قازاقستان مەن ا ق ش بەيبىت ماقساتتاعى اتوم ەنەرگەتيكاسىن دامىتادى - بوزىمبايەۆ
بۇل تۋرالى بۇگىن استانادا ا ق ش ەنەرگەتيكا ءمينيسترىنىڭ ورىنباسارى دەن برۋيللەتپەن بولعان كەزدەسۋدەن كەيىن ق ر ەنەرگەتيكا ءمينيسترى قانات بوزىمبايەۆ ءمالىم ەتتى، دەپ حابارلايدى قازاقپارات.
«ا ق ش تاراپىنان ءبىزدىڭ ەلگە جوعارى دەڭگەيدە نازار اۋدارۋى ەكى ەلدىڭ اراسىنداعى ەكىجاقتى قاتىناستاردىڭ تاريحي ەرەشەلىگىمەن تۇسىندىرىلەدى. امەريكا قۇراما شتاتتارىمەن ىنتىماقتاستىقتا ەنەرگەتيكالىق سەرىكتەستىك بويىنشا بىرلەسكەن كوميسسيانىڭ ورنى ايرىقشا. وسى ورايدا ءبىز ەنەرگەتيكالىق سەرىكتەستىك دەڭگەيىنەن كوميسسيا جۇمىسىن ەنەرگەتيكالىق ديالوگقا دەيىنە كوتەرەمىز دەپ ۋاعدالاستىق. ياعني بۇل ءوز كەزەگىندە ءبىزدىڭ ىنتىماقتاستىقتىڭ كەلەسى دەڭگەيى بولادى. بۇل تۇرعىدا ءتۇرلى سالالاردا تاجىريبەلىك جوبالاردى ىسكە اسىرۋعا كىرىسەمىز»، - دەدى قانات بوزىمبايەۆ.
وسى ورايدا مينيستر بۇل ديالوگ قاي باعىتتاردا وربيتىندىگىن ناقتىلادى.
«قازاقستان مەن ا ق ش بەيبىت ماقساتتاردا اتوم ەنەرگياسىن دامىتۋ تۇرعىسىندا بىرگە جۇمىس ىستەيتىن بولادى. سونىمەن قاتار كليماتتىڭ وزگەرۋى سالاسىندا قوس مەملەكەت تەڭدەستىرىلگەن قادامداردى ۇستانادى. بۇل رەتتە يننوۆاتسيالارعا قولداۋ جاسالىپ، پارنيك گازدارىمەن لاستايتىن شىعارىندىلاردى تومەندەتۋگە ءمان بەرىلەدى. مۇنىمەن قوسا، ەكونوميكانى دامىتۋعا جانە ءبىزدىڭ ەنەرگيالىق قاۋىپسىزدىككە ىقپال ەتەتىن قادامدار ەسكەرىلەدى. ءبىزدىڭ ديالوگ اتوم ەنەرگياسىن بەيبىت تۇردە پايدالانۋعا، كومىرقىشقىل گازى كولەمىن قىسقارتۋ، ەنەرگەتيكالىق جۇيەنىڭ تۇراقتىلىعىنا، ەنەرگەتيكالىق نارىقتاردى كەڭەيتۋگە، سونداي-اق يادرولىق قارۋدى تاراتپاۋ مەن قاۋىپسىزدىك سەكىلدى ماڭىزدى باعىتتاردىڭ اينالاسىندا شوعىرلانادى»، - دەدى قانات بوزىمبايەۆ.
ق ر ەنەرگەتيكا ءمينيسترى ا ق ش- قا ساپارمەن باراتىن اتاپ ءوتتى.
«ا ق ش ەنەرگەتيكا ءمينيسترىنىڭ ورىنباسارى برۋيللەتت قازاقستان مەن امەريكا قۇراما شتاتتارىنىڭ ستراتەگيالىق ەنەرگەتيكالىق ديالوگىن رەسمي تۇردە ىسكە قوسۋ ماقساتىندا مەنى ۆاشينگتونعا شاقىردى. ءبىز ىنتىماقتاستىقتى كەڭەيتۋ بويىنشا جۇمىس جوسپارىن 2018-جىلى بەكىتەمىز»، - دەدى ول.
اۆتور: رۋسلان عابباسوۆ