قازاق جىگىتى: اراب ەلىندە قىزدارمەن تانىسساڭ ونىڭ اعاسى نە اكەسى ەسىڭدى تاندىرىپ جىبەرەدى

 استانا. قازاقپارات - مۇحاممەد سويركاس مەككە قالاسىندا تۋعان. ساياسي وقيعالار كەزىندە ونىڭ اتالارى اراب ەلدەرىنە قونىس اۋدارعان.

 20 جاسىنا دەيىن مەككە مەن ءمادينا قالالارىندا تۇرعان ول وتباسىن قۇرۋ ءۇشىن قازاقستانعا كوشىپ كەلگەن دەپ حابارلايدى NUR. KZ.

«بۇل جەردە جىگىتتەر قىزدارمەن تانىسا المايدى. سويلەسە قالساڭ، اكەسى نە اعاسى ەسىڭدى تاندىرىپ جىبەرەدى. اراب ەلدەرىندە قىزدارعا جولاساڭ باسىڭ بالەگە قالادى. ەر ادامدارعا كوشەدە بوگدە قىزبەن سويلەسۋگە تىيىم سالىنعان. ءدىن جاعىنان بۇرىن نامىس ماسەلەسى باسىم. قازاقستانعا بارىپ ۇيلەنۋدى ارماندادىم. اۋىلعا كەلۋىمنىڭ ءبىر سەبەبى دە وسى. قازىر وتباسىم بار» ، - دەيدى مۇحاممەد سويركاس.

اراب ەلىندە تۋعان جىگىتتىڭ قازاق ەلىنە كەلگەنىنە 20  جىلدان اسقان. ۇلكەن قىزى 20 جاستا.

«ءوزىم 1975 -جىلى مەككە قالاسىندا تۋدىم. 1995 -جىلى قازاقستانعا كوشىپ كەتتىك. جۇرەگىمىزدە وتانىمىزعا دەگەن ساعىنىش بولدى. اكەم مەككە قالاسىنا قىزىلوردانىڭ قارماقشى اۋدانىنان كەلگەن. اراب ەلىندە 20  جىلدان اسا تۇرساق تا، شەتەلدىك بولىپ سانالاسىڭ. دارەجەڭ كەشە كەلىپ، كوشە سىپىرىپ جۇرگەن جۇمىسشىمەن بىردەي. سولاردىڭ تىلىندە سويلەگەنىمەن سەنى وزدەرىندەي قابىلدامايدى، ساعان تومەن كوزبەن قارايدى. سوندىقتان، ەلباسىمىز شەتەلدە جۇرگەن قازاقتاردى جيناعان كەزدە ءبىز دە كوشتىڭ باسىن ەلىمىزگە بۇردىق» ، - دەيدى مەككە قالاسىندا تۋعان قازاق جىگىتى.

ورالمان جىگىت قازاقستاندىقتاردىڭ دەنى ورىس تىلىندە سويلەيتىنىن كورىپ تاڭ قالعان.

«قازاقستانعا العاش بارعان جىلدارى قازاقشا بىلەتىن ادام تاپپاي قينالاتىن ەدىك. ادامداردىڭ ءبارى ورىس تىلىندە سويلەيدى. اراب ەلدەرىندە اۋعانستاننان، تۇركيادان كەلگەن قازاقتار كوپ بولدى. اتالارىمىز وزدەرىمەن تەك قازاق تىلىندە سويلەۋىمىزدى تالاپ ەتتى. سول اقساقالدار ءبىزدىڭ تۋعان ءتىلىمىزدى ۇمىتپاۋعا كوپ كومەكتەستى. ەلگە كەلگەندە ەركىندىكتى كوردىك. راحات ءومىردى سەزىندىم. قالاعانىڭدى جاساۋعا مۇمكىندىك بار. قالاعان جاعىڭا بارا الاسىڭ. اراب ەلدەرىندە سىرتقا شىعۋدىڭ ءوزى ۇلكەن ماسەلە. قاجىلىقتان كەيىن شەتەلدىكتەرگە باقىلاۋ كۇشەيەدى» ، - دەيدى مۇحاممەد.

20  جىل اراب ەلدەرىندە تۇرعان مۇسىلمان جىگىت ول جاقتىڭ ءومىرى تۋرالى دا ايتىپ بەردى.

«بۇل جاقتا ايەل ادامنىڭ جالعىز ءجۇرۋى جاقسى ەمەس. اشىق جۇرۋگە مۇلدە بولمايدى. مۇندا ۇكىمەت ايەلدەرگە قارا كيىممەن ءجۇرۋدى زاڭداستىرىپ قويعان. بۇل جاقتا ايەل مەن ەر ادامنىڭ دوستىعىنا مۇلدە تىيىم سالىنعان. مۇندا قىز بالا 10 جاستان اسقاننان كەيىن قاپ- قارا بولىپ جابىق كيىنەدى. قازىر اراب ەلدەرىندە تۇرمىسقا شىقپاي جۇرگەن 30 جاستان اسقان قىزدار كوپ. سەبەبى، اراب ەلدەرىندە قىزداردىڭ قالىڭمالى وتە قىمبات. قىزدىڭ قالىڭ مالىن تابا الماي 40 جاسقا دەيىن جۇرەتىن ەر كىسىلەر بار. قالىڭ مالدىڭ باعاسى 40-50 مىڭ دوللارعا دەيىن جەتەدى. ەلدىڭ بايلارى 30 جاستان اسقان قىزدى العان ادامعا تەگىن توي جاساپ بەرەدى» ، - دەيدى ول.