ايىرتاۋ ەكىنشى بۋرابايعا اينالادى
بۇل تۋرالى س ق و اكىمى قۇمار اقساقالوۆ ورتالىق كوممۋنيكاتسيالار ورتالىعىندا وتكەن باسپا ءسوز ءماسليحاتىندا مالىمدەدى.
«ايىرتاۋ - تۋريستىك الەۋەتى جوعارى اۋدان. يمانتاۋ مەن شالقار ايماقتارى بۋرابايدان ەش كەم ەمەس. ءبىراق وندا باراتىن جول سالىنباعان ەدى. بيىل جول قۇرىلىسىنا 500 ميلليون تەڭگە بولدىك جانە قازىرگى ۋاقىتتا 30 شاقىرىم جول بولىگىن جوندەپ جاتىرمىز. كەلەسى جىلى دا قارجىلاندىرۋدى ارتتىرىپ، تۋريستەردىڭ كوپ كەلۋى ءۇشىن جاعداي جاسايتىن بولامىز»، - دەدى ول.
ءوڭىر اكىمىنىڭ ايتۋىنشا، ايىرتاۋدا دەمالىس ايماعىن سالعىسى كەلگەن كاسىپكەرلەرگە مەملەكەت قول ۇشىن سوزادى.
«ازىرگە ءبىرقاتار جوبالار جۇزەگە اسىرىلىپ جاتىر، ءبىراق ولار اۋقىمدى ەمەس. سوندىقتان، تۋريستىك ايماق جوباسىنا قارجى قۇيا الاتىن كاسىپكەرلەردى ىزدەيمىز. ال ءبىز ينفراقۇرىلىم جاعىنان كومەكتەسەمىز. ياعني، دەمالىس ايماعىن سالعىسى كەلگەن كاسىپكەرلەرگە مەملەكەت ەسەبىنەن كوممۋنيكاتسيا، جارىق، گاز جابدىقتارى تەگىن تارتىلادى. ەكولوگيالىق ءتۋريزمدى دامىتۋ ءۇشىن، دەمالىس ايماعىنىڭ تازالىعىن دا ءوز جاۋاپكەرشىلىگىمىزگە الامىز. كەلۋشىلەر شاتىر تىگىپ، تابيعات اياسىندا ەمىن-ەركىن دەم الادى»، - دەپ ءوز ءسوزىن تولىقتىردى اكىم.
رەسمي مالىمەتكە سايكەس، جىل باسىنان بەرى ايىرتاۋعا 19 مىڭ تۋريست كەلگەن.
اۆتور: ايجان سەرىكجان قىزى