ق ر پرەزيدەنتى جۇماعاليەۆ پەن دوسايەۆتىڭ ۇكىمەتكە ورالۋ سەبەبىن ايتتى
«الەمدە ءالى كۇنگە دەيىن تىنىشسىزدىق ورىن الۋدا. دەرجاۆالار اراسىنداعى ديالوگ سانكسيالىق ساياساتپەن بىرگە جۇرۋدە. بۇل قازاقستانعا دا اسەرىن تيگىزبەي قويمايدى. وڭىرلىك جانجالدار دا تىنىشتالار ەمەس. دەسترۋكتيۆتى يدەولوگيا ءوزىنىڭ ىقپالىن كەڭەيتۋدى جالعاستىرۋدا. بۇعان قوسا، جاڭا مۇمكىندىكتەر بەرۋمەن قاتار تاۋەكەلدەرى دە بار جاپپاي سيفرلاندىرۋ قارقىن الىپ كەلەدى. مۇنىڭ بارلىعى دا جاڭعىرۋ ساعاتىندا ەسەپتىڭ جىلدارمەن ەمەس مينۋتتارمەن ءجۇرىپ جاتقاندىعىن بىلدىرەدى. قازاقستان بۇل باعىتتاردىڭ بارلىعىندا دا مىندەتتى تۇردە ۇلگەرۋى ءتيىس. ءدال وسى جايت ۇكىمەت پوزيتسياسىن ەكى جاڭا ورىنباسارمەن نىعايتۋعا ماجبۇرلەدى»، - دەدى ەلباسى.
مەملەكەت باسشىسىنىڭ ايتۋىنشا، اسقار جۇماعاليەۆتىڭ ۇكىمەت باسشىسىنىڭ ورىنباسارى بولىپ تاعايىندالۋى ەلىمىزدە «سيفرلى قازاقستان» اتتى اۋقىمدى مەملەكەتتىك باعدارلامانىڭ جۇزەگە اسىرىلا باستاۋىمەن بايلانىستى بولدى.
«ءبىز كوشۋگە ءتيىستى «سيفرلى قازاقستان» باعدارلاماسىنىڭ ءمانى وتە زور. مۇنىمەن بارلىق ەلدەر اينالىسۋدا. بۇل دامۋدىڭ بولاشاعى، ەڭبەك ونىمدىلىگى، جاڭا تەحنولوگيالار جانە ونىمەن ناقتى ادام اينالىسۋى ءتيىس ءارى كۇن سايىن ءبىزدىڭ الدىمىزدا ۇكىمەت اتىنان ەسەپ بەرۋى قاجەت. بۇل پوزيتسياعا ءبىلىمى بويىنشا IT مامانى سانالاتىن اسقار جۇماعاليەۆتى تاعايىندادىم. ول مەن تاعايىنداعان لاۋازىمداردا ءوزىن جاقسى مەنەدجەر رەتىندە كورسەتتى. وعان ءدال وسى ۋچاسكە تاپسىرىلادى. ونىڭ ءاربىر مينيسترلىكتە ءوز وكىلى بولۋى ءتيىس. ورىنباسارلاردىڭ ءبىرى اينالىسۋى قاجەت. سيفرلاندىرۋ ەڭ الىمەن ۇلتتىق كومپانيالارعا، ءوندىرىس پەن ونەركاسىپكە كەرەك»، - دەدى نۇرسۇلتان نازاربايەۆ.
سونىمەن قاتار مەملەكەت باسشىسى ۇكىمەتكە ەربولات دوسايەۆتىڭ قايتا ورالۋ سەبەبىن دە ءتۇسىندىردى. ەستە بولسا، ول وتكەن جىلدىڭ مامىرىندا ۇلتتىق ەكونوميكا ءمينيسترى لاۋازىمىنان وتستاۆكاعا كەتكەن بولاتىن.
«ەكونوميكانىڭ ماكروەكونوميكالىق بولىگىن كۇشەيتۋ ەربولات دوسايەۆقا جۇكتەلەدى. ول ناعىز ازامات، دجەنتەلمەن رەتىندە وكىلەتتىگىن ءوز ەركىمەن توقتاتقان جاعداي بولدى. ءبىراق، بۇل ونىڭ كىناسى ەمەس. ونىڭ تاجىريبەسى مەن ءبىلىمى، جۇمىس تاعلىمداماسى ەلىمىزدىڭ ەكونوميكا، قارجى، ماكروەكونوميكاسىن، سونىمەن قاتار بيۋدجەتىمىزدىڭ جارتىسىن تۇتىناتىن الەۋمەتتىك بلوگىن ءوز قولىندا ۇستاۋعا مۇمكىندىك بەرەدى دەپ ءۇمىت ارتۋعا بولادى»، - دەدى ق ر پرەزيدەنتى.