ءجۇز ەلدى ارالاپ شىققان ەكسپو تۋىن استاناعا ۋاقىتىندا جەتكىزەمىن - بايكەر پەترۋحين
بايكەر ەكسپو تۋىن استاناعا قايتسەم دە ۋاقىتىندا جەتكىزەم دەپ وتىر.
«مەن بۇعان دەيىن دە اپاتقا ۇشىراعام. ءبىراق وندايدى جارنامالاۋدى بىلمەيمىن. حاكاسيانىڭ جول پوليتسياسى سونداي جاڭالىقتاردى تاراتقاندى جاقسى كورەدى ەكەن. سوندىقتان، ەلگە جايىپ جىبەرگەن. ارتىنان ماعان اۋرۋحاناعا پوليتسيا قىزمەتكەرلەرى كەلىپ كەشىرىم سۇرادى. ءقازىر ءوز- وزىمە كەلىپ قالدىم. اقىرىنداپ ءجۇرىپ ءجۇرمىن. موينىما زاقىم كەلدى دەگەن كۇدىك بولدى. الايدا دارىگەرلەر ول كۇدىگىمدى سەيىلتتى. وسىنداي اپاتتا تەك قابىرعامنىڭ سىنعانى تاڭقالارلىق جاعداي بولدى دەيدى ولار. وتانداستارىما كورسەتكەن قولداۋى ءۇشىن ۇلكەن العىس بىلدىرەمىن. استاناعا ءوز موتوتسيكلىممەن بارامىن. ەكسپو تۋىن مەملەكەت باسشىسىنا تاپسىرامىن»، - دەدى ول.
ەگەر حاكاسيادا اپات بولماسا بايكەر ومسك، چەليابينسك، قورعان قالالارىندا ەكسپو تۋىنا اۆتوگراف جيناپ كەلەتىن ەدى.
ودان سوڭ استاناداعى جابىلۋ سالتاناتىنا قاتىسار ەدى.
ال 100 ەلدى ارالاپ كەلگەن تۋ استاناداعى مۋزەيلەردىڭ بىرىنەن ورىن تەبەر ەدى.
قازاقستاندىق بايكەر دميتريي پەترۋحين قازاقستاندى تانىتۋ ماقساتىندا الەمدى موتوتسيكلىمەن ساياحاتتاپ شىققان.
2004-2014 -جىل ارالىعىندا قازاقستاننىڭ كوك بايراعىن 150 مەملەكەتتى ارالاتىپ، 250 مىڭ شاقىرىمدى باعىندىردى.
وسى جولعى ساياحاتى 2012 -جىلدان باستالعان. ەكسپوعا ارنالعان ساياحاتىن بايكەر ادەيىلەپ كاريب باسسەينىندەگى ەلدەردەن باستاعان.
اتالعان ەلدەردىڭ لاۋازىمدى تۇلعالارىنا استانا ءۇشىن داۋىس بەرۋگە شاقىرعان.
«باگام ارالدارىنىڭ سىرتقى ىستەر ءمينيسترى مەنىمەن كەزدەسۋدەن سوڭ قازاقستان تۋرالى ءبىراز ماعلۇمات الىپ، استاناعا داۋىس بەرەتىندەرىن ايتقان. سايلاۋدان سوڭ كاريب باسسەينىندەگى 15 مەملەكەتتىڭ بارلىعى داۋسىن استاناعا بەرگەنى انىقتالدى. مەن شاقىرعان بيزنەسمەندەر مەن لاۋازىمدى تۇلعالاردى ەكسپو- نىڭ اشىلۋ سالتاناتىندا كوردىم. ولارعا ءبىزدىڭ استانا قاتتى ۇناعان»، - دەدى ساياحاتشى.
ەكسپو رەسمي اشىلعان سوڭ دا د. پەترۋحين كورشىلەس ەلدەردى ارالاپ ماڭىزدى شاراعا ادام شاقىرۋمەن اينالىستى.
24 -تامىزدا حاكاسيادا بايكەر اپاتقا ۇشىراپ قابىرعا سىنىعىمەن اۋرۋحاناعا تۇسكەن بولاتىن.
