نازاربايەۆ: الەمدىك قوعامداستىقتا جاھاندىق يادرولىق قاۋىپسىزدىك بويىنشا اۋىزبىرشىلىك جوق
«الەمنىڭ توعىز مەملەكەتىندە يادرولىق قارۋدىڭ 16 مىڭ بىرلىگى بار. عالىمدار يادرولىق قارۋ- جاراقتىڭ جارتى پروتسەنتى عانا كليماتتى بۇزىپ، جەر بەتىندە جاھاندىق اشارلىق تۋدىراتىندىعىن ەسەپتەپ شىعارىپتى. بۇل ءوزىن ءوزى قۇرتۋ دەگەندى بىلدىرەدى، كەلەشەك جوق. وزدەرىڭىزدە بىلەتىندەي، الەمدىك قوعامداستىقتا جاھاندىق يادرولىق قاۋىپسىزدىك ماسەلەسىندە وكىنىشكە وراي بىرلىك جوق. ونىڭ باستى سەبەبى نەگىزگى يادرولىق دەرجاۆالاردىڭ اراسىنداعى سەنىمنىڭ جوقتىعى. بۇل بۇگىنگى كۇننىڭ شىندىعى» ، دەدى نۇرسۇلتان نازاربايەۆ.
ەلباسى الەمدە يادرولىق تەجەلۋ، يادرولىق قارۋدى تاراتپاۋ، يادرولىق قارۋدى قىسقارتۋ سىندى ستراتەگيالاردىڭ بار ەكەندىگىن، دەگەنمەن ولاردىڭ جەتىلدىرىلمەگەندىگىن اتاپ ءوتتى. اتالعان ۋاعدالاستىقتى بۇزۋشىلاردىڭ ەش جازالانبايتىندىعىن، ولاردى حالىقارالىق كەلىسىمشارتتى ورىنداۋعا مىندەتتەيتىن ەرەجەنىڭ جوقتىعىن ايتتى. «قازاقستان ءوز تاراپىنان تاڭداۋىن جاسادى. ءبىز يادرولىق قارۋسىزدانۋ جانە جاھاندىق يادرولىق قاۋىپسىزدىكتى جاقتاۋشىمىز. يادرولىق قاۋىپسىزدىك جونىندەگى بارلىق كونۆەنتسياعا قول قويىپ، يادرولىق تەرروريزممەن كۇرەس بويىنشا جاھاندىق باستامانىڭ نەگىزىگىن قالاۋشىلاردىڭ ءبىرى بولدىق. بۇعان قوسا، ءبىز يادرولىق قاۋىپسىزدىك تەك قانا امبەباپ بولۋى جانە كەمسىتۋشى بولماۋى ءتيىس دەپ سانايمىز. بۇگىندە 190 ەلدىڭ باسىن قوساتىن G- Global باستاماسى ءدال وسىعان باعىتتالعان»، دەيدى نۇرسۇلتان نازاربايەۆ.
اۆتور: مارلان جيەمباي