قازاق سپورتشىلارى توعىزقۇمالاقتان الەم چەمپيوناتىندا توپ جاردى
ەسكە سالا كەتسەك، توعىزقۇمالاقتان IV الەم چەمپيوناتىنىڭ اشىلۋ سالتاناتى استانادا 3- قىركۇيەك كۇنى وتكەن بولاتىن. سايىسقا ا ق ش، اۋعانستان، ازەربايجان، گەرمانيا، گرۋزيا، كولۋمبيا، قازاقستان، قىرعىزستان، قىتاي، موڭعوليا، وزبەكستان، رەسەي، سيريا، تاجىكستان، تۇركيا، تۇرىكمەنستان، ءۇندىستان، ۇلى بريتانيا، چەحيا، شۆەيتساريا سىندى الەمنىڭ 25 ەلىنەن كەلگەن 70 تەن استام سپورتشى قاتىستى.
ولاردىڭ ىشىندە اۆستريا، كامەرۋن، پولشا جانە ۋكراينا سپورتشىلارى تۇڭعىش رەت الەمدىك ارەنادا توعىزقۇمالاقتان ءوز شەبەرلىكتەرىن كورسەتتى.
«توعىزقۇمالاق جارىستارى ءبىز ءۇشىن تەك مىقتىلاردى انىقتايتىن جارىس ەمەس، ۇلتتىق زياتكەرلىك ويىندارىمىزدى، ۇلتتىق قۇندىلىقتارىمىزدى الەمگە تانىتۋدىڭ ءبىر جولى دا. وسى ورايدا، بيىلعى الەم چەمپيوناتىنا ءتورت قۇرلىق وكىلدەرىنىڭ كەلىپ قاتىسۋى ءبىزدى قۋانتادى. قاتىسىپ قانا قويماي، شەتەلدىك باپكەرلەرمەن توعىزقۇمالاقتى قالاي دامىتامىز، قايتسەك بۇقارالىق سپورتقا اينالدىرامىز دەگەن تاقىرىپتاردى تالقىلاپ، ءبىرقاتار وڭ شەشىمدەر قابىلدادىق. شەتەلدىك جاناشىر دوستارىمىزدىڭ كومەگىمەن توعىزقۇمالاقتىڭ كەلەسى V الەم چەمپيوناتىن 2019-جىلى تۇركيادا، ەۋروپا چەمپيوناتىن - 2018-جىلى فرانسيادا، ازيا چەمپيوناتىن - 2018-جىلى موڭعوليادا وتكىزۋگە ۋاعدالاستىق»، - دەپ مالىمدەدى دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ ۇزدىك توعىزقۇمالاقشىلاردى ماراپاتتاۋ راسىمىندە.
قىزدار اراسىندا العاشقى ەكى ورىندى قازاقستاندىق قىمبات نوسەروۆا مەن ديانا كەنينا يەلەندى. جۇلدەلى ءۇشىنشى ورىندى قىرعىزستاندىق ادينا اسەيەۆا جەڭىپ الدى. ەرلەر اراسىنداعى الەمدىك توعىزقۇمالاق چەمپيوناتىندا قىرعىزستاندىق سپورتشىلار توپ جاردى.
ءبىرىنشى جانە ەكىنشى ورىن كۋبان يبراگيموۆ پەن اناربەك جاماكەيەۆكە بەرىلسە، ءۇشىنشى ورىن قازاقستاندىق سايلان ماتىلوۆتىڭ قانجىعاسىنا بايلاندى. راپيد بويىنشا قىزدار اراسىندا قازاقستاندىق لينا كاريموۆا، ەرلەر اراسىندا - قازاقستاندىق نۇربەك قابيەۆ ۇزدىك دەپ تانىلدى.
كلاسسيكا تۇرىنەن دە وتانداستارىمىزدىڭ باعى جاندى. قىزدار جانە ەرلەر اراسىنداعى العاشقى ورىندار قازاقستاندىق اسەل داليەۆا مەن حاكىمجان ەلەۋسىنوۆ توپ جاردى.
سونىمەن بىرگە، ماراپاتتاۋ كەشىندە توعىزقۇمالاقتان كوماندالدىق الەم چەمپيوناتىنىڭ جەڭىمپازدارى انىقتالدى. ناتيجەسىندە، قازاقستاننىڭ 1№ جانە 2№ كوماندالارى التىن جانە كۇمىس مەدالداردى يەلەنىپ، موڭعوليا سپورتشىلارى قولا جۇلدەنى مىسە تۇتتى.
ايتا كەتەيىك، توعىزقۇمالاقتان تۇڭعىش الەم چەمپيوناتى 2010-جىلى استانا قالاسىندا وتكىزىلىپ، 16 ەلدىڭ سپورتشىلارى قاتىسقان بولاتىن. 2012-جىلى چەحيانىڭ پاردۋبيتسە قالاسىندا وتكەن 2-الەم چەمپيوناتىنا 10 ەلدىڭ سپورتشىسى قاتىسسا، 3-الەم چەمپيوناتى 2015-جىلى الماتىدا وتكىزىلىپ، 23 ەلدىڭ سپورتشىلارى باق سىنادى. توعىزقۇمالاق لوندون (2006)، پاردۋبيتسە (2007)، كانن (2009) دۇنيەجۇزىلىك زياتكەرلىك فەستيۆالدەر مەن وليمپيادالاردىڭ باعدارلاماسىنا ەنگىزىلگەن.
ۇلتتىق ويىننان حالىقارالىق جارىستار انتيگۋا مەن باربۋدا، گەرمانيا، قازاقستان، قىرعىزستان، موڭعوليا، وزبەكستان، رەسەي، تۇركيا، ۇلى بريتانيا، چەحيا، شۆەيتساريا جانە وزگە دە مەملەكەتتەردە وتكىزىلدى.
2009-جىلدىڭ 15- قىركۇيەگىنەن باستاپ، توعىزقۇمالاق الەمدىك عالامتوردا www.iggamecenter.com سايتىندا زياتكەرلىك ويىن رەتىندە تىركەلىپ، ونلاين جۇيەدەگى ويىن باعدارلاماسى جاسالدى.
قازىرگى ۋاقىتتا قازاقتىڭ ۇلتتىق ويىنى سايتتاعى ويىندار رەيتينگىندە كوش باستاپ تۇر.
