شىعىس قازاقستان وبلىسىندا ۋاق بارماق باتىردىڭ بەيىتىنە قۇلپىتاس ورناتىلادى
شارا اياسىندا باتىردىڭ باسىنا قۇلپىتاس ورناتىلماق، دەپ حابارلايدى «قازاقپارات» ح ا ا ءتىلشىسى.
كوكپەكتى اۋدانىنداعى جەرگىلىكتى «جۇلدىز» جانە «نوۆايا جيزن» گازەتىنىڭ ديرەكتورى دارحان بەردىبەكتىڭ حابارلاۋىنشا، باتىر بابانى ەسكە الۋ شاراسى كوكپەكتى اۋدانىندا 16-17 -قىركۇيەك كۇندەرى ۇيىمداستىرىلادى.
بۇقارالىق ءىس- شارالار لەگى «بولاشاققا باعدار: رۋحاني جاڭعىرۋ» باعدارلاماسى اياسىندا بارماق باتىر بەيىتىنىڭ باسىنا قۇلپىتاس ورناتۋمەن باستالادى.
«ەكى كۇنگە سوزىلاتىن شارالار اياسىندا اۋدان ورتالىعىنا تاريحي تۇلعانىڭ كەۋدەمۇسىنى ورناتىلىپ، الامان بايگە وتەدى، اس بەرىلەدى. «ۋاق بارماق باتىر - تاعىلىم جانە رۋحاني جاڭعىرۋ» اتتى عىلىمي كونفەرەنتسيا جۇمىسىنا ەلىمىزگە تانىمال تاريحشىلار مەن شەجىرەشىلەر قاتىسادى»، - دەپ حابارلادى دارحان بەردىبەك.
بارماق باتىر - 18 - عاسىردا جوڭعار باسقىنشىلارىنا قارسى جانقيارلىقپەن كۇرەسكەن سانسىز قازاق باتىرلارىنىڭ الدىڭعى قاتارىنداعى ۋاقتىڭ ەرەنشى رۋىنان شىققان ارۋاقتى ەر، داڭقتى قولباسشى. 1723-1758 -جىلى ەدىل- جايىققا باتىستان شابۋىلداعان قالماق شاپقىنشىلىعىنا، ماڭعىستاۋدى باسىپ العان تۇرىكپەندەرگە، شىعىستان باسا كوكتەپ قازاق جەرىنە ىشكەرىلەي ەنگەن جوڭعار باسقىنشىلارىنا قارسى كۇرەستەردە كىشى ءجۇز جاساعىنا بالتا، بوگەنباي باتىرلارمەن بىرگە قولباسشىلىق ەتكەن تۇلعا. تارباعاتاي ءوڭىرىن جوڭعارلاردان قايتىپ العان 80 كۇنگە سوزىلعان «شورعا» شايقاستارى كەزدەرىندە، وسى ۇرىستاردىڭ كۋاسى بولعان نايمان كارىباي اقىننىڭ جىرىندا بارماق «ءۋالى اۋليە، كورىپكەل شاراپاتتى دا باتىر» دەپ سۋرەتتەلەدى.
اۆتور: ايان بەكەن ۇلى