اۋىلداعى فەيسبۋك
ەكى كەسە ءشايدى ىشەر-ىشپەستەن جاتا كەتەتىن جەر ىزدەدىم.
ءۇيدىڭ ارتىنداعى كولەڭكەدە جان-جاعىنا شىرماۋىق وسكەن تاپشان تۇر ەكەن. سونىڭ ۇستىنە قۇلاي كەتتىم. جاتقانىم سول ەدى از ۋاقىت وتەر-وتپەستە ءبىر اجەي جاقىنداپ كەلدى دە، تاپشانعا جاپسارلاس قويىلعان ساكىگە وتىرا كەتتى. مەن ول كىسىگە كورىنبەيمىن. شىرماۋىق قالقالاپ تۇر. ول كىسى ءوزىم عانا وتىرمىن دەسە كەرەك، اناۋ جاقتا وتىرعان ءوزى قۇرالپىلاس ءبىر اپانى جانىنا شاقىردى. انا كىسى كەلدى.
- كەل وسىندا وتىرايىق، تىنىش ەكەن.
- كۇن دە ىسىپ كەتتى عوي.
- قۇرسىن، اۋەلى مىنالاردىڭ سالات-پالاتتارى ساسىپ كەتىپ جۇرمەسە بولار ەدى.
- شىبىنى قۇرعىرعىر دا قاراقۇرىم. ءشاي ىشكىزبەدى.
- كەشكى تويعا دەيىن ءبىر مىزعاپ السام با دەپ ەدىم، بوس بولمە جوق. جۇمانعا تالاي ايتتىم، «ەي، ەرتەڭ بالاڭ كەلىن الادى، قىزىڭ بايعا شىعادى، مىنا ۇيىڭمەن قۇدا كۇتە المايسىڭ، كەڭەيت»، - دەدىم. انە-مىنە دەگەنشە ۋاقىتى قۇرعىر ءوتتى دە كەتتى. ەندى مىنە ساسقان ۇيرەكتىڭ كەرىن كەلتىرىپ وتىر.
- ە- ە، ەشتەڭەسى جوق، دالادان ۇزاتىپ بەرىپ وتىرعان جوق قوي. قاي تويحانادا جاسايدى ەكەن؟
- التايدىڭ زالىندا.
- مالى سەمىز شىقتى ما؟
- بولادى ايتەۋىر، ەكى ەلى بار دەپ جاتقان.
- قورجىن سوككەنىندە بولدىڭىز با؟
- بولدىق قوي. كەلىن مىقتى بولىپ تۇر عوي، توركىنىن جىرعاتتى...
- اناۋ اشكيدەگى اپكەسى دەدى مە؟
- ءيا، سەمەيدەگى اپكەسى.
- تەگى بيلەپ-توستەپ الىپتى.
- مارقۇم شەشەلەرى دە وسىنداي ەدى. سوعان اينىماي تارتقان. سويىپ، قاپتاپ قويعانداي.
- قانشا اكەپتى دەيدى.
- 200 مىڭ تەڭگە اقشالاي اكەلگەن ەكەن. جەتەك مالى بار دەدى.
- جاقسى اكەلگەن ەكەن.
- ەندى نۇركەننىڭ مالىن اياي ما؟
وسى كەزدە كوشە جاقتان ءبىر اپا كەلىپ، ەسىك الدىنداعى قازان-وشاقتىڭ اينالاسىنداعى كەلىن- كەپشىكتەرمەن امانداسىپ، ول كىسى دە بەرى قاراي ءجۇردى. ەكى اپانىڭ قاسىنا جايعاسىپ، ول كىسى دە بىردەن اڭگىمەگە ارالاسىپ كەتتى.
- قالدەرىڭ قانداي؟ ەرتەرەك-اق كەلەيىن دەپ ەدىم، انا كەلىن مەكتەبىنە كەتىپ، ەندى كەلدى.
- قازىر كانيكۋل ەمەس پە؟
- وي، و بايعۇستارعا قىسى-جازى دەمالىس جوق قوي. گۇل سۋارام دەپ بارىپ كەلدى. ءوزى دە ءۇيدىڭ جۇمىسىنان ىعىرى شىعا ما دەيمىن، كەيدە ايتەۋىر ءبىر سىلتاۋ تاۋىپ سىتىلىپ شىققىسى كەلىپ تۇرادى.
- ءيا، ساباق تا جاقىنداپ قالدى عوي. بيىل دەرەكتىر اۋىسادى دەي ما؟
- وي، سونداي اڭگىمە شىققانىندا قۋانىپ قالىپ ەدىك، كەتە قويمايتىن سياقتى عوي.
- كۇلايدىڭ قىزى تەگىن وقۋعا ءتۇسىپتى عوي.
- ونىڭ قالاي تۇسكەنىن بىلەمىز عوي. ورنىنا ادام كىرگىزىپتى دەيدى.
- ە- ە- ە، باسە...
- انا جولشىبايدىڭ بالاسىنا وبالدى بولدى. جاقسى وقيتىن-اق ەدى، 5 بال جەتپەي قاپتى دەيدى.
- ايتپاقشى كەلەر جىلى پەنسيا كوبەيەتىن بولىپتى عوي.
- كوتەرىلگەنىنەن نە پايدا، دوللارىڭ تاعى اسپانداپ كەتتى عوي.
- ە- ە- ە، سوندا دا دەيم دا. بەس، ون تيىن بولسا دا داتكە قۋات قوي.
- ەندى قىمباتشىلىقتىڭ باستالعانى باستالعان. جاڭا ەستىپ كۇلىپ جاتىرمىن، انا گۇلجان جۇمىرتقا ساتاتىن ەدى عوي. سول كەشە عانا ءار جۇمىرتقانى 20 تەڭگەدەن ساتاتىن. بۇگىن مىنالار بارسا 25 تەڭگەگە كوتەرىپ الىپتى. ءاي، كەشە عانا 20 تەڭگەدەن الماپ پا ەدىك دەسە، دوللار كوتەرىلدى عوي دەپ ايتادى دەيدى. اينالايىن-اۋ جۇمىرتقانى شەتەلدەن دوللارمەن الىپ جاتسا ءبىر ءسارى ەكەن-اۋ. تاۋىق قازاقستاندىكى، تاۋىققا شاشىپ وتىرعان ارپا قازاقستاندىكى...
- ءسوزىڭىز اۋزىڭىزدا، سول تەگى تاۋىقتارىنا ارپا دا شاشپايدى. تاۋىقتارى ىلعي جەر تىرمالاپ جۇرەدى.
- ءسوزدى بولمە، شاشسىن، شاشپاسىن ارپا قازاقستاندىكى. قوراز دا قازاقستاندىكى.
- قورازدىڭ تىرلىگى ءوزى ءۇشىن عوي...
- ءسوزدى بولمەي تىڭداساڭشى. ەندى دەيم دا وعان دوللاردىڭ نە قاتىسى بار؟
- ءيا، قىمباتشىلىقتى ءوزىمىز قولدان جاسايمىز.
- ەندى سىرتتان كەلەتىن تاۋارلار مەن كيىم-كەشەكتەردىڭ قىمباتتايتىنى انىق.
- ەندىگى ۋاقىتتا ىنساپ كەرەك. ولسىز بولمايىن دەپ تۇر. توي-پوي دا ازاياتىن شىعار.
- ءيا، الپىسپاي جەتپىس جاسىن جاسايدى ەكەن دەپ ءجۇر ەدى، تىنىشتالىپ قالدى.
- قالاداعى بالاسى 75 جاسىڭىزدى جاسايىق دەپتى دەگەن.
- ول كەزدە تاعى نە بولاتىنىن ءبىر قۇدايىم ءبىلىپ پە؟
- ەلباسىنىڭ ءوزى باسى ارتىق شىعىندار مەن ۇلكەن پىرايىكتىلەردى ەكى-ءۇش جىل توقتاتا تۇرىڭدار دەگەن كورىنەدى عوي.
- ءبارىن قويشى سول كىسىگە قيىن بولدى.
- كىمدى ايتاسىڭ، الپىسپايدى ما؟
- جوعا، ەلباسىن ايتام. ءبىر جاعىنا شىعىساتىن جاناشىر ادامدار دا از-اۋ. كوزىنىڭ استى ءىسىنىپ جۇرەدى، ەلدى ويلايمىن دەپ شارشايتىن شىعار.
- ءيا مىناداي جاعدايدا ۇيقىسى دا تىنىش ەمەس شىعار.
- سونى ايتام-اۋ، ءبىز ءبىر ءۇيلى جاننىڭ ۋايىمىنا وسىلاي كۇيزەلىپ كەتتىك، ول كىسى بۇتكىل ءبىر مەملەكەتتى ويلايدى.
- قىمىزىنان ءىشىپ كوردىڭىزدەر مە؟
- ءيا، جاڭا ءبىر-ەكى كەسە ءىشىپ ەدىم، ءىشىمدى ءبۇرىپ بارادى.
- ابدەن توي باستالعاندا ءىشىڭىز ءجۇرىپ بەرەكەڭىز كەتىپ جۇرمەسىن.
- ءوزىم دە سونى ۋايىمدەپ وتىرمىن.
دەپ ءۇش اپام اڭگىمەنى جىبەرىپ وتىر. اڭگىمەلەرى تومەندەي باستادى. بىرەۋدىڭ ءسوزىن تىڭداۋ ۇيات. تىڭدامايىن دەسەم تۋرا قۇلاق تۇپتە وتىر. بەلگىلى ءبىر كەرەڭ بولماعاننان كەيىن قالاي تىڭدامايسىڭ؟ ءجا، تىڭداعاندا تۇرعان نە بار، ەشكىمگە ايتپاسام بولدى دا. قۇداي-اۋ، ەندى ءبىرى باياعى شالدارىنىڭ ءتىرى كەزىندەگى ءتاتتى ءتۇندى باستاپ كەتپەسە ەكەن-اي... وندا قۇرىعانىم سول عوي. بەتىمنەن وتىم شىقپاي ما. تىڭداپ جاتا بەرۋگە بولمايدى. تۇرىپ كەتۋدىڭ تاعى ىڭعايى جوق. ۋھ. ءوستىپ جاتقانىمدا وسى ءۇيدىڭ ءبىر كىشكەنە قىزى جۇگىرىپ كەلدى.
- اپا، سىزدەردى ءشايعا شاقىرىپ جاتىر.
- وي، شايىنە راحمەت. ءىشۋىن ىشەسىڭ عوي. اۋرەسى كوپ...
- ءجۇرىڭىز ەندى، ماسەلە ءشايدا ەمەس، ەلمەن بىرگە وتىرايىق.
- جۇرىڭدەر ال.
ءۇش اپام ورىندارىنان تۇرىپ، اقىرىنداپ اياڭداپ ۇيگە قاراي ءجۇردى. مەن دە اتىپ تۇرىپ قورا جاققا تۇرا جۇگىردىم. مىنا جەر وپاسنىي ەكەن. ەندى جاتپايمىن. انا قىز كەلىپ شايعا شاقىرماعاندا نە بولار ەدى دەيم-اۋ.
اۆتورى بەيبىت سارىباي
