رەسەيلىك رۇستەم ارسلانوۆ: الەم بارىسىنداعى باستى قارسىلاستارىم - قازاق بالۋاندارى

استانا. قازاقپارات- استانادا ءوتىپ جاتقان «الەم بارىسى» دوداسىندا رەسەيلىك بالۋان رۇستەم ارسلانوۆ العاشقى كەزدەسۋىندە ليۆيادان كەلگەن قارسىلاسى وبەيد ۆاسسيمدى تازا ۇتىپ، كەلەسى كەزەڭگە جولداما الدى. بەلدەسۋدەن كەيىن رەسەيدىڭ باشقۇرتستان ەلىنەن كەلگەن اڭگىمەلەۋدىڭ ءساتى ءتۇستى.

رۇستەم ارسلانوۆ قازاق كۇرەسىنە بۇرىننان بەرى قىزىعىپ جۇرگەنىن ايتادى. بالۋان 1980 -جىلى دۇنيەگە كەلگەن. ۇلتى باشقۇرت. ءبىر قىزىعى، قازاق كۇرەسىنە دەن قويعاننان باستاپ- اق، رۇستەم ايتارلىقتاي كورسەتكىشكە قول جەتكىزگەن ەكەن.

«وتكەن جىلى قىرعىزستاندا وتكەن كوشپەندىلەر فەستيۆالىندە ءبىرىنشى رەت قازاق كۇرەسىنەن باعىمدى سىناپ كوردىم. ول كەزدە قازاقتىڭ مىقتى بالۋاندارىنىڭ ءبىرى سانالاتىن ەلامانمەن اقتىق باسەكەدە كۇش سىناسقان ەدىم. جولىم بولىپ سول جولى ەلاماندى جەڭىپ، ءبىرىنشى ورىندى يەلەندىم. قازاق كۇرەسىن مەڭگەرۋ مەن ءۇشىن ەشقانداي كەدەرگى تۋدىرعان جوق. ءوزىم نەگىزىنەن سامبو جانە دزيۋدو كۇرەسىن مەڭگەرگەنمىن. جەتىستىكتەرىم دە بارشىلىق. دزيۋدودان ەكى مارتە ابساليۋتتى سالماقتا رەسەي فەدەراتسياسىنىڭ چەمپيونى اتاندىم. سامبودان 2015 -جىلى ەۋروپا چەمپيونى بولدىم» ، - دەيدى رۇستەم.

رەسەيلىك بالۋان سونىمەن بىرگە، وسى سايىستاعى ەڭ باستى قارسىلاستارىنىڭ كىم ەكەنىن اتادى.

«بۇل جاققا كەلىپ قازاقتارمەن ءوز تىلىمدە ۇعىنىسىپ ءجۇرمىن. ءبارىن تۇسىنەمىن. وسىنداي شوۋدىڭ بولىپ جاتقانى شىنىندا دا ماقتان تۇتارلىق. ءبىرىنشى كەزدەسۋىم كۇردەلى بولعان جوق. مۇنداعى باسەكە تۋرالى سۇراساڭىز، البەتتە، ەڭ ءبىرىنشى كەزەكتە قازاقستان بالۋاندارى - مەنىڭ باستى قارسىلاستارىم. ۋكراينا، بەلورۋس پەن گرۋزيانىڭ بالۋاندارى وسال ەمەس. جەرەبە بويىنشا سوڭعى اتالعان ەلدەردىڭ كىل مىقتىلارىنا ءتۇسىپ قالعان سەكىلدىمىن. دەسە دە، جەڭىسىمە سەنىمدىمىن»، - دەيدى باشقۇرت سپورتشىسى.

اۆتور: ايان بەكەن ۇلى