الماتى وبلىسىندا كوتەن ءتاۋىپ كەسەنەسى جانىنان قوناق ءۇي اشىلدى
شارانىڭ سالتاناتتى اشىلۋىنا سارقان اۋدانىنا جۇمىس ساپارىمەن بارعان الماتى وبلىسى اكىمىنىڭ ورىنباسارى جاقسىلىق ومار قاتىستى، دەپ حابارلايدى قازاقپارات ءوڭىر باسشىسىنىڭ باسپا ءسوز قىزمەتىنە سىلتەمە جاساپ.
حالىق اراسىندا كوتەن ءتاۋىپ اتالىپ كەتكەن قويلىباي قوڭىرباي ۇلى، ءوز زامانىندا ابىلاي حان مەن بوگەنباي باتىردىڭ جەكە كەڭەسشىسى بولعان جانە جاراقات العان ادامداردى ەمدەۋمەن اينالىسقان. ونىڭ اتىن ەرەكشەلەيتىن تۇسى ەشكىمنىڭ ەشقاشان بەتىن قايتارماي، كەز- كەلگەن جاعدايدا قولىنان كەلگەنشە كومەك ۇشىن بەرگەن مىقتى ەمشىلىگى ءارى كورىپكەلدى بولعان دەسەدى. سوندىقتان ونىڭ لەپسى ستانساسىنان 25 مينۋت قاشىقتىقتا ورنالاسقان ماۆزولەيى ەجەلدەن ساكرالدى ورىن سانالىپ كەلەدى.
ەمشىنىڭ رۋحىنا قۇلشىلىق جاساپ، دەرتىنە شيپا سۇراۋشىلار ەلىمىزدىڭ تۇكپىر- تۇپكىرىنەن جينالادى. ەندى مىنە، جەرگىلىكتى بيلىك پەن مەتسەناتتاردىڭ مۇمكىنشىلىكتەرىن ءبىر ارناعا توعىستىرۋىنىڭ ارقاسىندا كەلۋشىلەرگە جايلى جاعداي جاساۋ ماقساتىندا 50 ورىندىق قوناق ءۇي تۇرعىزىلدى.
«وسكەلەڭ ۇرپاق ءۇشىن مۇنداي يگى ىستەر ۇلگى- ونەگە بولماق. مەملەكەت باسشىسى جاھاندانۋ زامانىندا قوعامدىق سانانىڭ رۋحاني جاڭعىرۋى تۋرالى تەكتەن- تەك ايتىپ قانا قويماي، ءوزىمىزدىڭ ءىس- ارەكەتىمىزبەن، وي- سانامىزبەن ءوزىمىزدىڭ مادەنيەتىمىز بەن تاريحي قۇندىلىقتارىمىزدى ساقتاۋعا ەرەكشە كوزقاراسپەن قاراۋىمىز ءتيىس. بۇل باعىتتا ءبىز ءۇشىن ەل پرەزيدەنتىنىڭ باعدارلامالىق ماقالاسى مەن «رۋحاني جاڭعىرۋ» باعدارلاماسىندا كورسەتىلگەن باعىتتارعا جۇگىنە وتىرىپ، اۋقىمدى جۇمىستار اتقارۋىمىز قاجەت»، - دەدى جاقسىلىق ومار.
ماۆزولەي شىراقشىسى تالعاتبەك كارىپجانوۆتىڭ ايتۋىنشا، مۇراجاي مەن ماۆزولەيدەن قۇرالعان كەشەنگە جىلىنا 1500 ادام كەلەتىن كورىنەدى
اۆتور: سامال قابىشيەۆا