ۇلكەن «اعاتايلار» تەندەرمەن ۇزاق ۋاقىت وينايتىندىقتان، زاردابىن بالالار شەگۋدە - ۇكىمەت باسشىسى

استانا. قازاقپارات - ۇكىمەتتىڭ بۇگىنگى وتىرىسىندا ق ر پرەمەر- ءمينيسترى باقىتجان ساعىنتايەۆ مەملەكەتتىك تاپسىرىس اياسىندا مەكتەپتەردى ۋاقىتىندا پايدالانۋعا بەرۋ ماسەلەسىنە باسا نازار اۋداردى.

سەبەبى «اعاتايلار» تەندەرمەن ۇزاق ويناپ جۇرەتىندىكتەن بالالار مەكتەپكە ۋاقىتىندا بارا الماي جۇرەدى» دەگەن پىكىر ءبىلدىردى ۇكىمەت باسشىسى، دەپ حابارلايدى قازاقپارات ءتىلشىسى.

«وسى ماسەلەنى ىلعي تالقىلايمىز. الايدا جاعدايىمىز سول قالپى، وزگەرمەي كەلەدى. اقشا يگەرىلمەيدى، تەندەرلەردى كەش وتكىزەدى. سوندا قالاي؟ ۇلكەن اعاتايلارىمىز تەندەر ويناپ جۇرەتىندىكتەن بالالار زارداپ شەگىپ وتىرادى. وسىنى تۇبەگەيلى شەشۋ كەرەك. بالالار جاڭا مەكتەپكە بارعىسى كەلەدى. وعان قوسا، پرەزيدەنتتىڭ ناقتى تاپسىرماسى بار. ۇلتتىق قوردان اقشا ءبولىنىپ جاتىر. سونىڭ بارلىعى «نۇرلى جول» باعدارلاماسى اياسىندا ايماقتارعا تاراتىلادى. ءبىز بولساق، جاڭا وقۋ جىلى باستالسا دا، تەندەر ويناپ ءجۇرمىز»، - دەدى باقىتجان ساعىنتايەۆ.

وسى ورايدا ۇكىمەت باسشىسى ءوز ورىنباسارلارىنا قازىرگى جۇيەنى تولىعىمەن وزگەرتۋدى تاپسىردى.