13:52, 04 - قىركۇيەك 2017 | GMT +5
قايرات ءابدىراحمانوۆ ميانماداعى وقيعاعا قاتىستى پىكىر ءبىلدىردى
استانا. قازاقپارات - قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ ميانمادا ورىن العان وقيعاعا بايلانىستى ءوز پىكىرىن ءبىلدىردى، دەپ حابارلايدى قازاقپارات.
«ميانمادا مۇسىلمان قاۋىمىنىڭ جاعدايىنا بايلانىستى الاڭداۋشىلىق بىلدىرەمىز. بۇل جەردەگى يسلامعا كەرى تەندەنسيانى بايقاپ وتىرمىز. وسىعان بايلانىستى يسلام ىنتىماقتاستىعى ۇيىمى بايلانىس توبى سەكىلدى قۇرىلىمى ميانماداعى احۋالدى رەتتەۋگە بەلسەندى تارتىلعانى وتە ماڭىزدى. سونىمەن قاتار، ۇيىم وكىلدەرى بۇل ەلدىڭ بيلىك تاراپىمەن ديالوگتا بولعانى وزەكتى»، - دەدى مينيستر تىلشىلەرگە بەرگەن سۇحباتىندا.
سونىمەن قاتار ق ر پارلامەنتى سەناتىنىڭ ءتوراعاسى قاسىم- جومارت توقايەۆ تا ميانماداعى وقيعاعا بايلانىستى ءوز پىكىرىن ءبىلدىردى. «بۇۇ تاراپى ميانماداعى وقيعالارعا قاتىستى ءوزىنىڭ ۇستانىمىن جاريالاۋى ءتيىس. سەبەبى جازىقسىز كوپتەگەن مۇسىلماندار قاتىگەزدىك رەپرەسسياسىنىڭ قۇربانىنا اينالۋدا»، - دەپ جازدى توقايەۆ Twitter- دەگى اككاۋنتىندا.
اۆتور: رۋسلان عابباسوۆ
