ەڭبەك نارىعىندا سۇرانىسقا يە ماماندىقتار قانداي؟
ال ديپلوم العان تۇلەكتەر جۇمىس ىزدەۋگە كىرىسىپ كەتتى.
سوعان وراي BNews.kz ەڭبەك نارىعىنا شولۋ جاساپ، ءقازىر قانداي ماماندىققا سۇرانىس كوپ، بولاشاقتا قانداي كاسىپتى تاڭداعان ءتيىمدى ەكەنىن نازارعا ۇسىنادى.
HeadHunter پورتالى مالىمەتىنە قاراعاندا سۇرانىس ەڭ كوپ سالا - ساۋدا-ساتتىق ەكەن. اسىرەسە، تۇتىنۋشىلارمەن تىكەلەي جۇمىس ىستەۋشى مەنەدجەرلەرگە ءزارۋ كومپانيالار كوپ. سونىمەن قاتار، تىكەلەي جانە بولشەكتەپ ساتۋمەن اينالىساتىن جۇمىس ورىندارىندا دا ماماندار تاپشى.
ەكىنشى ورىندا باسقارمالى ەسەپ، بۋحگالتەريا، كاسىپورىندارداعى قارجى ءبولىمى ەكەن. اسىرەسە، قاراپايىم بۋحگالتەرلەرگە سۇرانىس كوپ. سونىمەن قاتار، باستاپقى قۇجات اينالىمى جانە تولەمدەر مەن شوتتار ەسەبىن جۇرگىزۋشى مامان ىزدەۋشى مەكەمەلەر دە الدىڭعى ۇشتىكتە.
ءۇشىنشى ورىندا اكىمشىلىك باسقارۋ، ۇيىمداستىرۋ، ۇيلەستىرۋ جونىندەگى قىزمەتكەرلەر. ەڭ كوپ سۇرانىسقا يە ماماندىق - وفيس- مەنەدجەرلىك، ءىس- قاعازدار مەن قۇجات اينالىمى مامانى جانە جەكە كومەكشىلەرگە ءزارۋ باسشىلار جەتەرلىك ەكەن.
مامانعا ءزارۋ سالالاردىڭ ءبىرى - اقپاراتتىق تەحنولوگيا، ينتەرنەت، تەلەكوممۋنيكاتسيا. ينجەنەرلەر مەن تەلەكوممۋنيكاتسيا سالاسىنىڭ ماماندارىنا دا سۇرانىس كوپ.
قازاقستان بويىنشا جارناما، ماركەتينگ، PR (قوعاممەن بايلانىس) سالاسىنىڭ ماماندارىنا دا سۇرانىس جوعارى. ماماننان تارشىلىق كورىپ وتىرعان سالالاردىڭ ءبىرى - بانك، ينۆەستيتسيا، ليزينگ. بۇلار دا جاقسى ەسەپشىلەرگە ءزارۋ ەكەن. ودان بولەك نەسيە مەنەدجەرلەرى مەن كورپوراۆتيتى تۇتىنۋشىلارمەن جۇمىس ىستەيتىن مامانداردى ءجيى ىزدەيدى.
ەلىمىزدەگى وندىرىستىك سالادا دا مامان تاپشىلىعى بايقالادى. كاسىپورىنداردىڭ كوپشىلىگىندە ينجەنەرلەرگە سۇرانىس وتە جوعارى. اسىرەسە، تاماق ونەركاسىبى بىلىكتى مامانداردى ءجيى ىزدەيدى ەكەن. ماشينا قۇراستىرۋشىلار مەن مەتاللۋرگتەرگە مۇقتاج كاسىپورىندار دا جەتەرلىك.
جوبالاۋشىلار مەن ساۋلەتشىلەر دە جەتىسپەيدى. قۇرىلىس نىساندارىندارىنداعى ۇستالار مەن ينجەنەرلەردى، سۋ بەرۋ جانە كارىز جۇيەسىمەن جابدىقتاۋشىلاردى ىزدەيتىن حابارلاندىرۋلار دا جەتەرلىك. كولىك جانە لوگيستيكا سالاسىندا ماماندار جەتىسپەيدى. ەكى قولعا ءبىر كۇرەك تاپپاي جۇرگەندەر ءۇشىن بۇدان بولەك تۋريزم، قوناق ءۇي ءىسى، مەديتسينا، فارماتسيەۆتيكا، ماسس- مەديا مەن ءىس- شارالاردى ۇيىمداستىرۋ، قىزمەت كورسەتۋ سالالارىندا دا بوس ورىندار جەتىپ ارتىلادى، دەلىنگەن RedPoint Kazakhstan اگەنتتىگىنىڭ شولۋىندا.
