الماتىلىق كاراتەشى يمام مەشىتتە ءتارتىپ بۇزعان ءسالافتى «ۇيىقتاتىپ» تاستادى - فوتو
بۇرىنعى تىڭشىنىڭ يسلامعا بەت بۇرىپ، مولدا اتانۋىنا قىزمەتى سەبەپ بولعانىن جاسىرمايدى.
NUR. KZ پورتالى كۇندىز يمام، كەشكە جاتتىقتىرۋشى بولىپ جۇمىس ىستەيتىن قاريا جايلى ەرەكشە سۇحباتتى نازارلارىڭىزعا ۇسىنادى.
سەيىتقالي قاجى ىبىتايەۆ 64 جاستان اسسا دا، ءوزىن 25-تەگى جىگىتتەي سەزىنەدى.
64 جاستاعى يمام 16 كەلىلىك كىر تاسىن توقتاماي 20 رەت كوتەرەدى.
فوتو: جەكە مۇراعاتى.
ول اپتاسىنا بىرنەشە رەت 15 كەلى تاس سالىنعان سومكەنى ارقالاپ، ءتورت شاقىرىمدىق تاۋ بوكتەرىنە جۇگىرىپ شىعادى نەمەسە 10 شاقىرىمدى جاياۋ جورتىپ از ۋاقىتتا باعىندىرادى. اقساقال سپورتتىڭ ەڭ قيىن تۇرلەرىن، ونىڭ ىشىندە كاراتە، قويان- قولتىق ۇرىستى جەتىك مەڭگەرگەن.
سەيىتقالي قاجى ىبىتايەۆتىڭ تاۋداعى تاڭعى جاتتىعۋى.
فوتو: جەكە مۇراعاتى.
«مەن ومىرگە كەلگەننەن كەيىن ەكى ايدان سوڭ انام دۇنيەدەن قايتتى، ال التى جاسىمدا اكەم كوز جۇمدى. ءتىرى جەتىم بولىپ قالعان سوڭ ءبىر كارى اجە باۋىرىنا باستى. ول كىسى دە كوپ ۇزاماي ومىردەن ءوتىپ، مەن بالالار ينتەرناتىندا تاربيەلەندىم. بالالار ۇيىندە وزىڭە جاۋاپ بەرمەسەڭ الىمجەتتىك بولادى، سودان مىقتى توبەلەسۋدى ۇيرەندىم. مەنى سىرتتاي بايقاعان مەملەكەتتىك قاۋىپسىزدىك قىزمەتى ارنايى مەكتەپكە وقۋعا جىبەرىپ، اسكەري دايىندىقتان وتكىزدى.
اۋعان سوعىسى جىلدارى ەڭ قاۋىپتى نىسانداردىڭ كوزىن جويۋ سىندى جۇمىس اتقارىپ، پودپولكوۆنيك شەنىندەگى وفيتسەر بولدىم. 1988 -جىلى باسشىلىق تۇركيا ەلىنە تىڭشىلىققا جىبەردى. ناماز وقۋدى سول جاقتان ۇيرەنىپ، يسلام ءدىنىن جان دۇنيەممەن جاقسى كوردىم. 1992 -جىلى ەلگە ورالىپ، يماندىلىققا بەت بۇردىم»، - دەپ قاريا ءوزى تۋرالى قىسقاشا ايتىپ ءوتتى.
سەيىتقالي قاجى ىبىتايەۆ مەشىتتىڭ ءىشى سىرتىنا گۇل وسىرگەندى ۇناتادى. فوتو: NUR. KZ.
سەيىتقالي ىبىتايەۆ «ءسات» مەشىتىن قولعا العان ساتتەن باستاپ ءتورت رەت كۇردەلى جوندەۋدەن وتكىزىپ، قازىر 500 ادام سياتىن عيماراتقا اينالدىرعان. قۇرىلىس جۇمىستارىنا قالتالى ازاماتتارى تارتىپ، قالا بەردى سپورتتان شاكىرت تاربيەلەپ ءجۇرىپ وسىنداي جەتىستىككە جەتكەنىن ماقتان تۇتادى.
«ءسات» مەشىتىنىڭ 1900 - جىلدارى كەيىپى مەن قازىرگى كەزى. فوتو: NUR. KZ.
ءبىزدىڭ مەشىتكە ءسالافتار اياعىن باسپايدى...
«ءسات» مەشىتىنىڭ باستى ەرەكشەلىگى - مۇندا اسكەري ءتارتىپ ورناتىلعان. قىزمەتكەرلەر دە، كەلەم دەۋشىلەر دە ەڭ ءبىرىنشى تازالىقتى جانە ىشكى نورمانى ساقتاۋعا مىندەتتى. بولماسا باس يمام سىباعاسىن بەرەتىنىن جاسىرمايدى.
سەيىتقالي قاجى ىبىتايەۆتىڭ قويان- قولتىق ۇرىستىڭ پىشاقپەن قورعانۋ ونەرىن كورسەتۋ ءساتى. فوتو: NUR. KZ.
«سالافيزىم جەتەگىندەگى جىگىتتەر مەشىتكە كەلىپ، قاتە ۋاعىزدارىن ايتىپ، مەشىت ەرەجەسىن بۇزدى. ەكى رەت ەسكەرتۋ جاساپ، بۇلاي بولمايتىنىن ايتتىم. تۇسىنبەگەن سوڭ اسكەري ءتاسىلدى قولدانىپ، «ۇيىقتاتىپ» تاستادىم. ەرتەسى ماعان كەلىپ: «سەن مەنى ۇردىڭ، سوتقا بەرەمىن، ارىزدانامىن» دەدى. قايدا بارساڭ دا ءوز ەركىڭ دەپ ايتتىم. ول پوليتسياعا شاعىم تۇسىرمەي كەرىسىنشە، ءىرى دەنەلى، سپورتپەن شۇعىلداناتىن 15 ءسالاف جىگىتتى جيناپ اكەلىپتى. بارلىعى مەشىت ىشىنە كىرىپ الىپ، ماعان قوقاڭداپ، قورقىتپاق بولدى.
«بۇل مەشىتكە تەك ءتۇزۋ جولداعى ادامدار كىرەدى. ەل سەكىلدى ناماز وقيتىن بولساڭدار عانا رۇقسات. ءسالافيزدى تاستاپ، ءبىزدىڭ جولدى تاڭداساڭدار ەشكىم سەندەردى قۋمايدى»، - دەپ ايتتىم. تۇسىنبەيدى، امال جوق كۇش قولدانۋعا تۋرا كەلدى. سەبەبى، ولار مەنى ۇرۋعا دايىن تۇر ەدى. بەس جىگىتتى سپورتتىق تاسىلمەن جەرگە الىپ ۇرىپ ەدىم، قالعانى كۇشتەرى جەتپەيتىنىن تۇسىنگەن سوڭ، مەشىتتى تاستاپ جوندەرىنە كەتتى. سودان بەرى ءسالافتاردىڭ اراسىندا مەن تۋرالى اڭىز تاراپ، ولار ءبىزدىڭ مەشىتكە اياعىن اتتاپ باسپايدى. بارلىعىن جۇدىرىقپەن شەشۋ مۇمكىن ەمەس، ءۇش ازاماتقا كۇنى- ءتۇنى ءتۇسىندىرىپ ءجۇرىپ، سالافيزمنەن شىعارىپ الدىق. قازىر بىزبەن بىرگە جۇما نامازىن وقيدى»، - دەدى يمام.
مەشىت يمامى دەنەسىن شىمىر ۇستاۋ ءۇشىن كۇندە سپورتپەن شۇعىلدانادى. فوتو: جەكە مۇراعاتى.
سپورتشى يمام ەش ۋاقىتتا تويىپ اس جەمەگەنىن ايتادى. ارتىق اس ادام اعزاسىنا زيان دەپ تۇسىنەتىن مولدا دەنەسىن شىمىر ەتىپ ۇستاۋ ءۇشىن ازدان عانا تاماقتانادى. كۇن سايىن كىر تاسىن كوتەرىپ، سۋىق سۋعا جۋىنىپ، دەنەسىن ابدەن شىنىقتىرعان قاريا وسى كۇنگە دەيىن ءدارى مەن دارۋمەن دە ءىشىپ كورمەپتى.
سەيىتقالي ىبىتايەۆتىڭ «ايتەكە بي» وبرازىندا. فوتو: جەكە مۇراعاتى.
«جىگىتكە جەتى ونەردە از» دەپ سانايتىن قاجى سوڭعى كەزدەرى رەجيسسەرلەردىڭ سۇراۋى بويىنشا بىرنەشە تاريحى سەريالدار مەن كينولاردا ايتەكە بي مەن قورقىت اتا سىندى تۇلعالاردىڭ وبرازىندا ويناعان.
قاجىنىڭ ومىردەگى جەتىستىكتەرى وتە كوپ. فوتو: جەكە مۇراعاتى.
وسىنداي سان قىرلى ونەرى بار اقساقالدى ب ۇ ۇ- مۇشەلەرى ەرەكشە ماراپاتتاپ، باتا الۋ ءۇشىن ارنايى كەلىپ كەتىپتى. سەيىتقالي ىبىتايەۆ بۇگىندە «جامبىل اۋدانىنىڭ قۇرمەتتى ازاماتى»، «التىن قىران» مەدالىنىڭ يەگەرى.
سەيىتقالي قاجى ىبىتايەۆ شاكىرتتەرى سىيعا تارتقان كولىگىن كورسەتتى. فوتو: NUR. KZ.
ال استىنداعا قىمبات ءاپپاق تۇلپارىن سپورتشى شاكىرتتەرى چەمپيون بولعاندارى ءۇشىن العىس ايتىپ، سىيعا تارتقان ەكەن.
«يسلام، سپورت جانە اسكەري قىزمەت ءبىر- بىرىمەن ەگىز سەكىلدى. سەبەبى، بارلىعى ءتارتىپتى جانە ەڭبەكقورلىقتى تالاپ ەتەدى»، - دەيدى قاجى.
Nur.kz
