17:17, 08 - قىركۇيەك 2017 | GMT +6
ايبەك نۇعىماروۆ «الەم بارىسى» فينالىنا شىقتى
استانا. قازاقپارات - استانادا ءوتىپ جاتقان «الەم بارىسى» دوداسىنىڭ جارتىلاي فينالىندا ايبەك نۇعىماروۆ موڭعوليالىق بالۋان سەرىك بەردىمۇراتتى ۇتتى، دەپ حابارلايدى «قازاقپارات» ح ا ا ءتىلشىسى.
تارتىستى كەزدەسۋدىڭ 4-مينۋتىنا دەيىن ءبىر بۇك ۇپايمەن جانە ءبىر جامباس ادىسپەن ايبەك قارسىلاسىنان باسىم تۇسكەن ەدى. بۇدان كەيىن سەرىك بەردىمۇرات بۇك ۇپايىن ەسەلەپ الدى.
بەلدەسۋدىڭ اياقتالۋىنا 4 سەكۋند قالعاندا سەرىك بارىن سالعانىمەن، جەڭىس ايبەكتىڭ ەنشىسىندە قالدى.
سەرىك بوز كىلەمدە تورەشىلەردىڭ بۇل شەشىمىمەن كەلىسپەيتىنىن ءبىلدىرىپ، نارازىلىعىن ءبىلدىردى.
الايدا تورەشىلەردىڭ شەشىمى وزگەرگەن جوق. ايتا كەتەيىك، قازاقستان بالۋاندارى اراسىندا ايبەك نۇعىماروۆپەن بىرگە جارتىلاي فينالعا ەرجان شىنكەيەۆ تە شىققان بولاتىن. شىنكەيەۆ گرۋزيالىق گۋرام تۋشاشۆيليدەن ۇتىلىپ قالدى. وسىلايشا، «الەم بارىسىنىڭ» فينالىندا ايبەك نۇعىماروۆ گرۋزين بالۋانىمەن كەزدەسەتىن بولدى.
اۆتور: ايان بەكەن ۇلى
