الماتىداعى مۋزەيگە اقان سەرىنىڭ دومبىراسى تاپسىرىلدى

الماتى. قازاقپارات - الماتىدا ىقىلاس اتىنداعى حالىق اسپاپتار مۋزەيى قورىنا اقان سەرىنىڭ دومبىراسى تاپسىرىلدى، دەپ حابارلايدى قازاقپارات ءتىلشىسى.

 اقان سەرىنىڭ تاريحي دومبىراسىن مۋزەي قورىنا جازۋشى ساكەن ءجۇنىسوۆتىڭ ۇرپاقتارى تاپسىرعان. ادەبيەت سۇيەر قاۋىمعا بەلگىلى جازۋشى ساكەن ءجۇنىسوۆ اقان سەرى ومىرىنە ارناپ رومان جازعان. جازۋشى ەكى تومدىق روماندى جازۋ بارىسىندا دومبىرانى كوكشەتاۋدان تاپقان.

 بۇگىن اقان سەرى دومبىراسىنىڭ مۋزەي قورىنا قابىلداۋىنا وراي جىر كەشى ءوتتى. ءانشى جولامان قۇجىمانوۆ، رامازان ستامعازيەۆ، تالعات ءابۋعازى، گۇلسىم ارىسبايەۆا باستاعان ءداستۇرلى انشىلەر اقان سەرىنىڭ «ءشامشىقامار»، «ماڭماڭگەر»، «بالقاديشا» اندەرىن شىرقادى. كەشكە الماتى اكىمى باۋىرجان بايبەك قاتىستى.

«ەلباسى ن. نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا: «ۇلتتىق سالت- داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس. ابايدىڭ دانالىعى، اۋەزوۆتىڭ عۇلامالىعى، جامبىلدىڭ جىرلارى مەن قۇرمانعازىنىڭ كۇيلەرى، عاسىرلار قويناۋىنان جەتكەن بابالار ءۇنى - بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا»، دەلىنگەن بولاتىن. بۇل باعىتتا ۇلت پەن ۇرپاق ءۇشىن كوتەرىلگەن ماڭىزدى ماسەلەلەردى ىسكە اسىرۋ ماقساتىندا، ىقىلاس اتىنداعى حالىق مۋزىكالىق اسپاپتار مۋزەيى، ۇلتتىق ونەردى جاساۋشى تۇلعالاردىڭ جادىگەر مۇرالارىن جيناۋدى قايتا وربىتۋدە. وسىعان وراي، ۇلتتىق رۋحانياتىمىزدىڭ قالىپتاسىپ دامۋىنا زور ىقپالىن تيگىزگەن، قازاق ونەرىن بيىك شىڭعا كوتەرىپ سوڭىندا وشپەس ءىز قالدىرعان، ارقا سال- سەرىلىك ونەرى دەگەندە ەسىمدەرى ءبىرىنشى بولىپ اتالاتىن - اقان سەرى مەن ءبىرجان سال بولسا، عاسىر اسىپ اقان سەرىنىڭ قولىنا ۇستاعان قارا دومبىراسى مۋزەي قورىنا الىندى» ، - دەدى كەشتى جۇرگىزۋشى مۇرات ءابۋعازى.

ايتا كەتەيىك، اتالعان مۋزەيدە ءبىرجان سالدىڭ دا دومبىراسى ساقتالعان.

 اقان سەرى 1843 -جىلى بۇرىنعى كوكشەتاۋ وبلىسى، ۇلكەن قوسكولدىڭ ماڭىندا دۇنيەگە كەلگەن، 1913 -جىلى دۇنيەدەن وزدى. اقان سەرىنىڭ مۋزىكا تۋىندىلارى قازاق ونەرىنىڭ وركەندەۋىنە زور ىقپالىن تيگىزدى. ونىڭ شىعارمالارىن بەلگىلى انشىلەر ءا. قاشاۋبايەۆ، ج. ەلەبەكوۆ، م. ەرجانوۆ، ج. كارمەنوۆ جانە تاعى دا باسقالار ەل يگىلىگىنە اينالدىردى. قازاقستان كومپوزيتورلارىنىڭ سيمفونيالىق جانە وپەرالىق شىعارمالارىنا كەڭىنەن ەنگىزىلىپ، اقان اندەرى ەكىنشى ءومىرىن باستادى. سەرىنىڭ ءومىرى مەن تاعدىرى تۋرالى ءىلياس جانسۇگىروۆ «قۇلاگەر» پوەماسىن، ع. مۇسىرەپوۆ «اقان سەرى - اقتوقتى» دراماسىن، س. ءجۇنىسوۆ «اقان سەرى» رومانىن جازدى.

 اۆتور: الماس مۇقاش ۇلى