استانادا العاش رەت قۋىرشاقتار كارناۆالى وتەدى - فوتو
1-8 -قىركۇيەك ارالىعىندا قازاقستاننىڭ ەلورداسىندا دۇنيەجۇزىلىك قۋىرشاقتار كارناۆالى اياسىندا الەمنىڭ 47 مەملەكەتىنەن جينالعان قۋىرشاق تاەاترلارىنىڭ ۇجىمدارى ءوز ونەرلەرىن ورتاعا سالاتىن بولادى.
شارالار لەگى 1 -قىركۇيەكتە ەسىل وزەنىنىڭ جاعالاۋىندا كارناۆالعا قاتىسۋشىلاردىڭ شەرۋىنەن باستالادى. شەرۋ (ساعات 10:-دە كەنەسارى ەسكەرتكىشىنىڭ جانىندا جينالادى) قازاق دراما تەاترىنا دەيىن جالعاسادى. وسى جەردە حالىقارالىق كارناۆالدىڭ اشىلۋى جانە گالا- كونسەرت وتەدى.
كارناۆال اياسىندا ءبىرىنشى بولىپ استانا قالاسى اكىمدىگىنىڭ قۋىرشاق تەاترى «ەر توستىك» سپەكتاكلىن كوپشىلىك نازارىنا ۇسىنادى. مۇنىمەن قوسا، ەلوردالىق كورەرمەندەر رەسەي، بولگاريا، تۋنيس، پورتۋگاليا، رۋمىنيا، فرانتسيا، قىتاي، ۇلىبريتانيا، يران، ارگەنتينا، البانيا، فرانسيا، ەستونيا، اۆستراليا، برازيليا، تۇركيا، ۆەنگريا، جاپونيا، يسپانيا، يتاليا، وڭتۇستىك كورەيا، بەلگيا، سلوۆەنيا، گەرمانيا جانە ت. ب ەلدەردىڭ قۋىرشاق تەاترلارىنىڭ قويىلىمدارىن تاماشالايدى.
ءبىر اپتاعا سوزىلاتىن كارناۆالدىڭ باعدارلاماسى قانىق - كوشەدەگى شەرۋلەر، اشىق اسپان استىنداعى قويىلىمدار، سونداي- اق كۇن سايىن استانا قالاسىنىڭ قۋىرشاق تەاترىندا جانە ق. قۋانىشبايەۆ اتىنداعى قازاق دراما تەاترىندا سپەكتاكلدەر كورسەتىلەدى.
دۇنيەجۇزىلىك قۋىرشاقتار كارناۆالى («World Puppet Carnival) - بۇل استانا ءۇشىن ۇلكەن وقيعا جانە ول قۋىرشاق ويناتۋشى ارتيستەردىڭ ونەرىن دامىتۋعا ىنتا بەرەدى، مادەني تاجىريبە الماسۋعا جانە وزگە مەملەكەتتەرمەن ىنتىماقتاستىق ورناتۋعا جول اشادى.