تۇيەنىڭ زارىمەن ەمدەلگەن الماتىلىق جىگىت اياق استى قايتىس بولدى
مارقۇم مەديتسيناعا ەمەس، حالىق ەمىنە سەنىپ، ۋاقىتىلى دارىگەرلەرگە كورىنبەگەندىكتەن اۋرۋىن اسقىندىرىپ العان. اتالعان قايعىلى وقيعا جايلى مارقۇمنىڭ جارى ايتىپ بەردى.
«جولداسىم ءىشىنىڭ اۋىرىپ جۇرگەنىن العاش رەت ءساۋىر ايىندا ايتتى. سوسىن بارلىق جەرگە قان تالداۋىن وتكىزىپ، مامىر ايىندا عانا ىشەگىندە قاتەرلى ىسىكتىڭ بار ەكەنىن بىلدىك. دارىگەرلەر «قورقۋدىڭ قاجەتى جوق، التى كۋرستىق حيميالىق تەراپيا العان سوڭ اياعىنان تۇرىپ كەتەدى» دەدى.
جولداسىم تەك ەكى كۋرستى ءوتىپ، سوسىن تۇيەنىڭ زارىمەن ەمدەلدى. جارنامانى عالامتور جەلىسىنەن تاۋىپ، 10 كۇن بويى تۇيەنىڭ ءسۇتى مەن ءزارىن ءىشىپ، ءوزىن جاقسى سەزىنىپ جۇرگەن. الايدا، 25- تامىز كۇنى اناسىنىڭ ۇيىنە ءوزى كولىگىن ايداپ بارىپ، ءبىر ۇيىقتاپ تۇرعان سوڭ دەنساۋلىعى كۇرت قيىنداپ كەتتى. بەس كۇن توسەك تارتىپ اۋىرىپ، كوز جۇمدى»، - دەيدى مارقۇمنىڭ ايەلى.
اتالعان قايعىلى وقيعانى الماتىداعى قازاق ونكولوگيا جانە راديولوگيا عىلىمي-زەرتتەۋ ينستيتىنىڭ باسشىلارى دا راستادى. ايتۋلارىنشا، شالعايدا تۇراتىن كوپتەگەن ازامات اۋرۋى اسقىنعاندا كەلىپ «تۇيەنىڭ زارىمەن، سۇتىمەن ەمدەلدىم» دەگەندى ايتادى ەكەن.
«قازاقستاندا جىلىنا ورتا ەسەپپەن 39000 ادام ونكولوگيالىق اۋرۋعا شالدىقسا، سونىڭ تەڭ جارتىسى كوز جۇمادى. قايتىس بولعانداردىڭ باسىم كوپشىلىگى ءبىزدىڭ ينستيتۋتقا كەلىپ قارالعانعا دەيىن ءوز بەتىنشە حالىق ەمىن جاساپ، ەش ناتيجە بولماعاندارىن مويىندايدى. ولاردىڭ ءجيى قولداناتىن ادىستەرى: تۇيەنىڭ ءزارى، كەروسين، مايدى سپيرتپەن ارالاستىرىپ ءىشۋ سىندى ەم-دوم. ونكولوگيانىڭ كەيبىر تۇرلەرى جەڭىل بولىپ ەسەپتەدى.
ياعني، ول «وڭ ناتيجەلى» دەپ اتالادى. مۇنداي قاتەرلى ىسىككە شالدىققاندار وتە سيرەك جانە ولار تەز جازىلادى. وسىنداي ازاماتتار «حالىق ەمىن جاساپ جازىلىپ كەتتىم» دەپ ويلاپ، ەل-جۇرتقا جارنامالايدى. ال وعان سەنگەن ناۋقاستار دارىگەرگە كورىنۋدىڭ ورنىنا سول حالىق داۋاسىمەن ەمدەلۋدى ءجون ساناپ، سوڭى قايعىلى جاعدايمەن اياقتالىپ جاتادى»، - دەدى قازاق ونكولوگيا جانە راديولوگيا عزي ديرەكتورىنىڭ عىلىم جونىندەگى ورىنباسارى داۋرەن ءادىلباي.
عالىم: تۇيەنىڭ ءزارىن ساتۋشىلار - الاياقتار
ونكولوگيالىق اۋرۋلاردى زەرتتەۋگە 12 جىلىن جۇمساعان عالىم وسى ۋاقىتقا دەيىن حالىق ەمىنەن جازىلعان ءبىر ادامدى كەزدەستىرمەگەنىن العا تارتتى.
«عىلىمي تۇرعىدا دا، مەديتسيانادا دا ءوز بەتىمەن ەمدەلىپ جازىلعان ازامات تۋرالى ءتىپتى ەستىمەپپىن. ءبىزدىڭ ينستيتۋت جىل سايىن ونكولوگيالىق اۋرۋدى ەمدەۋدىڭ جاڭا ادىستەرىن ىزدەپ، ءتۇرلى جيىندار وتكىزەمىز. سول تۇيە زارىمەن ەمدەيتىن ورتالىق باسشىلارى نەگە بىزگە كەلىپ، وسى ينستيتۋتتا جاتقان ناۋقاستارعا وزدەرىنىڭ ادىستەرىن ۇسىنبايدى؟ سەبەبى ولار وزدەرىنىڭ الاياق ەكەنىن بىلەدى. مەديتسينا بويىنشا تۇيەنىڭ ءزارى ونكولوگيانى ەمدەيدى دەگەن دالەل جوق. مەنىڭ ويىمشا، قالالىق دەنساۋلىق باسقارمالارى ءاربىر وڭىردە اشىلىپ جاتقان وسىنداي جەكەمەنشىك ونكولوگيالىق ورتالىقتاردى تەكسەرىپ، ەمدەلۋشىلەرمەن تۇسىندىرمە جۇمىستارىن جاساۋ كەرەك. تاعى ءبىر ايتارى، ولار ادامداردى جاپپاي ەمدەۋ ءۇشىن ليتسەنزيانى قايدان الدى؟ زاڭدى قۇجاتى بولماسا قۇزىرلى ورگان نە قاراپ وتىر؟ وسى ماسەلەنى ەرتەرەك قولعا الۋ كەرەك»، - دەدى داۋرەن عالىم ۇلى.
ەستەرىڭىزگە سالا كەتسەك، وڭتۇستىك قازاقستان، باتىس قازاقستان مەن الماتى وبلىستارىندا تۇيە وسىرەتىن شارۋاشىلىقتار ارنايى ورتالىقتار اشىپ، قاتەرلى ىسىككە شالدىققان ازاماتتاردى تۇيە زارىمەن ءسۇتىن ارالاستىرىپ بەرىپ ەمدەپ جاتقانى جونىندە بۇرىندا جازعان بولاتىنبىز.
جانىنا شيپا ىزدەگەن ازاماتتار ءتىپتى، تۇيەنىڭ ءزارى ءۇشىن تاڭ سارىدەن كەزەككە تۇرىپ، ايلاپ ءىشىپ جاتقانىن شارۋشالىق باسشىلارى دا ماقتان ەتىپ ايتادى. ال، دارىگەرلەر بولسا ەلىمىزدە ونكولوگيالىق اۋرۋدىڭ بارلىعىن ەمدەۋ تەگىن ەكەنىن ەسكەرتتى.
