استانادا «شارىقتاعان وڭتۇستىكتىڭ اندەرى- اي» اتتى كونسەرت ءوتتى - فوتو
«ەكسپو-2017» حالىقارالىق مامانداندىرىلعان كورمەسى اياسىندا ءوتىپ جاتقان كەشتە استانا تۇرعىندارى مەن قوناقتارىنا ش. قالداياقوۆ اتىنداعى وبلىستىق فيلارمونيانىڭ ونەرپازدارى ءان مەن بيدەن شاشۋ شاشتى.
«119 ونەر ادامىنان قۇرالعان ءبىزدىڭ ونەر ۇجىمى استانا قالاسىنداعى ەكسپو كورمەسىنە كەلدىك. 29 - تامىزدان باستاپ استانانىڭ ءار جەرلەرىندە كونسەرتتىك باعدارلامالار وتۋدە. بۇگىن مۇندا ەسترادالىق باعىتتاعى ۇلكەن كونسەرت بولىپ جاتىر. وزدەرىڭىز كورىپ وتىرسىزدار، حالىق ەرەكشە قارسى الىپ، ىستىق ىقىلاسىن ءبىلدىرىپ، تويدا جۇرگەندەي بىزبەن بىرگە بيلەپ، كوڭىلدەرىن كوتەرىپ جاتىر. وسىنداي مۇمكىندىكتەر سىيلاپ وتىرعان ەلباسىمىزعا، وڭتۇستىك قازاقستان وبلىستىق اكىمدىگىنە ۇلكەن العىسىمىزدى بىلدىرەمىز»، دەيدى ش. قالداياقوۆ اتىنداعى وبلىستىق فيلارمونياسى باس ديرەكتورىنىڭ شىعارماشىلىق جونىندەگى ورىنباسارى ءالىمجان راۋشانبەك ۇلى.
ايتا كەتەيىك، وڭتۇستىك قازاقستان وبلىسىنىڭ استانا قالاسىنداعى كۇندەرى اياسىندا اۋقىمدى ءىس- شارالار ءوتىپ جاتىر. اتاپ ايتقاندا، 29 - تامىز بەن 3 - قىركۇيەك ارالىعىندا سالت- ءداستۇردى، ادەت- عۇرىپتى، ونەر مەن شىعارماشىلىقتى پاش ەتەتىن 10-نان استام شارا ەلوردالىقتار مەن قالا قوناقتارىنىڭ نازارىنا ۇسىنىلاتىن بولادى. بەس كۇنگە سوزالاتىن ءدۇبىرلى تويدا وڭتۇستىك قازاقستاندىق ونەر مايتالماندارى «تۇركى ەلىنىڭ ءتۇپ تامىرى - وڭتۇستىكتەن مەرەيلى استاناعا سالەم!» ونەر كەرۋەنى، «سالەم استانا! سالەم، ەكسپو!»، «وڭتۇستىك ازىلدەرى» شوۋ- كونسەرتتەرىن ۇسىنسا، ءوڭىردىڭ تاريحي قۇندىلىعى مەن ەرەكشە مادەني كەلبەتىن دارىپتەيتىن كورنەكتى جادىگەرلەردىڭ كورمەسى مەن تاريحتان سىر شەرتەتىن سۋرەتشىلەر مەن قولونەرشىلەر بۇيىمدارىنىڭ كورمەلەرى وتكىزىلەدى.
29-31 - تامىز ارالىعىندا «بەيبىتشىلىك جانە كەلىسىم» سارايىندا وتەتىن كورمەگە ءوڭىرىمىزدىڭ تاماق جانە جەڭىل ونەركاسىپ، ماشينا جاساۋ، فارماتسيەۆتيكا جانە قۇرىلىس زاتتارى سالالارىنىڭ 50-دەن استام كاسىپورىندارى قاتىسادى. سونداي- اق، 30 - تامىز كۇنى ساعات 11.00-دە استانا قالاسىنىڭ وقۋشىلار سارايىندا «كۇش اتاسى - قاجىمۇقان» انيماتسيالىق فيلمىنىڭ تۇساۋكەسەرى وتسە، 31 - تامىز كۇنى «وتىرار داستانى»، «قازاقستان بارىسى»، «تولاعاي»، «قازاقستان برەندى» انيماتسيالىق فيلمدەرىن استانا جۇرتشىلىعى تاماشالايدى.
ال 2-3- قىركۇيەك كۇندەرى اگرارلى ايماقتىڭ اۋىل شارۋاشىلىق جارمەڭكەسى ۇيىمداستىرىلادى. جارمەڭكەگە نارىق باعاسىنان ارزان قۇنى 265 ميلليون تەڭگە بولاتىن 550 تونناعا جۋىق ءونىم شىعارىلادى. مۇنان بولەك، رەسپۋبليكا بويىنشا شاعىن جانە ورتا كاسىپكەرلىك سۋبەكتىلەرىنىڭ سانى جاعىنان كوش باستايتىن وڭتۇستىكتىڭ ونەركاسىپ تاۋارلارىنىڭ كورمەسى وتەدى. دەمالىس كۇندەرى «قازانات» يپپودرومىندا اۋدارىسپاق، قىز قۋۋ، جامبى اتۋ، تەڭگە ءىلۋ، قۇسبەگىلىك ونەرلەرى كورسەتىلەتىن بولسا، 3 - قىركۇيەك كۇنى «ەتنواۋىلدا» قازاق كۇرەسى، اسىق اتۋ، توعىزقۇمالاق جانە كورەرمەندەر اراسىندا «قوشقار كوتەرۋ» سايىسى ۇيىمداستىرىلادى.
3 - قىركۇيەك كۇنى ساعات 21.30-دا ەكسپو الاڭىنداعى امفيتەاتردا وڭتۇستىكتەن شىققان قازاق ەستراداسىنىڭ جۇلدىزدارى نۇرلان ونەربايەۆ، قايرات نۇرتاس، التىناي جورابايەۆا، جۇبانىش جەكسەن ۇلى جانە تاعى باسقا دا كوپتەگەن ونەر مايتالماندارى ونەر كورسەتەتىن «ءان مەن كۇي الديلەيدى استانانى!» اتتى قورىتىندى گالا- كونسەرتى وتەدى.
اۆتور: ريزابەك نۇسىپبەك ۇلى