15:59, 01 - قىركۇيەك 2017 | GMT +6
اقتوبەدە تىكۇشاق قۇلادى
استانا. قازاقپارات - اقتوبە وبلىسى شالقار اۋدانى بەگىمبەت اۋىلىنان 6-7 شاقىرىم جەرگە 31- تامىز كۇنى ءتۇس شاماسىندا مي-8 تىكۇشاعى قۇلادى.
بۇل تۋرالى ازاتتىق تىلشىسىنە بەگىمبەت اۋىلدىق وكرۋگىنىڭ اكىمى ءالىبي ساتتىقوۆ حابارلادى.
اۋىل اكىمنىڭ سوزىنە قاراعاندا، اپاتقا ۇشىراعان تىكۇشاقتىڭ بورتىندا ەكيپاج مۇشەلەرىمەن قوسا ەسەپتەگەندە ءتورت ادام بولعان.
- بەگىمبەتتەگى دارىگەرلىك امبۋلاتوريادا ولارعا العاشقى كومەك كورسەتىلدى. ادامدار امان، - دەيدى ءالىبي ساتتىقوۆ.
اۋىل اكىمى تىكۇشاقتىڭ شالقار اۋدانىنداعى تاعى ءبىر ەلدى-مەكەن بوزويدان ۇشىپ شىققانىن عانا بىلەدى. كوپ ۇزاماي بەگىمبەتكە ۇشىپ جەتكەن تاعى ءبىر تىكۇشاق مي-8 بورتىندا بولعان ءتورت ادامدى وبلىس ورتالىعىنا الىپ كەتكەن.
اقتوبە وبلىستىق دەنساۋلىق ساقتاۋ دەپارتامەنتىنىڭ باسشىسى اسەت قاليەۆ وبلىس ورتالىعىنداعى مەديتسينا مەكەمەلەرىنە تىكۇشاق اپاتىنان زارداپ شەگۋشىلەردىڭ جەتكىزىلمەگەنىن ايتتى.