داريعا نازاربايەۆا: ايەلدەرسىز ءبىلىم مەن دەنساۋلىق ساقتاۋ سالاسى الدەقاشان قۇردىمعا كەتەر ەدى
بۇل تۋرالى بۇگىن «ايەلدەر كاسىپكەرلىگىن دامىتۋعا ارنالعان جاڭا مۇمكىندىكتەر» اتتى حالىقارالىق بيزنەس كونفەرەنسيادا ق ر پارلامەنتى سەناتىنىڭ دەپۋتاتى داريعا نازاربايەۆا ءمالىم ەتتى.
ىسكەر ايەلدەردىڭ وسىنداي ماڭىزدى كەزدەسۋلەرىنە قاتىسقاندى ۇناتاتىنىن اتاپ وتكەن د. نازاربايەۆا، بۇگىندە ەلىمىزدە ءاربىر ايەلدە ءوزىن ساياساتتا، بيزنەستە جانە عىلىمدا كورسەتۋگە مۇمكىندىگى بار ەكەنىن جەتكىزدى.
«مۇنداي كەزدەسۋدە ايەل بويىنداعى قاجىر-قايراتتى ايرىقشا سەزىنەسىڭ. قازاقستان ىسكەر ايەلدەر قاۋىمداستىعى ءوز قاناتىنىڭ استىنا ەلىمىزدەگى ەڭ مىقتى، ەڭ ۇزدىك، ەڭ ادەمى قىزداردى جيناپ وتىر. بۇل دۇرىس تا، جۇدىرىقتاي جۇمىلساق، قاشاندا وڭاي، قاۋىپسىز ءارى سەنىمدى. ءبىز ەرەكشە كەزەڭدە، ەركىن ەلدە ءومىر ءسۇرىپ جاتىرمىز. ءبىز جوعارى ءبىلىمدى قازاقستاندىق قوعامنىڭ ءبىر بولىگىمىز. ءارقايسىمىز ساياساتتا، بيزنەستە، عىلىمدا بيىك جەتىستىككە جەتە الامىز»، - دەدى سەناتور.
وسى ورايدا ول بۇگىندە نازىك جاندىلار ەرلەردەن ەش قالىسپاي، ءوز ىستەرىن جاۋاپكەرشىلىكپەن وتە جاقسى اتقارىپ جۇرگەنىن ءسوز ەتتى.
«ايەل بولماسا، ءبىلىم مەن دەنساۋلىق ساقتاۋ سالاسى الدەقاشان قۇردىمعا كەتەر ەدى، جۇمىسسىزدىق 30 پايىزعا دەيىن جايىلاتىن ەدى. قۇرمەتتى اپا-سىڭلىلەر، سىزدەردىڭ ەلىمىزدەگى جالپى ىشكى ونىمگە قوسار ۇلەسىڭىز 40 پايىزدى قۇرايدى. مۇنىمەن دە شەكتەلمەيدى دەگەن سەنىمدەمىن. وسىنى كۇندەلىكتى كۇيبەڭ تىرلىكتەن ءبىر ءسات سەرپىلىپ، ءوزىڭىز جانە وتباسىڭىز بەن وتانىڭىز ءۇشىن قانداي ۇلى ىستەردى اتقارىپ جۇرگەنىڭىزدى ەسكە السىن دەپ ايتىپ وتىرمىن. سول ءۇشىن دە سىزدەرگە باس يەمىز»، - دەدى داريعا نازاربايەۆا.