شارىن با، الدە مارس پا؟
ول اتاقتى - شارىن شاتقالى. الماتى قالاسىنان 195 شاقىرىم شىعىسقا قاراي ورنالاسقان ەرەكشە ايماق. 2004 -جىلدان باستاپ شارىن ۇلتتىق پاركىنىڭ قۇرامىنا كىرگەن.
شارىن - تابيعاتتىڭ عاجايىپ تۋىندىسى. ونىڭ تىلسىمعا تولى قىزعىلت اڭعارى تابيعاتتىڭ قاي ساتىندە بولماسىن، وزگەشە تارتىمدىلىعىمەن ەستە قالادى. شاتقالعا تۇندەلەتىپ جەتكەن ءبىز، تاڭعى شارىننىڭ بەدەرلى كورىنىسىنە كۋا بولدىق.
ءبىز شاتقالدىڭ جوعارعى بولىگىن بويلاي ءجۇرىپ وتىردىق. تارام- تارام قامالدار اڭعارىنا تۇسكەن كۇن كوزى - تاماشا كولەڭكە سۋرەتىن سالىپ تاستاعانداي. شارىننىڭ بيىك بەلدەۋىنەن تومەنگە جىلجىعاندا، اڭعاردىڭ ادام تۇسىنە بەرمەيتىن عاجايىپ بەدەرلەرىنە تامسانا قارادىق. جەردەگى مارس قالدىعىنداي قادالعان قۇزدارىنىڭ بيىكتىگى 150-300 مەترگە جەتەدى. شاتقالدىڭ تاس قامالدارىنىڭ بويىمەن وزىمەن اتتاس وزەن اعىپ وتەدى. وزەننىڭ اعىسى سەكۋندىنا 10-12 شاقىرىمعا جەتەتىندىكتەن، رافتينگ سپورتىنا جارامدى. ايماقتىڭ رەلەفى ءارتۇرلى. جارقاباقتىڭ باعانالارى، باۋراي جىرالارى 150-300 مەترگە جەتەدى.
شارىن م ۇ ت پ قۇرامىنا رەسپۋبليكالىق ماڭىزى بار - تابيعات ەسكەرتكىشى - شارىن ەرەن توعايى كىرەدى. 1964 -جىلى 19 - ناۋرىزدا قازاق ك س ر مينيسترلەر كەڭەسىنىڭ №447-ر قاۋلىسىمەن ۇيىمداستىرىلعان. تابيعات ەسكەرتكىشى جالپى 5014 گ ا جەردى الىپ جاتىر، ونىڭ ىشىندە اعاشپەن شەكتەلگەن الاڭ - 2315 گ ا، تەك ەرەن اعاشتى القاپ - 1015 گ ا.
پاركتە 32 ءتۇرلى سۇتقورەكتى، باۋىرىمەن جورعالاۋشىلاردىڭ 18 ءتۇرى، امفيبيانىڭ 4 ءتۇرى جانە 100-دەن اسا قۇس ءتۇرى مەكەندەيدى. جالپى، ساياباق اۋماعى فلورا مەن فاۋناعا وتە باي. 1000 تارتا جوعارى ساتىداعى وسىمدىكتەر مەن ومىرتقالى جانۋارلاردىڭ 194 ءتۇرى تىرشىلىك ەتەدى، ولاردىڭ 27 ءتۇرى قازاقستاننىڭ قىزىل كىتابىنا ەنگەن. وسىمدىكتىڭ 50-دەن اسا ءتۇرى سيرەك كەزدەسەتىن جانە ەندەميكالىق ءتۇر دەپ ەسەپتەلەدى.
شارىننىڭ ءىشى جاراتىلىستىڭ كەرەمەت اڭعارلارىمەن، ءتۇرلى بەينەلەردى كورسەتەدى. مۇقيات ارالاساڭىز، ءتۇرلى كەسكىندەرگە قانىعاسىز. ەندەشە، ءسىز دە شارىن شاتقالىندا ساياحاتتاپ قايتىڭىز!
دوسجان بالابەك ۇلى
الماتى وبلىسى
«ايقىن» گازەتى