الەم بارىسى: ايبەك نۇعىماروۆ پەن ەلامان ەرعاليەۆ كەلەسى كەزەڭگە ءوتتى

استانا. قازاقپارات - ەلوردانىڭ «بارىس ارەناسىندا» قازاق كۇرەسىنەن «الەم بارىسىنىڭ» سالتاناتتى اشىلۋى بولىپ ءوتتى.

سالتاناتتى شارانىڭ ءىزىن الا قازاق بالۋانى داۋرەن نۇرالينوۆ وزبەكستاندىق مۋحسين حيسوميددينوۆپەن بوز كىلەمگە شىقتى، دەپ حابارلايدى «قازاقپارات» ح ا ا ءتىلشىسى.

«الەم بارىسىنىڭ» سالتاناتتى اشىلۋىندا ق ر ەنەرگەتيكا ءمينيسترى، حالىقارالىق قازاق كۇرەسى فەدەراتسياسىنىڭ پرەزيدەنتى قانات بوزىمبايەۆ جانە ق ر پارلامەنتى سەناتىنىڭ دەپۋتاتى دارحان قالەتايەۆ بالۋاندارعا ساتتىلىك تىلەدى.

ايتا كەتەرلىگى، قانات بوزىمبايەۆ پاۆلودار وبلىسىنىڭ اكىمى بولىپ تۇرعان تۇسىندا قازاق كۇرەسىنەن تۇڭعىش «الەم بارىسى» وتكەن بولاتىن. فەدەراتسيا پرەزيدەنتى قازاق كۇرەسىنىڭ جىل ساناپ دامىپ كەلە جاتقانىن تىلگە تيەك ەتتى.

سالتاناتتى جيىنعا كەلگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى «الەم بارىسى» دوداسىن اشىق دەپ جاريالادى.

سالتاناتتى اشىلۋدان كەيىن بىردەن كۇرەس باستالىپ كەتتى. وكىنىشكە وراي، العاشقى كەزدەسۋىندە داۋرەن نۇرالينوۆ وزبەك بالۋانىنان ۇتىلىپ قالدى. ال پولشادان كەلگەن پەتور توماش تالوچپەن وتكەن دودادا ايبەك نۇعىماروۆ جەڭىسكە جەتتى.

بۇدان كەيىن بوز كىلەمگە شىققان وڭتۇستىك كورەيانىڭ بيەن گۆا لي ەسىمدى بالۋانىن العاشقى سەكۋندتاردا-اق جامباسقا سالىپ، تازا جەڭدى.

ەسكە سالا كەتسەك، استانا قالاسىنداعى «بارىس ارەنادا» بۇگىن «الەم بارىسى» دوداسى ءوتىپ جاتىر. وسىعان دەيىن بوز كىلەمگە شىققان ەرجان شىنكەيەۆ قارسىلاسىن تازا جەڭىپ، كەلەسى اينالىمعا جولداما العان بولاتىن.

اۆتور: ايان بەكەن ۇلى