يتاليا پروفەسسورى قازاقستاندىق حيرۋگتەرگە كومەي پاتولوگياسىنا وتا جاساۋدى ۇيرەتۋدە

استانا. قازاقپارات - قازاقستاندىق حيرۋرگتار بالالاردىڭ كومەيىنىڭ تارىلۋىن ەمدەۋ بويىنشا جاڭا تەحنولوگيالار مەڭگەرۋدە، دەپ حابارلايدى ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتى.

«University Medical Center» كورپوراتيۆتىك قورىنىڭ انا مەن بالا ۇلتتىق عىلىمي ورتالىعىندا 4 جانە 8 -قىركۇيەك ارالىعىندا «بالالاردىڭ 4-دارەجەلى تىرتىق كومەيىنىڭ تارىلۋىن حيرۋرگيالىق جولمەن ەمدەۋ» تاقىرىبىندا شەبەرلىك ساباعى وتۋدە. قازاقستاندىق دارىگەرلەرگە يننوۆاتسيالىق تەحنولوگيالاردى ەنگىزۋدەگى عىلىمي- پراكتيكالىق تاجىريبە ۇيرەتىلۋدە.

انا مەن بالا ۇلتتىق عىلىمي ورتالىعىنىڭ دارىگەرلەرى يتاليا پروفەسسورى روبەرتو پۋكسەدۋمەن بىرلەسىپ كومەيدىڭ تارىلۋىنا، سوزىلمالى سيالوادەنيتكە، ليمفالىق جۇيەنىڭ تۋا بىتكەن اقاۋىنا، ليمفانگيوماعا شالدىققان، شەتەلدە ەمدەلۋگە مۇقتاج پاتسيەنتتەرگە وپەراتسيا جاسايدى.

شەبەرلىك ساباعى بارىسىندا وتاندىق حيرۋرگتار قازاقستاندا وسى پاتولوگياعا شالدىققان بالالاردى ەمدەۋگە مۇمكىندىك بەرەتىن جاڭا تەحنولوگيالاردى مەڭگەرەتىن بولادى.

بۇرىن وسىنداي دياگنوزى بار بالالاردى شەتەلگە ەمدەلۋگە جىبەرەتىن، وندا مۇنداي وپەراتسيالاردىڭ قۇنى 25 مىڭ ەۋروعا دەيىن جەتەدى. قازاقستاندا ونى تەگىن جاسايدى.