فرانسيالىق جۋرناليستەر ۋران ءوندىرۋشى كاسىپورىندارمەن تانىسۋ ءۇشىن سوزاق جەرىن ارالاپ ءجۇر
دەپ حابارلايدى قازاقپارات ح ا ا ءتىلشىسى.
فرانسيالىق جۋرناليستەر الدىمەن «كاتكو ب ك» ج ش س بىرلەسكەن قازاق- فرانسۋز كاسىپورنىندا بولدى. 1996 -جىلى قۇرىلعان كاسىپورىن بۇگىندە سوزاق اۋدانىنداعى مويىنقۇم، ءتورتقۇدىق ۋران كەن ورنىن بارلاۋمەن جانە وڭدەۋمەن اينالىسادى. اتوم ونەركاسىبىندە وزىندىك ورنىن العان كاسىپورىن جەرگىلىكتى حالىققا الەۋمەتتىك كومەك تە كورسەتىپ كەلەدى. بۇل كومپانيا وسى ۋاقىتقا دەيىن سوزاق اۋدانىنا جالپى سوماسى 1 ميلليارد 89 ميلليون تەڭگەگە مەكتەپ، بالاباقشالار سالىپ بەردى. مەكەمەدە 1289 قىزمەتكەر جۇمىس ىستەسە، ونىڭ 52 پايىزى جەرگىلىكتى تۇرعىندار.
«كاتكو» قازاقستان- فرانسۋز بىرلەسكەن كاسىپورنى» الەم بويىنشا ۋران وندىرۋدەن 1-ورىندا كەلەدى. ءبىز سوزاق اۋدانى اكىمدىگىمەن جانە اۋىل اكىمدەرىمەن بيزنەستىڭ الەۋمەتتىك باعدارلاماسى اياسىندا تىعىز بايلانىستا جۇمىس جاسايمىز. سوڭعى 5 جىلدىڭ ىشىندە جاستاردى فرانسياعا وقۋعا جىبەرىپ جاتىرمىز. جاستارعا كوپ سەنىم ارتۋدامىز»، - دەيدى سەرىكتەستىكتىڭ باس ديرەكتورى جەرار فريەس.
فرانسۋزدىق تىلشىلەر تاعى بىرنەشە ءوندىرىس ورنىن ارالاپ، سوزاق اۋدانىنىڭ بۇگىنگى تىنىس تىرشىلىگىمەن تانىستى. اۋىل تۇرعىندارىمەن سويلەسىپ، اۋدان باسشىلارىمەن جۇزدەستى. شاعىن كاسىپورىندارعا باس سۇعىپ، ونداعى دايىن ونىمدەردى كورىپ شىقتى.
«مەن قازاقستانعا العاش رەت كەلىپ تۇرمىن. مۇنداعى حالىقتىڭ قوناقجايلىلىعى، تارتىمدىلىعى وتە قاتتى ۇنادى. مۇندا بىزگە ۋراننىڭ قالاي وندىرىلەتىنىن كورسەتتى. الداعى ۋاقىتتا سوزاق اۋدانىنداعى كاسىپورىندار تۋرالى ءوز گازەتتەرىمىزدە جاريالايمىز» ، - دەيدى «La Provence»گازەتىنىڭ ءتىلشىسى مەلودي تەستي.
ءوز كەزەگىندە شەتەلدىك تىلشىلەرمەن كەزدەسكەن اۋدان اكىمى سالىحان پولاتوۆ جەرگىلىكتى بيلىك پەن حالىقارالىق كومپانيا تاراپىنان ەكىجاقتى كەلىسىم نەگىزىندە اتقارىلعان جۇمىستار جايىن بايان ەتتى. «كاتكو» كومپانياسىنىڭ باسشىلىعى الەۋمەتتىك سالاعا ءالى دە بولسا، كومەك قولىن سوزاتىنىن جەتكىزدى.
اۆتور: اينۇر اقبايەۆا
