استانادا جۋىردا «سەرگەك» كامەرالارىنىڭ دەرەكتەرى بويىنشا جازالاۋ ىسكە قوسىلادى
ەڭ الدىمەن، بۇل جۇيە جىلدامدىق رەجيمىن اسىرعانى ءۇشىن، قوعامدىق كولىكتىڭ جولاعىمەن جۇرگەنى ءۇشىن (Bus Lane اۆتوبۋستىق جولىمەن ءجۇرۋ) جانە ستوپ- سىزىعىن كەسىپ ءوتۋ سياقتى بۇزۋشىلىقتاردى قاراستىراتىن بولادى، دەپ حابارلايدى قالا اكىمدىگىنىڭ باسپا ءسوز قىزمەتى.
2017 -جىلدىڭ سوڭىنا دەيىن استانا قالاسىنىڭ اۋماعىندا كوشە قيىلىستارى مەن قالانىڭ سىزىقتىق ايماقتارىندا، سونىمەن قاتار ويىن- ساۋىق ورتالىقتارى، تەاتر، سپورت الاڭدارى، مۋزەي سياقتى كوپشىلىك قاۋىم جينالاتىن جەرلەردە 13000 سۋرەت جانە بەينە جازۋ كامەرالارى قولدانىسقا ەنەتىنى جايلى ەسكە سالىپ وتەيىك. سۋرەت جانە بەينەباقىلاۋدىڭ جاڭا جۇيەسىنە 3 مىڭعا جۋىق جالپى بەينەباقىلاۋ جۇيەلەرى ەنگىزىلگەن. بۇل كامەرالار تاۋلىك بويى ۇزدىكسىز جۇمىس ىستەپ، ولاردان تۇسىرىلگەن بەينە ماتەريالدار تىرشىلىكتى كەشەندى قامتاماسىز ەتۋ جۇيەسى مەن (ت ك ق ج) مەن استانا قالاسى ءى ءى د جەدەل باسقارۋ ورتالىعى (ج ب و) كىرەتىن احۋالدىق ورتالىق باقىلاۋىنا الىنۋ جانە وڭدەلۋ ءۇشىن جىبەرىلەدى.
ودان بولەك، قوسىمشا 10000 كامەرا ءدال سول ۋاقىتتاعى اۆتوكولىكتەردىڭ نومىرلىك بەلگىلەرىن، جىلدامدىق رەجيمدەرىن، قوعامدىق كولىكتىڭ جولاعىمەن جۇرگەنىن جانە ستوپ- سىزىعىن كەسىپ ءوتۋ جاعدايلارىن جازىپ الاتىن بولادى: 6000 كامەرا 400 كوشە قيىلىستارىندا جانە قالانىڭ 300 سىزىقتىق جەر تەلىمدەرىندە؛ 4000 كامەرا ويىن-ساۋىق ورتالىعى، تەاتر، سپورت الاڭدارى سياقتى كوپشىلىك قاۋىم جينالاتىن ورىنداردا ورنالاساتىن بولادى.
سۋرەت جانە بەينە جازۋ كامەرالارى ورناتىلاتىن ورىندار اكىمشىلىك پوليتسيا باسقارماسى (ءا پ ب) جانە جەرگىلىكتى پوليتسيا قىزمەتىنىڭ (ج پ ق) قىزمەتكەرلەرى بىرلەسە وتىرىپ زەرتتەلگەن. اپاتتىلىق جاعدايى مەن جول-كولىك وقيعالارىنىڭ سانى بويىنشا جاسالعان تالداۋدى ەسكەرە وتىرىپ، قازىرگى تاڭدا سۋرەت جانە بەينە جازۋ كامەرالارىن ورناتۋ جۇمىستارى جۇرگىزىلۋدە.
جاڭا وقۋ جىلىنىڭ باستالۋىنا وراي، استانا اكىمدىگى جۇمىستارىنىڭ كوپشىلىك بولىگى بالالاردىڭ قاۋىپسىزدىگىنە باعىتتالعان: وقۋ مەكەمەلەرى مەن بالاباقشالارعا جاقىن جەردەگى كولىك قوزعالىسىنىڭ جىلدامدىعى 40 ك م/ساع دەيىن شەكتەلگەن، جىلدامدىقتى شەكتەۋ بەلگىلەرى ورناتىلعان، سايكەس جول بەلگىلەرى سىزىلعان. بۇل جەر تەلىمدەرى سۋرەت جانە بەينە جازۋ جۇيەلەرىنىڭ نازارىنا ەرەكشە الىنعان.
ەسكە سالايىق، ج ج ە- ءنىڭ سۋرەت جانە بەينە جازۋ جۇيەلەرى استانادا العاش رەت 2015 -جىلدىڭ اقپان ايىندا VOCORD اپپاراتتار كەشەنى مەن Red Speed جىلدامدىق ولشەۋىشتەرىن قالانىڭ 11 كوشە قيىلىستارىندا ورنالاستىرۋمەن ىسكە قوسىلعان. ول «قالانىڭ زياتكەرلىك كوشە قيىلىستارى» دەگەن اتاۋعا يە بولدى. 2016 -جىلدىڭ قاڭتار- جەلتوقسان ايلارىندا 21 VOCORD كامەرالارى مەن 83 Red Speed جىلدامدىق ولشەۋىشتەرىنىڭ جۇمىسىنىڭ ناتيجەسىندە استانا قالاسىندا 66410 ججە بۇزۋشىلىقتارى مەن 51493 ۇيعارىمداردىڭ شىعارىلعانى تىركەلدى.
بۇگىنگى تاڭدا، 323 رەتتەلەتىن كوشە قيىلىستارى جۇمىس ىستەۋدە، ونىڭ 60 ى «استانا قالاسىندا سۋرەت جانە بەينە جازۋ اپپاراتتىق- باعدارلامالىق كەشەنىن قۇرۋ جانە قولدانىسقا بەرۋ» اتتى جوباسىنىڭ اياسىندا سۋرەت جانە بەينەكامەرالارىمەن جابدىقتالعان.
سونىمەن قاتار، قازىردىڭ وزىندە قالانىڭ 100 سىزىقتىق جەر تەلىمدەرىندە رادار كەشەندەرى تولىعىمەن جۇمىس ىستەۋدە. كەشەننىڭ تەستىلىك كەزەڭدەگى جۇمىسىنان الىنعان اقپاراتتار بويىنشا قۇقىق بۇزۋشىلىقتاردى تالداۋدان وتكىزۋ جۇمىستارى جۇرگىزىلدى. تالداۋ 2017 -جىلدىڭ تامىز ايىنىڭ وزىندە كەيبىر اۆتوكولىك يەلەرى 25 كە جاقىن ج ج ە بۇزۋشىلىقتارىن جاساعانىن كورسەتتى. 15 -قىركۇيەككە دەيىنگى ۇيعارىمداردى ازىرلەۋ ۇردىستەرى ۋاقىتشا بولماعانىنا قاراماستان، اتالعان مەرزىم ارالىعىندا بۇزۋشىلىق جاساعان جۇرگىزۋشىلەر ءى ءى د جەرگىلىكتى پوليتسيا قىزمەتى (ج پ ق) باقىلاۋىنا الىنادى.
استاناداعى سۋرەت جانە بەينە جازۋ كامەرالارىنىڭ ورنالاسۋ كارتاسى citycams.kz سايتىندا ورنالاستىرىلعان.
