استانادا وتەتىن «الەم بارىسىنا» ەڭ سالماقتى، ەڭ بويشاڭ جانە ەڭ جاس بالۋاندار قاي ەلدەن كەلدى
وسى رەتتە «قازاقپارات» ح ا ا ءتىلشىسى بايراقتى دوداعا قاتىسۋشىلارعا قاتىستى قىزىقتى دەرەكتەرمەن بولىسەدى.
قازاق كۇرەسىنەن الەمدىك سايىس تۇڭعىش رەت 2014 -جىلى پاۆلودار قالاسىندا وتكەن بولاتىن. ال بۇل جولعى چەمپيونات شىنىمەن دە، بۇرىنعىدان دا وزگەشە. بۇلاي دەيتىنىمىز، قازاق كۇرەسىنەن وتەتىن سايىسقا بۇعان دەيىن ءدال وسىنشاما كوپ ەلدىڭ بالۋاندارى قاتىسىپ كورگەن ەمەس. بەرىسى قىتاي مەن رەسەي، ارعىسى افريكا ەلدەرى مەن ا ق ش، لاتىن امەريكا ەلدەرىنەن بوز كىلەمنىڭ شاڭىن قاققان كىل مىقتىلار باس قوسىپ وتىر. بۇل الەمدىك دوداعا 7 قازاق بالۋانى قاتىسادى. ونىڭ ەكەۋى قىتاي جانە موڭعوليا ەلىنىڭ نامىسىن قورعاۋعا كەلىپ وتىرعان ەسبول جاقتان مەن سەرىك بەردىمۇرات بولسا، قالعان 5 بالۋان، اتاپ ايتقاندا، ايبەك نۇعىماروۆ، داۋرەن نۇرالينوۆ، ايبات سەيتەن، ەرجان شىنكەيەۆ پەن ەلامان ەرعاليەۆ قازاقستاننىڭ كوك تۋىن جەلبىرەتىپ شىعادى.
ەندىگى كەزەكتە «Alem Barysy» دوداسىنداعى قىزىقتى دەرەكتەرمەن بولىسسەك. بۇل سايىستاعى ەڭ كەنجە بالۋان تۇركيا ەلىنەن كەلگەن ەكەن. ونىڭ جاسى بار- جوعى 19-دا. ال جاسى ەڭ ۇلكەن بالۋان يزرايلدەن كەلىپ وتىر. 1968 -جىلى دۇنيەگە كەلگەن ولەگ حايت جاستارمەن كۇش سىناسۋعا بەل شەشكەن.
جارىستاعى سالماعى ەڭ اۋىر كۇرەسكەر سوناۋ جاڭا زەلانديادان ات تەرلەتىپ قازاقستانعا جەتكەن.
175 كەلىلىك چيكو رەرەموانا پەمبەرتون كۇنى كەشە الىپ دەنەسىمەن «Mega Silk Way» ويىن- ساۋىق كەشەنىندەگى كورەرمەندەردىڭ قوشەمەتىنە يە بولدى. ەڭ قىزىعى، چيكو العاشقى كەزدەسۋدى كونگودان كەلگەن سالماعى ەڭ جەڭىل بالۋانداردىڭ قاتارىنداعى (91 كەلى) تەللي فەرولە ويەنزامەن وتكىزەتىن بولدى. وسى تۇرعىدا ايتا كەتەرلىگى، بۇل چەمپيوناتتا سالماعى ەڭ جەڭىل بالۋاندار يراكتىق حادي ءالي حادي جانە قۇرلىق اسىپ كامەرۋن ەلىنەن كەلگەن ديادوننا دولاسسەم بولىپ شىقتى.
«Alem Barysy» دوداسىنداعى ەڭ بويشاڭ بالۋان - رەسەيلىك رۇستەم ارسلانوۆ. ونىڭ بويى 197 سانتيمەتر.
ەسكە سالا كەتسەك، 6 قىركۇيەك كۇنى ەلورداداعى «Mega Silk Way» ساۋدا، ويىن- ساۋىق كەشەنىندە «Alem Barysy» دوداسىنا قاتىساتىن بالۋاندار اراسىندا سالماق ولشەۋ جانە جەرەبە تارتۋ ءراسىمى وتكەن ەدى. شارا بارىسىندا قازاق بالۋاندارىنىڭ ىرىكتەۋ كەزەڭىندەگى قارسىلاستارى بەلگىلى بولدى.
اۆتور: ايان بەكەن ۇلى
