قىتايداعى قازاقتار ۇلتتىق سپورتتىڭ شالما سالۋ مەن قامشىگەرلىك ءتۇرىن جاڭعىرتۋدا

استانا. قازاقپارات - سوڭعى جىلدارى قىتايداعى قانداستارىمىز ۇلتتىق سپورتتى دامىتۋعا كۇش سالىپ كەلەدى.

ات سپورتى بويىنشا كوكپار، اۋدارىسپاق، تەڭگە ءىلۋ، قىز قۋۋدان جاقسى ناتيجەلەرگە قول جەتكىزىپ جۇرگەن ىلە قازاق وبلىسىنىڭ سپورتشىلارى ۇمىت بولعان ۇلتتىق سپورت ونەرىن جاڭعىرتۋدى دا قولعا الىپتى.

Baq.kz ءتىلشىسى شالما سالۋ مەن قامشىگەرلىكتىڭ جارىسىن وتكىزگەن قانداسىمىزبەن تىلدەستى.

نىلقى اۋداندىق ۇلتتىق سپورت قاۋىمداستىعىنىڭ باپكەرى سابىرجان زيناتقان ۇلىنىڭ ايتۋىنشا كوكپار بويىنشا ىلە قازاق وبلىسىنىڭ سپورتشىلارى ەشكىمگە دەس بەرمەي كەلە جاتقان كورىنەدى.

«ات سپورتى شىڭجاڭدا قازاق، ۇيعىر جانە قىرعىز ۇلتتارىن نەگىز ەتىپ وتەدى. ۇكىمەتتىڭ قولداۋىمەن جاقسى دامىپ كەلە جاتىر. شىڭجاڭ كولەمىندە از ۇلتتاردىڭ ءداستۇرلى سپورتى دەپ اتالىپ 4 جىلدا ءبىر رەت وتەدى. ىلە قازاق وبلىسىنىڭ كوكپارشىلارى 1994 -جىلدان بەرى بىرىنشىلىكتى بەرمەي كەلە جاتىر. ىلەدەگى 8 اۋدان 2 قالانىڭ بارلىعىندا كوكپار كومانداسى بار. ءبىر اۋداننىڭ وزىندە 15 تەن اسا كوكپار كومانداسى بولىپ، جالپى وبلىستاعى كوكپار كوماندالارىنىڭ سانى 150-دەن اسادى»، - دەيدى سابىرجان زيناتقان ۇلى.

وسى وبلىسقا قاراستى قورعاس اۋدانىندا 2016 -جىلى «قازانات» اتتى كوكپار قۇراما كومانداسى جاساقتالىپ، وعان ەرمەك توقتاربەك پەن سەرىك ۇسەن ۇلى جەتەكشىلىك ەتىپ كەلەدى. جاقىندا استانادا تۇڭعىش رەت وتكەن كوكپاردان الەم چەمپيوتانىندا ونەر كورسەتكەن دە «قازاناتتىڭ» جىگىتتەرى بولىپ شىقتى. 11 مەملەكەتتىڭ كوكپارشىلارى ايقاسقان الامان دودادا قانداستارىمىزدان قۇرالعان كوماندا ءتورتىنشى ورىننان كورىندى.

«استانادا وتكەن كوكپاردان I الەم چەمپيوناتىنا قۇراما كوماندامىز كەلىپ قاتىسىپ، ءتورتىنشى ورىنعا يە بولدى. اۋدارىسپاقتان 1 كۇمىس، 1 قولا الدىق»، - دەيدى سابىرجان زيناتقان ۇلى.

سپورتشى قانداسىمىز تەك باپكەرلىكپەن اينالىسىپ قانا قويماي، ۇلتتىق سپورتتان جارىستار وتكىزۋدى دە قولعا الىپ ءجۇرىپتى. ول بيىل ۇمىت بولعان قامشىگەرلىك پەن شالما سالۋدان جارىس وتكىزگەنىن ايتتى.

«مەنىڭ كوكپاردان 10 كوماندام بار. ءبىر كوماندادا 12 كوكپارشىدان وينايدى. ءبىز بايىرعى ۇلتتىق ويىنداردى جاڭعىرتۋدى قولعا الىپ وتىرمىز. كوكتەمدە كوكپار، قىز قۋۋ، اۋدارىسپاق، تەڭگەىلۋدەن بولەك شالما سالۋ مەن قامشىگەرلىك بويىنشا جارىس وتكىزدىم. الداعى ۋاقىتتا بۇل جارىستى ءداستۇرلى وتكىزىپ تۇرامىز دەپ جوسپارلاپ وتىرمىز. بۇدان وزگە دە ۇمىت بولعان ۇلتتىق ويىندار جارىستىڭ تۇرىنە قوسىلا بەرەرى ءسوزسىز»، - دەيدى باپكەر.

ءبىز ۇلتتىق سپورت جاناشىرىنان قامشىگەرلىك پەن شالما سالۋدىڭ ەرەكشەلىگى جايلى سۇراپ بىلدىك. ونىڭ ايتۋىنشا، سپورتتىڭ بۇل ەكى ءتۇرى دە شەبەرلىك پەن كۇشتى بىردەي تالاپ ەتەدى ەكەن.

«اساۋعا كوزدەپ شالما تاستاۋ شەبەرلىكتى تالاپ ەتسە، ونى تاقىمعا سالىپ توقتاتۋ ۇلكەن كۇشتى قاجەت ەتەدى. قازىرگى كەزدە شالماعا قولداناتىن ارقاننىڭ دا ءتۇرى كوپ. ءبىز اتا- بابامىز قولدانعان قايىس ارقان مەن قىل ارقاندى قولداندىق. ال قامشىگەرلىكتە دە سپورتشىنىڭ بىلەك كۇشى مەن قىراعىلىعى بىردەي ماڭىزدى. وندا قامشىگەرلەر كەرىلگەن سيىر تەرىسىن قامشىمەن قاققا ءبولۋى كەرەك»، - دەيدى ول.

 

مايگۇل سۇلتان