پرەزيدەنت ءتيىمسىز كاسىپورىندارعا مەملەكەتتىك قولداۋدى دوعارۋ كەرەكتىگىن ايتتى
«جولداۋدا قارجىنى ناقتى ەكونوميكاعا دەيىن جەتكىزۋ ماقساتى قويىلدى. كۆازيمەملەكەتتىك سەكتوردا سىرتقى ءارى ىشكى زايمدار ءۇشىن تىڭعىلىقتى مونيتورينگ پەن قاداعالاۋ قاجەت. بىزدە ەكى قارىز بار، بىرىنشىدەن، ياعني مەملەكەت جاۋاپكەرشىلىگىندەگى ۇلەسى تومەن مەملەكەتتىك قارىز. ال كۆازيمەملەكەتتىك سەكتوردىڭ قارىزى ەكىنشى ماسەلە. وسى ورايدا بۇل بىزگە قاتىستى ەمەس دەپ پايىمداۋدىڭ رەتى جوق. ۋاقىت وتە كەلە بۇل ماسەلە بىزگە قاتىستى بولۋى مۇمكىن. سوندىقتان وسى باعىتتاعى شارالارمەن قازىر اينالىسۋ كەرەك»، - دەدى ەلباسى پارلامەنت پالاتالارىنىڭ بىرلەسكەن وتىرىسىندا.
بۇل تۇرعىدا پرەزيدەنت اۋىل شارۋاشىلىعى سالاسىنداعى جاعدايعا توقتالدى. «قارىزعا الا بەرگەندىكتەن، قازىر تىعىرىققا تىرەلدى. نە ىستەۋ كەرەك؟ بانكروتقا شىعارۋ قاجەت. قورقاتىن تۇك تە جوق. امەريكادا ءبىر ميلليون فەرمەر بانكروت بولسا، ءبىر ميلليونى قۇرىلادى. جاقىندا استانا فورۋمىندا وسى تۇرعىدا مىسال كەلتىرگەن بولاتىن. ماسەلەن، ۆاشينگتوندا 1500 مەيرامحانا بانكروتقا تاپ بولىپ، قايتادان قۇرىلادى»، - دەدى ن. نازاربايەۆ.
مەملەكەت باسشىسى وسىنداي جاعداي ەكىنشى دەڭگەيلى بانكتەرگە دە قاتىستى ەكەنىن، ولاردى تاعى دا مەملەكەت قارجىلاندىرۋعا العانىن اتاپ ءوتتى. «مۇنى توقتاتۋ كەرەك، ەڭ دۇرىسى بۇل بانكتەردىڭ جۇمىسىن توقتاتىپ، ولارعا تولەگەندى دوعارعان ءجون. ءوزى جۇمىس ىستەپ، پايدا تاۋىپ وتىرعان جەكەمەنشىكتەردى ءبىز نە ءۇشىن سۋبسيديالاۋعا ءتيىسپىز؟ قازىر باسقا جۇيە. بارلىعى دا ەگەر سەن جەكەمەنشىك بولساڭ، تولىقتاي ءوزىڭ جاۋاپ بەرەتىندىگىن ءتۇسىنۋ قاجەت. بانكروت پا - وندا بانكروت، ءتيىمدى جۇمىس ىستەي المايسىڭ دەگەن ءسوز. ءدال وسى جولعا تۇسەيىك. ويتكەنى بىزدە باسقا جول جوق»، - دەدى نۇرسۇلتان نازاربايەۆ.
اۆتور: رۋسلان عابباسوۆ
