شىمكەنت تۇرعىندارى ۆاتساپ الەۋمەتتىك جەلىسىمەن تاراعان جالعان حابارلاماعا الداندى

شىمكەنت. قازاقپارات - شىمكەنتتە الەۋمەتتىك جەلىلەر ارقىلى بالالارعا «مەكتەپكە قاجەتتى قۇرالدار تەگىن ۇلەستىرىلەتىندىگى» تۋرالى حابارلاما تاراعاننان كەيىن، كوپتەگەن اتا-انا بالالارىن ەرىتىپ، قالا ورتالىعىنداعى پۋشكين كىتاپحاناسىنا جينالدى، دەپ حابارلايدى «قازاقپارات» ح ا ا ءتىلشىسى.

الەۋمەتتىك جەلىدەگى جالعان اقپارات ءبىرقاتار اۋداننىڭ دا تۇرعىندارىن الەككە سالدى. كىتاپحانا الدىنا ارىس قالاسى مەن ورداباسى اۋدانىنان دا اتا-انالار كەلگەن. ولاردىڭ بارلىعى دا جاڭا وقۋ جىلى قارساڭىندا ۇيالى تەلەفوندارىنا «WhatsApp» جەلىسى ارقىلى حابارلاما تۇسكەنىن ايتادى. وندا «2010 جانە 2011 -جىلى تۋعان بالالارعا مەكتەپكە قاجەتتى قۇرالدار تەگىن تاراتىلادى» دەلىنگەن. اتا- انالار اقپاراتتىڭ جالعاندىعىن كىتاپحانا الدىنا كەلگەندە ءبىر-اق ءبىلدى.

«ءبىز بۇل جەرگە بالالارىمىزبەن بىرگە كەلگەن ەدىك. الايدا حابارلامانىڭ وتىرىك ەكەنىن ءبىلىپ وتىرمىز. سول حابارلاما جىبەرگەندەر تىم بولماسا كىتاپ، سىزعىش بەرسە دە وكپەلەمەس ەدىك. بالالاردى وقۋ باستالماي جاتىپ وتىرىككە باۋلىپ وتىرمىز. بۇل جەردە جاعدايى ورتاشا جانە ناشارلارى دا بار»، - دەيدى شىمكەنت قالاسىنىڭ تۇرعىنى ورىنكۇل ءابدىرايىموۆا.

اتا-انالار حابارلامانىڭ جالعان ەكەندىگىنە ابدەن كوز جەتكىزگەننەن كەيىن ۇيلەرىنە تارقاستى.

قازىر وڭتۇستىك وبلىستىق ىشكى ىستەر دەپارتامەنتىنىڭ وكىلدەرى بۇل اقپاراتتىڭ شىعۋ توركىنىن انىقتاۋدا.