قانات يسلام: ايقاسقا تاس-ءتۇيىن دايىنبىز

استانا. قازاقپارات - استاناداعى «سارىارقا» ۆەلوترەگىندە قازاق بوكسشىسى قانات يسلام مەن كانادالىق برەندون كۋكتىڭ قاتىسۋىمەن كەڭەيتىلگەن باسپا ءسوز ءماسليحاتى ءوتتى، دەپ حابارلايدى «قازاقپارات» ح ا ا ءتىلشىسى.

باسپا ءسوز ءماسليحاتىنا بارلىق قازاقستاندىق بوكسشىلارى مەن ولاردىڭ قارسىلاستارى جينالعان. جيىنعا قاناتتىڭ قارسىلاسى برەندون كۋك پەن ونىڭ جاتتىقتىرۋشىسى مايك گايەت، پروموۋتەرى تايلەر براكستون دا كەلدى.

ءوز كەزەگىندە قانات يسلام ايقاسقا دايىن ەكەنىن ايتىپ ءوتتى.

«قازاقستاندا ەكىنشى مارتە جارىس وتكىزىپ جاتىرمىن. ءبىرىنشى مارتە ايقاسىم الماتىدا وتسە، ەلوردادا تۇڭعىش رەت شارشى الاڭعا شىعامىن. بارلىعى تاۋەلسىزدىگىمىزدىڭ ارقاسى دەپ ويلايمىن. بارلىق دەمەۋشىلەرگە راحمەت! تاۋەلسىز ەلدىڭ ەر-ازاماتتارى ەل نامىسىن قورعاعالى وتىرمىز. ماقساتىمىز - تەك قانا ەلىمىزدىڭ ابىرويىن كوتەرۋ، ەلگە جەڭىس سىيلاۋ، قازاق ۇلتىنىڭ رۋحىنىڭ مىقتىلىعىن بۇكىل الەمگە كورسەتە ءبىلۋ. ايقاسقا تاس-ءتۇيىن دايىنبىز. وسى ماقساتتا قانشاما تەر توكتىك. تەك بۇعان عانا ەمەس، الدىمىزدا كۇتىپ تۇرعان جەكپە-جەكتەردىڭ بارلىعىنا دايىنبىز»، - دەدى قانات يسلام.

باسپا ءسوز ءماسليحاتى بارىسىندا ءسوز بەرىلگەن قاناتتىڭ قارسىلاسى برەندون كۋك «ارىق سويلەپ، سەمىز شىعۋعا» بەل شەشكەن سەكىلدى. الداعى كەزدەسۋگە قاتىستى تىلشىلەردىڭ سۇراعىنا «ءبارىن دە رينگ كورسەتەدى» دەپ قىسقا قايىردى.

ەسكە سالا كەتسەك، قانات يسلام مەن كانادالىق برەندون كۋكتىڭ ايقاسى 9- قىركۇيەك كۇنى «سارىارقا» ۆەلوترەگىندە وتەدى. بوكس كەشىندە جاڭقوش تۇراروۆ، جانىبەك ءالىمحان ۇلى، مەيىرىم نۇرسۇلتانوۆ، رۋسلان مىرساتايەۆ، ءالي احمەدوۆ، ايدوس ەربوسىن ۇلى، ديماش نيازوۆ پەن رۋسلان جاڭابايەۆ شارشى الاڭعا شىعادى. بوكس كەشىنە بيلەتتى Zakazbiletov.kz جانە BiletAstana.kz سايتى نەمەسە «كەرۋەن» س و س و، «مەچتا» س و، «استانا ارەنا» س ك- دەگى كاسسالاردان الۋعا بولادى. 8- قىركۇيەك كۇنى ساعات 13:00-دە «حان شاتىر» ساۋدا ورتالىعىندا وسى جارىسقا قاتىساتىن بارلىق بوكسشىلار جۇبى سالماق ولشەۋ راسىمىنەن وتەدى.