گوللانديالىقتار قازاقستانعا قىزعالداق ءوسىرۋدىڭ قىر- سىرىن ۇيرەتپەك
الدىمەن قوناقتار الماتى وبلىسى اكىمىنىڭ ورىنباسارى سەرىكجان بەسكەمپىروۆپەن كەزدەستى. تاراپتار كەلەشەكتەگى ىسكەرلىك ىنتىماقتاستىق اياسىن تالقىلادى. كەيىن «كوكتەم گراند» قوناقۇي كەشەنىندە گوللانديالىق وزىق تەحنولوگيالارعا ارنالعان سەمينار- كەڭەس ءوتتى. جيىندا جىلىجاي كەشەندەرىنىڭ قۇرىلىسىن جۇرگىزۋ، جىلىجايلارعا ارنالعان اۆتوماتتاندىرىلعان جۇيەلەر ورناتۋ، جەمىس- جيدەك جانە كوكونىس قويماسىن سالۋ، جىلىجاي كەشەندەرىنە جارىقتاندىرۋ جۇيەسىن جۇرگىزۋ جايلى ايتىلدى.
سەمينار- كەڭەسكە اۋىلشارۋاشىلىعى ماقساتىنداعى ونىمدەر وندىرەتىن گوللانديالىق 14 كومپانيانىڭ وكىلدەرى قاتىستى. ولار جەرگىلىكتى كومپانيالارمەن كەلىسسوزدەر جۇرگىزىپ، قوس تاراپقا دا ءتيىمدى تالاپتار مەن ۇسىنىستار جايىن تالقىلادى.
«نيدەرلاندى اۋىلشارۋاشىلىق ونىمدەرىن ەكسپورتتاۋ جاعىنان الەمدە 2- ورىندا تۇر. شىنداپ كەلگەندە، ءبىزدىڭ جەر اۋماعىمىز سىزدەردىكىنەن 65 ەسە كىشى. ءبىراق، ءبىزدىڭ جەتىستىكتەرىمىز كەلىسەرسىزدەر، كوش ىلگەرى. ماسەلەن، جىلىجايلار جۇيەسىنە بىزدە 10 مىڭ گەكتار جەر بەرىلگەن. 5 مىڭ گەكتارىنا - كوكونىس، 5 مىڭىنا - گۇل ءوسىرىپ وتىرمىز. مۇنداي جەتىستىكتەر ارينە، وزىق تەحنولوگيالاردىڭ ارقاسى. ءبىز وسىندا كەلمەس بۇرىن اۋىل شارۋاشىلىعى مينيسترلىگىندە بولدىق. قازاقستانمەن اگرارلىق سالاداعى قارىم- قاتىناستى ارتتىرعىمىز كەلەدى»، - دەيدى نيدەرلاندى كورولدىگى ەلشىلىگىنىڭ اۋىلشارۋاشىلىق ماسەلەلەرى جونىندەگى كەڭەسشىسى مەۋۆەس براۋەر.
كورولدىكتەن 30-عا جۋىق ادام كەلدى. قۇرامىندا نيدەرلاندىنىڭ ەكونوميكالىق ىستەر، اۋىلشارۋاشىلىق مينيسترلىكتەرى وكىلدەرى، سونداي- اق اگرارلىق سالاداعى 14 ءىرى كومپانيانىڭ جەتەكشىلەرى بار. جالپى، مۇحيت اسىپ كەلگەندەردەن ۇيرەنەرىمىز كوپ، دەيدى جيىنعا قاتىسۋشىلار. ماسەلەن، قازاقستان شەتەلدەن جىلىنا 154 ميلليون دوللارعا گۇل ساتىپ الادى. قاراجاتتىڭ باسىم بولىگى وسى نيدەرلاندىعا كەتىپ جاتىر. ءتىپتى، قىزعالداقتىڭ وتانى - قازاقستان دەي تۇرا، قىر گۇلىن دا سولاردان ساتىپ الامىز. گوللانديالىقتار قىزعالداقتى ءوسىرۋدىڭ قىر- سىرىنا ۇيرەتۋگە دە ءازىر.
ايتا كەتسەك، اۋماعى 1 گەكتار گوللانديالىق دايىن جىلىجايدىڭ قۇنى - 1-1,5 ميلليون ەۋرو.
اۆتور: سامال قابىشيەۆا 
