ۋنيۆەرسيادادا ەل نامىسىن قورعاعان سپورتشىلاردىڭ العاشقى لەگى ورالدى
الماتى اۋەجايىندا سپورتشىلاردى جانكۇيەرلەر، ب ا ق وكىلدەرى، تۋىسقاندارى دۋ قول شاپالاقپەن قارسى الدى. ولاردىڭ اراسىندا اۋىر اتلەتيكادان چەمپيوندار دەنيس ۋلانوۆ، ايدار قازوۆ، البەرت ليندەر بار.
«ۋنيۆەرسيادادا كورسەتكەن ونەرىمە كوڭىلىم تولادى. ستارت بويىنشا قارسىلاستارىمدى مۇلدە بىلمەدىم. ءبىراق، ءبىر ورىن الاتىنىما سەنىمدى بولدىم»، - دەدى جازعى ۋنيۆەرسيادا ويىندارىنىڭ چەمپيونى، قازاق سپورت جانە تۋريزم اكادەمياسىنىڭ ستۋدەنتى البەرت ليندەر.
بايراقتى باسەكەدە تاەكۆاندودان سايىسقان جەنسەل دەنيز ۋنيۆەرسيادادان العان تاجىريبەسىمەن ءبولىستى.
تۇركيادا تۋعان قازاق قىزى جانسەل تايبەيدە وتكەن جازعى ۋنيۆەرسيادادا كۇمىس جۇلدە اكەلگەن بولاتىن.
«مەن فينالدا وتە مىقتى قارسىلاسپەن، ازيا چەمپيونىمەن شىقتىم. شەشۋشى كەزەڭدە باستى ءرولدى تاجىريبە ويناپ كەتتى. ءبىراق بۇل ايقاستا مەن وزىمە كەرەكتى تاجىريبە جيناقتادىم. بولاشاقتا ول مەنى جەڭىستەرگە جەتەلەيدى دەپ سەنەمىن»، - دەدى جانسەل.
ايتا كەتۋ كەرەك، تايبەيدە وتكەن ۋنيۆەرسيادا ويىندارىندا تاەكۆاندودان ەرلەر كومانداسى ەرەكشە كوزگە ءتۇسىپ، جالپى ەسەپتە 3-ورىنعا تابان تىرەدى. تايبەيدە وتكەن XXIX جازعى ۋنيۆەرسيادادا قازاقستاندىق زىلتەمىرشىلەر دەنيس ۋلانوۆ (85 ك گ)، ايدار قازوۆ (77 ك)، البەرت ليندەر (69 ك گ) ۇزدىك شىعىپ، التىن مەدال العان بولاتىن.
جالپى العاندا قازاقستان قۇراماسىنىڭ قورجىنىندا 14 مەدال، ونىڭ ىشىندە 3 التىن، 5 كۇمىس، 6 قولا مەدال بار.
