر
ابايدىڭ مەملەكەتتىك تاريحي- مادەني جانە ادەبي-مەموريالدىق «جيدەباي- ءبورىلى» قورىق- مۇراجايىنىڭ ءبىر ءبولىمى بولىپ سانالاتىن مۇراجاي، اقىننىڭ 125 جىلدىق مەرەيتويى قارساڭىندا ۇيىمداستىرىلىپ، ءدۇلدۇل اقىن، اسقاق ءانشى اسەت نايمانباي ۇلىنىڭ ءومىرى مەن شىعارماشىلىعىن ناسيحاتتاپ كەلەدى.
بيىل اقىننىڭ 150 جىلدىق مەرەيتويى قارساڭىندا مۇراجايدا جۇرگىزىلگەن رەەكسپوزيتسيالىق جۇمىستار ناتيجەسىندە زالدار كەڭەيتىلىپ، ەكسپوزيتسيانىڭ بۇرىنعى ءبىر زالى ەندى ءۇش زالعا قاناتىن جايدى.
مۇراجايدىڭ ءبىرىنشى زالى اسەت اقىننىڭ ومىرىنەن دەرەكتەر، شىعارماشىلىعىنىڭ باستاۋىن كورسەتسە، ەكىنشى زال اقىننىڭ قىتايداعى ومىرىنەن سىر شەرتەدى. ال ءۇشىنشى زال ارداقتى تۇلعانىڭ اسىل مۇراسىمەن تولىق تانىستىرادى. سوڭعى جىلدارى عىلىمي- زەرتتەۋ جۇمىستارىنىڭ ارقاسىندا مۇراجاي قورىنا تۇسكەن ماتەريالدار كورەرمەندەر نازارىنا تۇڭعىش ۇسىنىلىپ وتىر.
ناقتى ايتساق، اسەت اقىننىڭ ورتاسى، ومىرىنە قاتىستى ادامدار تۋرالى ماتەريالدار سوعان جاتادى. اسەت ولەڭ ارناعان جاسبولات بولىس پەن تاڭعىت ەڭسە قاجى ۇلى تۋرالى، دامدەس بولعان دامەجان باتىر جانە دوسى عافاري قاجى سياقتى ادامدارعا قاتىستى دەرەكتەر ەكسپوزيتسيادان ورىن الدى.
سونىمەن بىرگە 1909 -جىلى مامانيا مەدرەسەسى اشىلعاندا اقىن جازعان حاتتىڭ كوشىرمەسى، شىعارمالارىنىڭ كەيىنگى جىلدارى قورعا تۇسكەن قولجازبالارى، اقىن مۇراسىن جەتكىزگەن قاريالار جانە اسەتتانۋ تۋرالى ماتەريالدار مۇراجاي ەكسپوزيتسياسىندا جان-جاقتى كورسەتىلىپ وتىر.
اباي قورىق- مۋزەيىنىڭ عىلىمي قىزمەتكەرلەرى اسەت مۇراجايىنىڭ كۇردەلى جوندەۋ جانە قايتا جابدىقتاۋ جۇمىستارىن ويداعىداي جۇرگىزىپ، اقىن مەرەيتويى قارسىڭىندا اياقتاپ، اسەتتەي اقيىق اقىننىڭ مۇراسىمەن تانىسامىن دەگەن كورەرمەندەردى قابىلداۋعا دايىن.
