بەيجىڭدە حالىقارالىق جىبەك جولى اكادەمياسى قۇرىلادى
بۇل تۋرالى «G-GLOBAL» حالىقارالىق حاتشىلىعىنىڭ جەتەكشىسى سەرىك نوگەربەكوۆ نازاربايەۆ ۋنيۆەرسيتەتىندە ءوتىپ جاتقان جىبەك جولى حالىقارالىق بىرلەسكەن يننوۆاتسيالار فورۋمىندا مالىمدەدى.
«قازاقستان ۇلتتىق جاراتىلىستانۋ عىلىمدارى اكادەمياسى «G-GLOBAL» حالىقارالىق حاتشىلىعىمەن بىرلەسىپ، ەكى جىل بۇرىن حالىقارالىق جىبەك جولى اكادەمياسىن قۇرۋ تۋرالى باستاما كوتەردى. ەكى جىلدا ۇلكەن ۇيىمداستىرۋشىلىق جۇمىس اتقارىلدى. بىرلەسىپ كۇش سالۋدىڭ ارقاسىندا «ءبىر بەلدەۋ - ءبىر جول» حالىقارالىق جوباسىن جۇزەگە اسىرىپ جاتقان 16 مەملەكەتتىڭ عالىمدارى بىرىگەدى. شامامەن 25 - قىركۇيەك كۇنى بەيجىڭدە ەۋرازيا ەكونوميكالىق فورۋمى اياقتالعان سوڭ، قۇرىلتاي كونفەرەنتسياسى وتكىزىلەدى. وندا ءبىز - 16 مەملەكەتتىڭ ءبىلىم بەرۋ ۇيىمدارىنىڭ وكىلدەرى مەن عالىمدارى حالىقارالىق جىبەك جولى اكادەمياسىندا باس قوسامىز»، - دەدى س. نوگەربەكوۆ.
ونىڭ ايتۋىنشا، «ءبىر بەلدەۋ - ءبىر جول» حالىقارالىق جوباسىن ءتيىمدى جۇزەگە اسىرۋ ءۇشىن ەكونوميست- عالىمدار مەملەكەتتىك ورگانداردىڭ، حالىقارالىق جانە ۇكىمەتتىك ەمەس ۇيىمداردىڭ، شاعىن جانە ورتا بيزنەس كاسىپورىندارىنىڭ باسشىلارىن بىرىكتىرەدى. بيىلدان باستاپ، استانا ەكونوميكالىق فورۋمى اياسىندا جىبەك جولى بىرلەسكەن يننوۆاتسيالار فورۋمدارى وتكىزىلەدى.
اۆتور: ايجان سەرىكجان قىزى