اقتوبەدە ەسەت باتىر كەسەنەسىنىڭ جانىنا مونۋمەنت سالىنىپ جاتىر
كاسىپكەر «تۋعان جەرگە تاعزىم» اكسياسى اياسىندا قۇرىلىس جۇمىستارىنا 32 ميلليون تەڭگە ءبولدى، دەپ حابارلايدى قازاقپارات ءتىلشىسى.
اقتوبە وبلىسى، العا اۋدانى، بەستاماق اۋىلىنداعى ەسەت باتىر كەشەنى جاڭارتىلۋدا.
«تۋعان جەرگە تاعزىم» اكسياسى اياسىندا كاسىپكەر 32 ميلليون تەڭگە ءبولىپ، بيىكتىگى 11,5 مەتر بولاتىن مونۋمەنت سالىنىپ جاتىر. بىرنەشە اپتادان سوڭ قۇرىلىس جۇمىستارى اياقتالادى.
«ەسەت باتىر مونۋمەنتى مەن وزگە دە ىلەسپە جۇمىستاردى 10- قازانعا دەيىن ءبىتىرۋى قاجەت. ويتكەنى كۇزدە ءبىز قازاق قولباسشىسىنىڭ 350 جىلدىق مەرەيتويىن اتاپ ءوتۋدى جوسپارلاپ وتىرمىز»، - دەدى وبلىس اكىمى بەردىبەك ساپاربايەۆ.
ايتا كەتەيىك، ەسەت باتىر كەشەنىندە كەسەنە، مۇراجاي مەن ادامدارعا قىزمەت كورسەتەتىن اسحانا بار. كەسەنە 1992-جىلى سالىندى. بيىل وڭىردە باتىردىڭ 350 جىلدىعى وتەدى.
ەسەت باتىرعا ارناپ اقتوبە قالاسىندا ەسكەرتكىش ورناتۋ جوسپارلانعان. سونىمەن قاتار، وڭىردە ەسەت باتىر اتىنداعى سپورتتا دارىندى بالالارعا ارنالعان مەكتەپ- ينتەرناتتىڭ جاڭا عيماراتتارى ىسكە قوسىلادى. ءارى 22-23- قىركۇيەكتە «قاسيەتتى قازاقستان» جوباسى اياسىندا عالىمداردىڭ قاتىسۋىمەەن «XVII- XVIII ع. ع. قازاق-جوڭعار قاقتىعىستارىنداعى حالىق باتىرلارىنىڭ ءرولى: قازاق بىرەگەيلىگىنىڭ قالىپتاسۋى» اتتى رەسپۋبليكالىق عىلىمي-پراكتيكالىق كونفەرەنسيا وتەدى.