قازاقستاندا بويتۇمار «يگىلىك مونەتاسى» اينالىسقا شىعارىلدى
«بيكولورلى مونەتا بويتۇمار-مەدالون تۇرىندە جاسالعان. مونەتانىڭ جوعارعى بولىگىندە القا نەمەسە باۋ ءۇشىن تەسىك جاساۋعا بولاتىن ويىق ورىن بار. مونەتادا تاسباقا قابىعىنىڭ ءپىشىنى مەن تۇسىندەي بەينەلى قوندىرما تۇرىندە تانتال پايدالانىلادى. مونەتالاردى دايىنداعان كەزدە تانتالدىڭ ءتۇسىن وزگەرتۋ تەحنولوگياسى قولدانىلدى»، ۇلتتىق بانكتىڭ باسپا ءسوز حابارلاماسىندا.
«يگىلىك مونەتاسى» گرافيكالىق كومپوزيتسياسىنىڭ نەگىزىنە قىتاي ميفولوگياسىنداعى تاسباقا نىشانىنىڭ بىردەن ەكى ماڭىزدى تۇسىندىرمەسى ەنگىزىلدى.
ءبىرىنشىسى - تاسباقا ۇزاق ءومىر، ساتتىلىك جانە يگىلىك نىشانى رەتىندە. ەكىنشىسى - مىقتى قورعانىش قاسيەتى بار لو شۋ سيقىرلى شارشىسى تۋرالى اڭىز.
اڭىز بويىنشا تاسباقا دەنساۋلىق پەن ۇزاق ءومىردىڭ نىشانى بولىپ تابىلادى. بويتۇماردىڭ نەگىزگى قۇندىلىعى ول ءوزى تۇرعان ۇيگە ساتتىلىك اكەلەدى، ءومىردىڭ دەڭگەيىن ارتتىرادى، كەز كەلگەن ىستەر مەن تۋىندايتىن مىندەتتەردى شەشۋگە كومەكتەسەدى. تاسباقانىڭ قابىعى تۇراقتىلىق پەن سەنىمدىلىكتى بىلدىرەدى، سوندىقتان بۇل جانۋاردىڭ بەينەسى ءۇي يەسىنە، وتباسىنداعى باستى ادامعا كومەكتەسەدى.
اڭىز بويىنشا لو شۋ شارشىسى ءبىزدىڭ زامانىمىزعا دەيىن 2200 جىلداي بۇرىن ەجەلگى قىتايدا پايدا بولدى، وعان سايكەس لو وزەنىنەن جاعاعا ۇلكەن تاسباقا جورعالاپ شىقتى، ونىڭ قابىعىندا نۇكتەلەردەن تۇراتىن سيقىرلى ورنەك بولدى، ونى انىقتاپ قاراعان كەزدە بەلگىلى ءبىر جۇيەلىلىكپەن ورنالاسقان سيفرى بار توعىز سەكتور انىقتالدى.
بۇل رەتتە 1 - 9 ارالىعىنداعى سيفردى سىزىقتارمەن جۇيەلى تۇردە قوسقان كەزدە ەجەلگى قىتاي سيقىرىندا پايدالانىلعان «ساتۋرن پلانەتاسىنىڭ ءمورى» نىشانى شىعادى. بۇل نىشان سونداي-اق توعىز يمپەراتوردىڭ نىشانى دەپ اتالادى. ول وتە مىقتى قورعانىش قاسيەتىنە يە جانە بويتۇمار رەتىندە ءوز يەسىن قورعاۋ قابىلەتى بار دەپ ەسەپتەلەدى.
كەز كەلگەن باعىتتاعى سانداردى قالاي قوسساڭىز دا ءبارىبىر 15 كە تەڭ سوما شىعادى. 15 دەگەن سان قۇدىرەتتى سان بولىپ سانالادى، سەبەبى ول قىتاي كۇن جىلىنىڭ 24 سيكلىنىڭ ءارقايسىسىنداعى كۇندەر سانىنا سايكەس كەلەدى.
مونەتانىڭ بەت جاعىندا (اۆەرسىندە) ورتالىق بولىگىندە ۇلتتىق ويۋ- ورنەكتىڭ قورشاۋىندا مونەتانىڭ نومينالىن بىلدىرەتىن «100 تەڭگە» دەگەن جازبا ورنالاسقان. جوعارى بولىگىندە ۇلتتىق بانكتىڭ لوگوتيپى جانە ۇلتتىق ويۋ- ورنەكتىڭ ەلەمەنتتەرى بەينەلەنگەن. اينالدىرا مەملەكەتتىك تىلدە «قازاقستان رەسپۋبليكاسى» جانە اعىلشىن تىلىندە «REPUBLIC OF KAZAKHSTAN» دەگەن جازبا جانە ەكىنشى جولىندا ۇلتتىق ويۋ- ورنەك ەلەمەنتتەرى، سوعىلعان جىلىن بىلدىرەتىن «2017» دەگەن سان جانە مونەتا دايىندالعان مەتالدى، ونىڭ سىنامىن جانە ماسساسىن بىلدىرەتىن «Ag 925 19,3g Ta 20,0g» دەگەن جازبا ورنالاسقان.
مونەتانىڭ سىرت جاعىندا (ريەۆەرسىندە) «لو شۋ سيقىرلى شارشىنىڭ» توعىز سيفرىنىڭ ستيلدەندىرىلگەن بەينەسى تاسباقا قابىعىندا بەينەلەنگەن. اينالدىرا مەملەكەتتىك تىلدە «يگىلىك مونەتاسى» ، ورىس تىلىندە «مونەتا بلاگوپولۋچيا»، اعىلشىن تىلىندە «THE WELL - BEING COIN» دەگەن جازبا جانە ۇلتتىق ويۋ- ورنەك ەلەمەنتتەرى بەينەلەنگەن. مونەتا بيكولورلى دايىندالعان، سالماعى 39,3 گرام (ساقيناسى - 925/1000 سىنامدى كۇمىستەن، ماسساسى 19,3 گرام، ديسك - ماسساسى 20 گرام تانتالدان)، سيپاتتالعان شەڭبەر ديامەترى - 38,61م. , دايىنداۋ ساپاسى «proof»، ەڭ كوپ تارالىمى - 2,5 مىڭ دانا، قىرى (گۋرتى) بەدەرسىز جانە جازۋسىز.
ۇلتتىق بانك تارالىمنىڭ ءبىر بولىگىن (ەڭ كوپ 2000 دانا) قازاقستاننىڭ ىشكى نارىعىندا ساتادى، تاعى ءبىر بولىگىن پولشا مونەتا سارايى قازاقستاننان تىس جەرلەردە ساتادى. مونەتالاردى ۇلتتىق بانكتىڭ بارلىق فيليالدارىندا، سونداي-اق ۇ ب سايتىندا «ۇلتتىق ۆاليۋتا» بولىمىندە ينتەرنەت - دۇكەن ارقىلى ساتىپ الۋعا بولادى.