نۇرسۇلتان نازاربايەۆ پولشا پرەزيدەنتىنەن ۆيزاسىز رەجيم ەنگىزۋدى ءوتىندى
بۇل تۋرالى بۇگىن اقوردادا ەلباسى نۇرسۇلتان نازاربايەۆ پولشا پرەزيدەنتى اندجەي دۋدامەن كەڭەيتىلگەن قۇرامداعى كەلىسسوزدەردەن كەيىن بىرلەسكەن مالىمدەمە جاساۋ بارىسىندا ايتتى، دەپ حابارلايدى قازاقپارات.
«ازيادان ەۋروپاعا جانە كەرى باعىتتا جۇكتەردى جەتكىزۋدى جەدەلدەتۋ ءۇشىن زاماناۋي كولىك ينفراقۇرىلىمىن جاساۋ بارىسىندا ءبىر-بىرىمىزگە كومەك كورسەتۋگە دايىنبىز. 28- مامىردا استانا مەن ۆارشاۆا اراسىندا تىكەلەي اۋە بايلانىسىنىڭ اشىلۋى دا ۇزاق كۇتكەن وقيعا بولدى. ءبىز ەكى ەل اراسىنداعى ۆيزا رەجيمىن الىپ تاستادىق جانە پولياك تاراپىنان دا سونى سۇرايمىز»، - دەدى ەلباسى پولشا پرەزيدەنتىنە قاراتا.
قازاقستان پرەزيدەنتى پولياك ارىپتەسىمەن وتكەن كەلىسسوزدەر بارىسىندا ءبىلىم جانە عىلىم ماسەلەسىنە دە باسا نازار اۋدارىلعاندىعىن، بۇگىندە 700 دەن استام قازاقستاندىق پولشانىڭ جوعارى وقۋ ورىندارىندا ءبىلىم الىپ جاتقانىن ايتتى.
«سونىمەن قاتار عىلىم-ءبىلىم، مادەني-گۋمانيتارلىق دەڭگەيدى دامىتۋدى قولدايمىز ءارى ءبىزدىڭ سەرىكتەستىگىمىزدى جانداندىرۋدى دا ەستەن شىعارمايمىز. بۇل رەتتە قازاقستاندا تۇرىپ جاتقان 32 مىڭ پولياك دياسپوراسىنىڭ ءرولى ەرەكشە. ولار ءبىزدىڭ ازاماتتارىمىز»، - دەدى نۇرسۇلتان نازاربايەۆ.
مەملەكەت باسشىسى پولشا پرەزيدەنتى اندجەي دۋدانىڭ ساپارى قازاقستاندىق-پولياك قارىم-قاتىناسىنا تىڭ سەرپىن بەرىپ، ەكى حالىقتىڭ يگىلىنە قىزمەت ەتەتىندىگىنە سەنىمدى ەكەندىگىن اتاپ ءوتتى.
اۆتور: مارلان جيەمباي
