كۇيەۋ بالاسىنىڭ ارقاسىندا اللا الدىنداعى پارىزىن وتەگەن كەيۋانا كوز جاسىن تىيا الماي ءجۇر
«قاجىلىققا ءبىرىنشى رەت كەلىپ تۇرمىن. كۇيەۋ بالام جىبەردى. ءوزىنىڭ اتا-اناسىنا مەنى قوسىپ، ۇلكەن سىيلىق جاسادى. ءىسى اللادان قايتسىن. ءار مۇسىلمان ءۇشىن ارمان بولعان قاسيەتتى جەرگە تابانىمىزدى تيگىزدى. قۋانىشتان شىققان كوز جاسىم تىيىلار ەمەس. جىلاي بەرەمىن. قايتقان جولداسىم ءۇشىن دە كىشى قاجىلىق جاسادىم. بالاما ريزامىن. ونىڭ ۇستىنە ءمۇفتياتتىڭ ءوز كومپانياسىمەن كەلدىك. بالالار جۇگىرىپ ءتۇسىندىرىپ ءجۇر»، - دەيدى شىمكەنت قالاسىنان كەلگەن قاجى اتىرگۇل احمەتوۆا.
ال اللا الدىنداعى پارىزىن وتەۋ ءۇشىن التى جىل بويى زەينەتاقىسىن جيناعان 70 جاستاعى قارياعا قاجىلىققا بارۋ ءۇشىن بالالارى دا كومەكتەسكەن.
«قاجىلىققا بارۋدى ارمانداپ جۇرگەنىمىزگە كوپ بولدى. 2011-جىلدان باستاپ زەينەتاقىمدى جينادىم. جىلدا ۇمىتتەنەمىن. بيىل 70 جاسىمدا سەگىز بالام كومەكتەسىپ، قاجىلىققا جىبەردى. ءبارى جاقسى بولدى. قىزمەت كورسەتۋ ساپاسى، تۇسىندىرۋلەردىڭ ءوزى جايلى بولدى»، - دەيدى باقىتجان ءىلياسوۆ.
