اقتوبەلىك تۇرعىن ەكى جىلدان بەرى ساياجايدا شىنىدان ءۇي سالىپ جاتىر - فوتو
ەنى مەن ۇزىندىعى 6 مەتر بولاتىن قۇرىلىسقا قانشا شىنى كەتكەنى بەلگىسىز، دەپ حابارلايدى قازاقپارات ءتىلشىسى.
اقتوبەدەگى ساياجايلاردىڭ بىرىندە شىنىدان گاراج بەن وعان جاپسارلاس ورنالاسقان ءۇي سالىنىپ جاتىر. ساياجاي يەسى ءوزى تۋرالى اقپاراتتى جاريالاۋعا قارسى بولعانىمەن، ءمان- جايدى قۇرىلىس جۇمىستارىن جۇرگىزگەن ۆولوديا ەرۋتين ايتىپ بەردى.
«قۇرىلىس جۇمىستارىنىڭ باستالعانىنا ەكى جىل ۋاقىت بولدى. بۇل جەردە شىنى قوسىمشا قۇرىلىس ماتەريالى قىزمەتىن اتقارادى. ءۇي قابىرعاسىن نەگىزى سەمەنت بەرىك ۇستاپ تۇر. شىنىمەن جۇمىس ىستەۋ قيىن. ءۇش قاپ شىنىنى تۇسكە دەيىن قالاۋعا بولادى. قابىرعانىڭ قيسىق بولىپ كەتپەۋىن قاداعالاۋ، سەمەنتپەن بەكىتۋ وڭاي شارۋا ەمەس. ءبىر قاپتا كەم دەگەندە 60 شىنى بار»، - دەدى قۇرىلىسشى ۆولوديا ەرۋتين.
قۇرىلىس جۇمىستارى كەزىندە بوس بوتەلكە سۇرىپتالماعان، تاڭدالماعان. قۇرىلىسقا ءبارى جارامدى، شىدامدى.
«گاراج بەن ءۇي جاپسارلاس ورنالاسقان. ءبىر بولمەلى ءۇي بولادى. قابىرعاداعى كوك ءتۇستى شىنى سول كۇيى قالادى، ال وزگەسى بالشىقپەن جابىلىپ، تەگىستەلەدى. قاسبەتى دە تسەمەنتتەلىپ، اكتەلەدى. سول كەزدە ءۇيدىڭ بوس شىنىدان جاسالعانى بايقالمايدى. مۇنداي جۇمىستاردى ءوزىم كورگەنىم جوق. وزگە وڭىرلەردە بار دەپ ەستىگەن ەدىم. قۇرىلىس جۇمىستارى كەزىندە بوتەلكەنى سانامادىم. ماسەلەن، ءبىر قابىرعاعا 3-4 مىڭ دانا بوتەلكە كەتۋى مۇمكىن»، - دەدى ۆولوديا ەرۋتين.
ايتا كەتەيىك، قازىرگى كەزدە ءۇي يەسى قۇرىلىس جۇمىستارىن اياقتاۋعا قاجەتتى بوس بوتەلكەنى جيناپ جاتىر.