قازاق كۇرەسىنەن «الەم بارىسىنا» قاتىساتىن بالۋاندار بەلگىلى بولدى
ەكسپو حالىقارالىق مامانداندىرىلعان كورمەسى اياسىندا وتكەلى وتىرعان دوداعا بالۋاندار 22- تامىزدان باستاپ، استانادا وقۋ-جاتتىعۋ جيىنىن وتكىزگەن بولاتىن.
جيىن ناتيجەسى بويىنشا باس جاتتىقتىرۋشى ەرلان ەستەك باستاعان باسپكەرلىك كەڭەس «الەم بارىسىندا» ەل نامىسىن قورعايتىن ءتورت بالۋاندى تاڭداپ الدى.
ولار: ءتورت دۇركىن الەم چەمپيونى جانە قازاقستان بارىسى جەڭىمپازى ايبەك نۇعىماروۆ، الەم چەمپيونى جانە قازاقستان بارىسى ءتۋرنيرىنىڭ جەڭىمپازى مۇحيت تۇرسىنوۆ، جاس تا بولسا، بولاشاعىنان زور ءۇمىت كۇتتىرەتىن ايبات سەيتەن جانە داۋرەن نۇرالينوۆ.
سونىمەن قاتار، بيىلعى «قازاقستان بارىسى-2017» ءتۋرنيرىنىڭ جەڭىمپازى ەلامان ەرعاليەۆ پەن تانىمال تۇيە بالۋان ەرجان شىنكەيەۆ جوعارىدا اتى اتالعان بالۋاندار جاتتىعۋ بارىسىندا جاراقات الىپ قالىپ جاتسا، ورىنىنا بوز كىلەمگە شىقپاق.
ايتا كەتەيىك، وسىمەن ەكىنشى مارتە وتكەلى وتىرعان دوداعا الەمنىڭ 40 ەلىنەن ەڭ مىقتى دەگەن ءبىر-ءبىر بالۋان قاتىسادى.
قازاقستان جارىستى ۇيىمداستىرۋشى ەل رەتىندە ءتورت بالۋان قاتىستىرۋعا مۇمكىندىك الىپ وتىر.
بىرىنشىلىكتىڭ جالپى جۇلدە قورى 30 ميلليون تەڭگە. ونىڭ ىشىندە 15 ميلليونى جەڭىمپازعا تيەسىلى. ءداستۇر بويىنشا، التىن، كۇمىس جانە قولا بەلبەۋلەر دە قاراستىرىلعان.
جانكۇيەرلەر دە جۇلدەسىز قالمايدى. كورەرمەندەر اراسىندا Renault Logan اۆتوكولىگى ويناتىلادى.
ەستەرىڭىزگە سالا كەتەيىك، ءبىرىنشى رەت «الەم بارىسى» 2014-جىلى ءوتتى. وعان 35 ەلدىڭ اپايتوس بالۋاندارى قاتىستى.
جارىس باعدارلاماسى:
10:00 ىرىكتەۋ بەلدەسۋلەرى
13:00 اشىلۋ سالتاناتى
18:00 اقتىق بەلدەسۋلەر
18:30 جەڭىمپاز جانە جۇلدەگەرلەردى ماراپاتتاۋ ءراسىمى.
اۆتور: كۇنسۇلتان وتارباي
