قازاقستان اۋماعىندا مەرزىمدىك تۇماۋدىڭ اسا قاۋىپتى ءتۇرى ءورشۋى مۇمكىن
وسىنداي بولجام جاساعان اق حالاتتىلار ءتىپتى، جۇقپالى اۋرۋعا قارسى ءبىر جارىم ميلليون ەكپە ساتىپ الىپ قويىپتى. ,- دەپ جازدى 31 - ارنا.
جاپپاي ەكپە جۇمىستارى ەلىمىز بويىنشا ءبىرىنشى قازاننان باستالادى.
كۇزدە ءورشي تۇسەتىن تۇماۋ ۆيرۋسىنىڭ بىرنەشە ءتۇرى بيىل دا قيىن ءتيۋى مۇمكىن. ەپيدەميولوگتار ەلىمىزدە تۇماۋدىڭ ا، N1H1, H3N2 مەن B تۇرلەرى ءورشيدى دەيدى. سۋىق ءتيدىرۋ ماۋسىمىنان امان شىعۋ ءۇشىن ءتىپتى قاجەتتى ۆاكسينا دا ساتىلىپ الىنىپ قويىلعان.
ال ەل اراسىندا كۇزدىڭ قارا سۋىعىندا توڭىپ، جوتەل قىسسا، ءبىر كەسە سۇتكە ءبىر قاسىق سارى مايدى سالىپ ىشەتىندەر كوپ. ال سۇتكە سارىمساقتىڭ ءبىر بولىگىن سالساڭىز، كوك جوتەلدەن ارىلۋعا بولادى دەيدى تۇرعىندار.
ەگەر بۇدان دا تۇك شىقپاسا، اياعىڭىزدى جىلى سۋعا مالىپ، دەنەڭىزدى ەتيل سپيرتىمەن سۇرتۋگە دە حالىقتىڭ ءوزى كەڭەس بەرەدى.
الايدا ءۇي جاعدايىنداعى بۇل تاسىلدەر بارلىعىنا بىردەي ەم بولا بەرمەيدى دەيدى دارىگەرلەر. سوندىقتان اۋرۋحانالارعا جۇگىنگەن دۇرىس ەكەنىن ايتادى. جىل سايىن ءبىر عانا قاراعاندىنىڭ ەمحانالارىنا تۇماۋدىڭ قاۋىپتى تۇرىنە شالدىققان ون مىڭنان استام ادام جۇگىنەدى ەكەن.
اق حالاتتىلار «جۇقپالى اۋرۋدان ەمدەلمەسە، سوزىلمالى دەرتتى جۇقتىرۋى مۇمكىن» ، دەيدى. سوندىقتان دارىگەرلەر ەكپەنى اۋرۋعا دەيىن، ياعني كۇز مەزگىلىندە العان دۇرىس دەپ وتىر. ويتكەنى «ا» تيپتەگى تۇماۋ قاراشا مەن ناۋرىزدىڭ اراسىندا اسا ءورشي تۇسەدى ەكەن.
«اعزا قارسى تۇرۋ ءۇشىن ەكى اپتا كەرەك. مەرزىم از بولسا، انتيتەلو دەيمىز عوي، نەگىزى بولمايدى ورگانيزمدە. سوعان سايكەس كىسىلەر اۋىرادى، اسقىنۋ پايدا بولادى» ، - دەيدى جوعارى ساناتتاعى ەپيدەمولوگ دارىگەر ايمان ىسقاقوۆا.
دارىگەرلەر تۇماۋعا قارسى ۆاكسينادان ادامداردىڭ باس تارتاتىنىن ايتادى. «جىلدا بۇنداي تۇرعىنداردىڭ قاراسى تەك كوبەيىپ كەلەدى» ، دەيدى.
دەگەنمەن، كەيبىر قاراعاندىلىقتار جۇقپالى اۋرۋدان قورعانۋ ءۇشىن جىلدا ەكپە جاساۋدى ءجون سانايدى. ماسەلەن، بىلتىر ءبىر ەكپەنىڭ قۇنى 2300 تەڭگە بولسا، بيىل بۇل باعا ءوسۋى مۇمكىن.
«ەكپەنىڭ پايداسى وتە كوپ دەپ ويلايمىن. ودان قاشپاۋ كەرەك، سالعىزۋ كەرەك. ۇنەمى اۋىرعانشا، ءبىر رەت، ەكى رەت اۋىرعان دۇرىس دەپ ويلايمىن» ، - دەيدى قالا تۇرعىنى.
«كومەكتەسەدى. كىشكەنە اۋىراسىڭ، ءبىراق ەشقانداي وسلوجنەنيە كەتپەيدى» ، - دەگەن پىكىردە قالا تۇرعىنى.
ءبىر ميلليارد ەكى ءجۇز ميلليون تەڭگەگە رەسەيدەن ساتىپ الىنعان تۇماۋعا قارسى ۆاكسينانىڭ 150 مىڭ داناسى قاراعاندىعا قىركۇيەك ايىنىڭ سوڭىنا دەيىن جەتكىزىلۋى ءتيىس.
دارىگەرلەر ەكپەنىڭ وبلىس حالقىنا تولىعىمەن جەتەتىنىنە سەنىمدى. ادەتتەگىدەي، ۆاكسينا ارداگەرلەر، جۇكتى ايەلدەر، مۇگەدەكتەر مەن مەديتسينا قىزمەتكەرلەرىنە تەگىن جۇرگىزىلەدى.
