كەزدەيسوق تابىلعان ارحەولوگيالىق ولجالار مەملەكەت مەنشىگىنە ءوتۋى ءتيىس

استانا. قازاقپارات - ق ر ادىلەت مينيسترلىگىندە وتكەن زاڭ جوبالاۋ ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسىندا «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» ق ر زاڭىنىڭ جاڭا رەداكسياسى ۇسىنىلدى، دەپ حابارلايدى قازاقپارات ءتىلشىسى.

ۇسىنىلعان وزگەرىستەردە ارحەولوگيا ەسكەرتكىشتەرىنە ەرەكشە كوڭىل ءبولىنىپ وتىر. ق ر مادەنيەت جانە سپورت ۆيتسە-ءمينيسترى اسقار باتالوۆتىڭ ايتۋىنشا، قازاقستاندا 25 مىڭنان استام تاريحي-مادەني ەسكەرتكىشتەر تىركەلگەن، ونىڭ باسىم بولىگى ارحەولوگيالىق ەسكەرتكىشتەر ساناتىندا.

قولدانىستاعى زاڭدا اتالعان باعىتتاعى نورمالاردىڭ سانى وتە از جانە ارحەولوگيالىق ەسكەرتكىشتەر زاڭنامالىق تۇرعىدا ەرەكشە قورعاۋعا مۇقتاج. مينيسترلىك وكىلىنىڭ ايتۋىنشا، ارحەولوگيا نىساندارىن ايرىقشا مەملەكەتتىك مەنشىك دەپ تانۋ قاجەت.

بۇل جەكە مەنشىك جەرلەردەگى ەسكەرتكىشتەردى ساقتاۋعا زاڭنامالىق كەپىلدىك بولىپ تابىلادى. ودان بولەك، تاريحي-مادەني مۇرا نىساندارىنىڭ ءبىرىڭعاي ەلەكتروندىق مەملەكەتتىك ءتىزىلىمىن قۇرۋ كەرەك.

وندا تاريحي-مادەني قۇندى نىساندار تۋرالى دەرەكتەر بازاسى، كارتا جانە قورعالعان ايماقتار تۋرالى مالىمەتتەر بولۋى ءتيىس. وكىلەتتى ورگان مەن جەرگىلىكتى اتقارۋ ورگاندارىنىڭ وكىلدىكتەرىن شەكتەپ، ساراپتامالىق تۇجىرىمداردى ازىرلەۋ، قۇجاتتاۋ جانە وزگە دە قۇقىقتاردى مەملەكەتتىك رەسپۋبليكالىق مۋزەي-قورىقتارعا نەمەسە مەملەكەتتىك وبلىستىق ەسكەرتكىشتەردى قورعاۋ ينسپەكسياسىنا تابىستاعان ءجون.

سونىمەن بىرگە، مينيسترلىك وكىلدەرى كەز كەلگەن ارحەولوگيالىق ولجانىڭ مەملەكەت مەنشىگىندە بولۋى ءتيىس ەكەنىن باسا ايتتى جانە قۇندى ارحەولوگيالىق مۇرالاردى كەزدەيسوق تاۋىپ العاندارعا زاڭ جۇزىندە سىياقىلار بەرىلۋى مۇمكىن ەكەنىن حابارلادى.

«مەملەكەت قاراجاتىنا جۇزەگە اسىرىلاتىن ارحەولوگتاردىڭ ارنايى زەرتتەۋ جۇمىستارى زاڭمەن رەتتەلگەن، وندا تابىلعان ولجالار مەملەكەت مەنشىگىنە وتەدى.

ال كەزدەيسوق ادامداردىڭ قۇندى تاريحي ولجانى تاۋىپ الۋ جاعدايى قازىرگى زاڭنامادا قاراستىرىلماعان. تابىلعان ولجالاردىڭ بارلىعى مادەني قۇندىلىق بولىپ سانالاتىندىقتان، كەز كەلگەن ارحەولوگيالىق ولجانىڭ زاڭ جۇزىندە مەملەكەت مەنشىگىندە بولعانىن قالايمىز.

زاڭعا ەنگىزىلەتىن جاڭا وزگەرىستەردە كەزدەيسوق تابىلعان قۇندى ارحەولوگيالىق ولجانى مەملەكەتكە وتكىزۋدىڭ تولىق ءتارتىبىن بەكىتۋ كوزدەلىپ وتىر. تاپقان ادامعا ولجانىڭ پايىزدىق بولىگىن اقشالاي بەرۋ ماسەلەسى دە قاراستىرىلىپ جاتىر»، - دەپ ءتۇسىندىردى مادەنيەت جانە سپورت مينيسترلىگى زاڭ قىزمەتى دەپارتامەنتىنىڭ ديرەكتورى كۇمىس سەيىلوۆا.

دەپاراتمەنت ديرەكتورى تابىلعان ولجانى قاساقانا مەملەكەتكە وتكىزبەگەن جاعدايدا اكىمشىلىك شارالار قولدانىلۋى مۇمكىن ەكەنىن اتاپ ءوتتى.

ايتا كەتەيىك، قازىرگى «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» ق ر زاڭى 1992-جىلدىڭ 2- شىلدەسىندە قابىلدانعان. اتالعان زاڭدى جەتىلدىرۋ ماقساتىندا وعان 2007، 2015 جانە 2017-جىلدارى تۇزەتۋلەر ەنگىزىلگەن. مادەنيەت جانە سپورت ۆيتسە-ءمينيسترىنىڭ ايتۋىنشا، قوعامدا ورىن الىپ جاتقان قارقىندى وزگەرىستەر قولدانىستاعى زاڭنىڭ كوپتەگەن قاعيدالارىنىڭ ەسكىرۋىنە اكەپ سوققان.

اۆتور: ايجان سەرىكجان قىزى