قازاق كوكپارشىلارى اراسىنداعى ساشا «ەڭ ۇزدىك شابۋىلشى» اتاندى
ۇلتتىق قۇرامادا 16 جاسىنان بەرى ونەر كورسەتىپ جۇرگەن ۋكراين جىگىتى جاتتىقتىرۋشىلاردىڭ سەنىمدى كوكپارشىلارىنىڭ ءبىرى. «قازاقپارات» ح ا ا ءتىلشىسى حالىقارالىق تۋرنيردەن كەيىن قازاق كوكپارشىلارىنىڭ اراسىنداعى ساشانى سوزگە تارتتى.
قازاقستانداعى وزگە ۇلت جاستارى كوكپارعا كوپ قىزىعۋشىلىق تانىتا بەرمەيتىنى بەلگىلى. ال ۇزەڭگىلەستەرى ساشا دەپ اتايتىن ۋكراين جىگىتى كوكپار اتىنا 14 جاسىندا قارعىپ ءمىنىپتى. ول وتباسىمەن تۇرعان استانا قالاسىنىڭ ينتەرناتسيونالنىي كەنتىندە بۇرىن «قۇلاگەر» اتتى سپورت كلۋبى اشىلعان ەكەن. بالا كەزىنەن جىلقىقۇمار ول 9 جاسىنان باستاپ بايگەگە قاتىسا باستايدى. وسىلايشى، الەكساندر قازاقستان ۇلتتىق قۇراماسى جاتتىقتىرۋشىلارىنىڭ كوزىنە 16 جاسىندا تۇسكەن.
«ءۇش جىل بويى ۇلتتىق قۇرامانىڭ ساپىندا ءجۇرىپ، كەيىن ەرەسەكتەر قۇراماسىنا قوسىلدىم. قازىرگى ۋاقىتتا قازاقستان ۇلتتىق قۇراماسىنىڭ ساپىندا ونەر كورسەتكەنىمە 5 جىلدان اسىپ كەتتى. سوڭعى ەكى جىلدا ماڭعىستاۋ وبلىسىنىڭ قۇراماسىنىڭ جاتتىقتىرۋشىسى ءارى ويىنشىسى بولىپ ءجۇرمىن. ول جاققا مەنى شاقىرىپ الدى»، - دەيدى كوكپارشى.
قازاقستان چەمپيوناتىندا جۇرگەن كەزىندە الەكساندار بىرنەشە مارتە جاراقات العان. ءتىپتى ءبىر ويىندا اياعىن سىندىرىپ العان كەزى دە بولعان. ءبىراق، كوكپار ويىنىن كورسە ورنىندا وتىرا المايتىن جىگەرلى جاستىڭ بەتىن كەز كەلگەن قيىندىق قايتارا المايتىن سەكىلدى.
قازاقستان مەن قىرعىزستان قۇراماسىنىڭ بۇگىنگى فينالدىق كەزدەسۋىنىڭ 16-مينۋتىندا كوكپار الاڭىندا ويىن كىلت توقتاپ، تورەشىلەر جاعدايدىڭ ءمان-جايىن انىقتاي باستاپ ەدى. سويتسە، الەكساندر ەڭكەيىپ سەركەنى كوتەرە بەرگەندە قىرعىز كوكپارشى سەيىتبەك اناربەك ۇلى ارىنداپ كەلىپ، اتتىڭ كەۋدەسىمەن سوعىپ وتكەن. ساشا اۋىپ تۇسە جازداپ، اتتىڭ جالىن قۇشا بەرگەن. كوپ كەشىكپەي جەدەل جاردەم دە كەلىپ جەتتى. ءبىراق، ابىروي بولعاندا، الەكساندر جاراقات العان جوق. ال ويىننىڭ ەرەجەسىن ورەسكەل بۇزعان قىرعىزستاندىق كوكپارشى بەس مينۋتقا ويىننان شەتتەتىلدى.
«قۇدايعا شۇكىر، ءبارى جاقسى. بۇرىنعى ويىندارىم تۋرالى ايتار بولسام، قىرعىزستاندا 2008 -جىلى ونەر كورسەتكەنمىن. ول كەزدە ەكى ەلدەن ءتورت-ءتورت كوماندادان قاتىسقان بولاتىن. ءبىز جاقتان اۋليەاتا، شىمكەنت، استانا مەن جەتىسۋ كوماندالارى بارعانبىز. ارى قاراي ول جاقتا كوتەرىلىس بولىپ كەتتى دە، ويىنىمىز اياقسىز قالدى. ال تۋرنيرلەردە كوپ بولىپ ءجۇرمىن. بارلىق كوماندالار وسى جولى وزدەرىن جاقسى تانىتتى. موڭعولدار، تاجىكتەر جاقسى توسەلىپ قالىپتى، ءبىراق باستى قارسىلاسىمىز ءسوزسىز - قىرعىزدار. وتكەن جىلى قىرعىزستاندا وتكەن «كوشپەندىلەر فەستيۆالىندە» ولاردان جەڭىلىپ قالعانبىز. وسى جولى ەسە قايتاردىق. امەريكا كوۆبويلارىمەن تەز ءتىل تابىسىپ كەتتىك. ولاردىڭ كاپيتانى كريد گارنيك ءسوز جوق مىقتى ەكەن. بىردەن يگەرىپ الدى. ءبىز ءوز تاراپىمىزدان تاجىريبەمىزدى بولىستىك»، - دەيدى كوكپارشى.
قازاقستاننىڭ ۇلتتىق قۇراماسىنىڭ اعا جاتتىقتىرۋشىسى نۇركەن بايبوريەۆ ساشانىڭ كىشكەنتاي كەزىنەن-اق كوكپاردان كورىنىپ جۇرگەن مىقتىلاردىڭ ءبىرى ەكەنىن ايتادى.
«ونىڭ ەرەكشەلىگى - فيزيكالىق جاعىنان كۇشى مىعىم، ءارى ەپتى. شابۋىلى الاپات. كوكپاردىڭ تەحنيكاسىن تولىق مەڭگەرگەن. باسقا ۇلتتاردان كوكپارشىلار ىلۋدە ءبىر شىعىپ جاتىر عوي. پۋپەنكونىڭ ۇلتتىق قۇرامادا جۇرگەنىنە 5 جىل بولدى. الەم چەمپيوناتىندا «ەڭ ۇزدىك شابۋىلشى» اتانۋ ەكىنىڭ ءبىرىنىڭ قولىنان كەلە بەرمەيدى»، - دەيدى اعا جاتتىقتىرۋشى.