باۋىرجان بايبەك ب ۇ ۇ وكىلىنە الماتى مۇگەدەكتەرى جايىن بايان ەتتى
كەزدەسۋ بارىسىندا تاراپتار مۇگەدەكتەر پروفيلاكتيكاسى، قالا ومىرىندە ولاردى الەۋمەتتىك قورعاۋ، بارلىق مۇمكىندىكتەردى جاساۋ، قولداۋ جانە باسقا دا ماڭىزدى ماسەلەلەردى تالقىلادى، دەپ حابارلايدى قالالىق اكىمدىكتىڭ باسپا ءسوز قىزمەتى.
مەگاپوليس اكىمى الماتىدا قۇرامىنا ازاماتتىق قوعام وكىلدەرى ەنگەن مۇمكىندىكتەرى شەكتەۋلى جانداردى الەۋمەتتىك جاعىنان قورعاۋ جونىندەگى ۇيلەستىرۋ كەڭەسىنىڭ جۇمىس جاسايتىندىعىن ايتتى. ۇەۇ- نىڭ ارالاسۋىمەن مۇمكىندىگى شەكتەۋلى جاندارعا ستاتسيوناردا، جارتىلاي ستاتسيوناردا جانە ۇيلەرىندە ارنايى الەۋمەتتىك قىزمەتتەر كورسەتىلەدى. قالادا مۇنداي جاندارعا ينكليۋزيۆتى ءبىلىم بەرۋگە ەرەكشە نازار اۋدارىلعان، ولار كاسىبي جاعىنان قورعالعان، ءتۇرلى نىساندارعا بارۋلارىنا، كولىككە مىنۋلەرىنە جاعدايلار جاسالعان، سونىمەن قاتار الەۋمەتتىك، سپورتتىق، مادەني شارالارمەن قامتىلعان.
باۋىرجان بايبەك بۇگىنگى كۇنى قالادا مۇمكىندىگى شەكتەۋلى 43 مىڭنان استام ازاماتتىڭ تۇراتىنىن ايتتى. بيىل ولاردى تەحنيكالىق قوسىمشا كومەك قۇرالدارىمەن قامتۋ ءۇشىن بيۋدجەتتەن 4 ملرد. تەڭگەدەن استام قارجى بولىنگەن، بۇل بىلتىرعى جىلمەن سالىستىرعاندا ەكى ەسە كوپ. مۇگەدەكتەر ءۇشىن ساپالى جابدىقتار الىنۋدا، جاياۋ جۇرگىنشى جولدارى قايتا جاسالۋدا.
«ەگەر قالادا مۇمكىندىگى شەكتەۋلى جاندارعا ءجۇرۋ قولايلى بولسا، وندا بارلىعىنا دا جايلى. الايدا، ەڭ باستىسى - رۋحاني بىرلىك، مەملەكەت تاراپىنان عانا ەمەس، بۇقارادان تىكەلەي قولداۋ تاپقان مۇنداي جاندار قاشان دا سەرگەك بولادى»، - دەدى ب. بايبەك.
ءوز كەزەگىندە كاتالينا ديەۆانداس اگيلار قازاقستان رەسپۋبليكاسىندا تەك ساياسي ەركىندىكتىڭ عانا ەمەس، سونىمەن قاتار مۇمكىندىگى شەكتەۋلى جانداردىڭ تۇرمىسىن جاقسارتۋ شارالارىنىڭ دا سالتانات قۇرعانىن اتاپ ءوتتى.
«ەل زاڭناماسى حالىقارالىق ستاندارتتارعا ساي جاسالعان، مۇگەدەكتەرمەن جۇمىس ىستەۋدە شەتەلدىڭ يننوۆاتسيالىق الەۋمەتتىك تاجىريبەسى قولدانىلۋدا، ال بۇل ولارعا قاتىستى كەشەندى شارالاردىڭ جۇزەگە اسىپ جاتقانىن كورسەتەدى» ، - دەپ اتاپ ءوتتى ب ۇ ۇ- نىڭ ارنايى بايانداماشىسى.
ول الماتى قالاسى ءماسليحاتىندا مۇمكىندىگى شەكتەۋلى جانداردىڭ بولۋىن جوعارى باعالادى. كاتالينا ديەۆانداس اگيلاردىڭ پىكىرىنشە، بۇل جالپى قوعامدا مۇگەدەك جانداردىڭ الەۋمەتتىك تيىمدىلىگىن ارتتىرۋعا ەرەكشە ىقپال ەتەدى.
