استانادا وتەتىن «الەم بارىسىنداعى» قازاق بالۋاندارىنىڭ قارسىلاستارى انىقتالدى - فوتو
شارا بارىسىندا قازاق بالۋاندارىنىڭ ىرىكتەۋ كەزەڭىندەگى قارسىلاستارى بەلگىلى بولدى، دەپ حابارلايدى «قازاقپارات» ح ا ا ءتىلشىسى.
الەمنىڭ تۇكپىر- تۇكپىرىنەن جينالعان بالۋانداردىڭ سالماق ولشەۋ جانە جەرەبە تارتۋ ءراسىمىن بەلگىلى تەلەجۇرگىزۋشى بەيسەن قۇرانبەك جۇرگىزدى.
ءراسىم الدىندا كورەرمەندەرگە التىن، كۇمىس جانە قولا بەلدىكتەر تانىستىرىلدى. الدىمەن بالۋاندار ساحناعا ءبىر- بىردەن شىعىپ، سالماقتارىن ولشەدى. كەيىن جەرەبە قورجىنىنداعى اسىقتاردى الىپ شىعۋ ارقىلى، وزدەرىنىڭ قارسىلاستارىن انىقتادى.
جەرەبەگە سايكەس، «قازاقستان بارىسى» اتانعان، قازاق كۇرەسىنەن الەم چەمپيوناتىنىڭ كۇمىس جۇلدەگەرى ايبەك نۇعىماروۆ 25 جاستاعى ەستونيالىق دميتري لەپپەن بوزكىلەمگە شىعاتىن بولدى. ال قازاقستان كۋبوگىنىڭ جەڭىمپازى داۋرەن نۇرالينوۆ ايتۋلى جارىستاعى العاشقى كەزدەسۋىن ءۇندىستاندىق جاگبير سينگح رانامەن وتكىزەدى. قازاق كۇرەسىنەن عانا ەمەس، دزيۋدودان دا الەمدىك جارىستاردا توپ جارىپ جۇرگەن ەرجان شىنكەيەۆ سالماعى 130 كەلىلىك پولشالىق توماش پيتور تالاچپەن بەلدەسەدى.
قازاق كۇرەسىنەن اتاعى شىعىپ كەلە جاتقان جاس بالۋان ايبات سەيتەن جۋىقتا عانا دزيۋدودان ەۋروپا چەمپيونى اتانعان گرۋزيالىق گۋرام تۋشيشۆيليمەن شىعادى. ال بيىل عانا «قازاقستان بارىسى» اتانعان ەلامان ەرعاليەۆ ليتۆانىڭ بالۋانى مارتينوس ۆاسكوۆيچپەن كەزدەسەدى.
ەسكە سالا كەتسەك، ەرتەڭ، 8 - قىركۇيەك كۇنى ەلورداداعى «بارىس ارەنادا» قازاق كۇرەسىنەن
«Alem barysy» چەمپيوناتى وتەدى. بايراقتى باسەكەدە الەمنىڭ قىرىققا جۋىق ەلىنەن 43 بالۋان ءوزارا مىقتىنى انىقتايدى. قىتايدان كەلگەن جاقتان ەسبول مەن موڭعوليادان كەلگەن سەرىك بەردىمۇرات اتتى قانداستارىمىز دا وسى الاماندا باقتارىن سىناماق. ءبىرىنشى ورىندى يەلەنگەن بالۋان التىن بەلدىكپەن بىرگە 15 ميلليون تەڭگە سىياقى الادى. جارىس تانىمال الەمدىك تەلەارنالار ارقىلى 100 مەملەكەتتە كورسەتىلەتىن بولادى.
اۆتور: ايان بەكەن ۇلى
