17:14, 28 - تامىز 2017 | GMT +6
قازاق كۇرەسىنەن وتەتىن «الەم بارىسىنا» ءتورت قازاقستاندىق بالۋان قاتىسادى
استانا. قازاقپارات - 8- قىركۇيەك كۇنى استاناداعى «بارىس ارەنا» سپورت سارايىندا «ەكسپو-2017» حالىقارالىق مامانداندىرىلعان كورمەسى اياسىندا قازاق كۇرەسىنەن «الەم بارىسى» ابسوليۋتتى الەم چەمپيوناتىنا ءتورت قازاقستاندىق بالۋان قاتىسادى، دەپ حابارلايدى قازاقپارات ءتىلشىسى.
«قازاقستان بارىسى» قازاق كۇرەسىن دامىتۋ قورىنىڭ باسپا ءسوز قىزمەتىنىڭ حابارلاۋىنشا، جارىسقا ەلۋ ەلدىڭ بالۋانى كەلەدى دەپ جوسپارلانعان.
شەتەلدىك سپورتشىلاردان بولەك، بەدەلدى بىرىنشىلىككە قازاقستاننىڭ ەڭ مىقتى ءتورت بالۋانى قاتىسادى.
ايتا كەتەيىك، وسىعان وراي 22- تامىزدان باستاپ قازاق كۇرەسىنەن قازاقستان ۇلتتىق قۇراماسى ەلوردادا وقۋ-جاتتىعۋ جيىنىن وتكىزۋدە. جيىن قورىتىندىسى بويىنشا «الەم بارىسىندا» قازاقستان نامىسىن قورعايتىن بالۋاندار انىقتالادى.
باس جاتتىقتىرۋشى ەرلان ەستەكتىڭ جەتەكشىلىگىمەن وتكىزىلىپ جاتقان جيىندا ايبەك نۇعىماروۆ، مۇحيت تۇرسىنوۆ جانە تاعى باسقا بەلگىلى بالۋاندار بار.
اۆتور: كۇنسۇلتان وتارباي