استانانىڭ باس كوشەسىمەن ونەر كەرۋەنى ءجۇرىپ ءوتتى - فوتو
و ق و اكىمىنىڭ باسپا ءسوز قىزمەتىنەن ءمالىم ەتكەندەي، كەرۋەن ساپىندا التىن ادام، ارىستانباب، قوجا احمەت ياساۋي، ءال- فارابي سىندى تاريحي تۇلعالار مەن عۇلامالار، حاندار مەن باتىر، بيلەر بەينەسىندەگى ونەر ازاماتتارى، ەكسپو ارۋى جانە ۇلتتىق كيىم كيىنگەن انشىلەر مەن بيشىلەر، سيرك ونەرپازدارى بولدى. ءوڭىردىڭ تاريحي كەلبەتىن تانىتار ونەر كوشىنە 500 گە جۋىق ونەرپاز قاتىسىپ، جەرگىلىكتى كومپوزيتورلار ش. قالداياقوۆ، س. بايتەرەكوۆتىڭ اندەرىن قوسىلا ورىندادى.
كەرۋەن باسى «قازىنا»، «شاتتىق»، «شامسينۋر» ءبي انسامبلدەرىنىڭ ورىنداۋىنداعى «مەرەكە دۋمان» بيىمەن باستاۋ الىپ، «بايتەرەك» الاڭىندا 600 جاس دومبىراشىنىڭ ءبىر مەزەتتە ق. ساعىرباي ۇلىنىڭ «بالبىراۋىن» كۇيىن ورىنداۋىمەن اياقتالدى.
وڭتۇستىك قازاقستان وبلىسى مادەنيەتىنىڭ استاناداعى العاشقى كۇنى «بايتەرەك» الاڭىندا ايماقتىڭ ونەر شەبەرلەرىنىڭ «سالەم، استانا! سالەم، ەكسپو-2017!» مەرەكەلىك كونسەرتىمەن قورىتىندىلاندى.
كونسەرتتە ق ر مادەنيەت قايراتكەرى ايجان تاجەنوۆا «دومبىرا تۋرالى باللادا» ورىنداسا، «وڭتۇستىك- سيرك» مەكەمەسىنىڭ «ح- بەند» ەسترادالىق دجاز انسامبلى زاماناۋي شىعارمالار ۇسىندى. ش. قالداياقوۆ اتىنداعى وبلىستىق فيلارمونيانىڭ انشىلەرى «ەكسپو-2017» تۋرالى ءان شىرقاسا، «سەمسەر» توبى "وتىرارداعى توي" انىمەن ءوڭىردىڭ كيەلى ولكەسىن دارىپتەدى. "وركەن" وتباسىلىق ءانسامبلى، "اسۋ" تريوسى مەن كوپتەگەن ونەر ساڭلاقتارى ونەر دۋمانىمەن استانا كەشىن اسقاقتاتتى. وڭتۇستىكتىڭ تۋماسى، قازاقستاننىڭ ەڭبەك سىڭىرگەن ءارتىسى، ەسترادا ءانشىسى گۇلنار سيقىمبايەۆا استانالىق كورەرمەندى اسەم داۋسىمەن ءتانتى ەتتى.
كورەرمەندى ءان مەن كۇيگە بولەگەن وڭتۇستىكتىڭ ونەر مايتالماندارى بۇگىنگى كەشتە 30-دان اسا تاڭداۋلى نومىرلەرىمەن ەل ىقىلاسىنا بولەندى.
شارا بارىسىندا وبلىس اكىمىنىڭ ورىنباسارى ۇلاسبەك سادىبەكوۆ ەلىمىزدىڭ بارلىق وبلىس اكىمدەرى قول قويعان ەكسپو تۋىن «استانا ەكسپو-2017» حالىقارالىق مامانداندىرىلعان كورمەسىنىڭ كوميسسارى ءراپىل جوشىبايەۆقا سالتاناتتى تۇردە تابىستادى.
ايتا كەتەيىك، 29 -مامىر كۇنى وڭتۇستىك قازاقستاندىق 10 بايكەر ەكسپو-2017 كورمەسىنىڭ قۇرمەتىنە رەسپۋبليكالىق موتوشەرۋ ۇيىمداستىرىپ، ەكى دوڭگەلەكتى كولىكپەن ەلىمىزدىڭ ءبىرقاتار وبلىسىن ءجۇرىپ ءوتتى. ولاردىڭ سوڭعى نۇكتەسى استاناداعى ەكسپو كورمەسى بولدى.
جالپى، وڭتۇستىك قازاقستان وبلىسىنىڭ مادەنيەت كۇندەرى اياسىندا كۇنگەي جەرىنەن كەلگەن 1 مىڭنان استام ءارتىس استانالىقتارعا ءوز ونەرلەرىن ۇسىناتىن بولادى.
فوتو اۆتورى - سامات مىرزاليەۆ