مەيۆەزەر- ماكگرەگور باسەكەسى اقشا تابۋ ءۇشىن جاسالعان
سونداي-اق سپورتشى قازاقپارات تىلشىسىنە دجيۋ-دجيتسۋ سپورتىندا قانداي ءادىس-ايلامەن جەڭۋگە بولاتىنىن ايتتى.
البەرت الدياروۆ ازيا چەمپيوناتىندا 77 كەلى سالماق بويىنشا نەۆازا- سيستەم بولىمىندە قولا مەدال يەلەنگەن بولاتىن.
حالىقارالىق دارەجەدەگى سپورت شەبەرى، 2014 -جىلعى الەم چەمپيوناتىنىڭ قولا جۇلدەگەرى، دجيۋ- دجيتسۋدان ەكىنشى دان يەگەرىنىڭ ايتۋىنشا، ەكى ءتۇرلى سپورت سالاسىنىڭ اراسىنداعى جەكپە-جەكتەر تەك اقشا تابۋ ءۇشىن ۇيىمداستىرىلادى.
«بۇل جاي عانا شوۋ. UFC چەمپيونى بولا تۇرىپ مەن باسقا سپورت ەرەجەلەرى بويىنشا جۇدىرىقتاسپاس ەدىم. بۇل جەردە تەك فلويدتىڭ اتىنىڭ ارقاسىندا كوپ اقشا تابۋ ماقساتى عانا ايقىن. فلويدتىڭ جەڭىسى دە باسىنان بەلگىلى بولدى. ماكگرەگور تەك فانتاستيكالىق كينودا عانا جەڭەتىن ەدى»، - دەدى البەرت الدياروۆ.
دجيۋ-دجيتسۋ سپورتىنا كەلسەك، مۇندا باسقا كۇرەس تۇرلەرىمەن ۇقساستىق كوپ دەيدى سپورتشى.
ونىڭ ويىنشا، وسىنداي ۇقساستىقتار بولا تۇرا باسقا كۇرەس وكىلدەرىمەن بوز كىلەمگە شىعۋ دۇرىس شەشىم ەمەس.
سپورتشىنىڭ ايتۋىنشا، دجيۋ-دجيتسۋ ەڭ قاۋىپسىز سپورت تۇرىنە جاتادى.
«ەگەر جۇدىرىقتاسۋعا جاتاتىن سپورت تۇرلەرىمەن سالىستىرسا، كۇرەس گۋماندى سپورت ءتۇرى. بوكستا سپورتشى سوققىنى قابىلداپ ەكى اياعىندا تىك تۇرا المايدى. ول جاۋاپ بەرۋگە تىرىسادى. باسىندا سوققىنىڭ كۇشىن قاداعالاي المايدى. دجيۋ-دجيتسۋ مەن مما اراسىندادا ۇقساستىق كوپ. قول، اياقتان ۇرۋ، پارتەردە ايقاسۋ. نيەۆازادا تەك قانا كۇرەس بولادى»، - دەدى البەرت الدياروۆ.
البەرت الدياروۆ سپورتقا 6 جاسىندا كەلگەن. العاشىندا تاي بوكسى، دزيۋدودا باعىن سىناعان. 22 جاسىندا دجيۋ- دجيتسۋعا اۋىسقان.
دجيۋ-دجيتسۋ سپورتىمەن جاس كەزىندە اينالىسا باستاعان دۇرىس دەيدى مامان.
«سەبەبى وسى جاستان باستاپ سپورتقا كەلگەن بالالاردىڭ جەتىستىككە جەتۋ مۇمكىندىگى جوعارى. جاس كەزىمدە ۇرۋ بولىمىندە كوبىرەك شىعاتىنمىن. ءقازىر جاسىم كەلگەن سوڭ نيەۆازادا بەلدەسكەندى كوبىرەك قالايمىن»، - دەدى البەرت الدياروۆ.
دجيۋ- دجيتسۋ سپورتى قازاقستاندا جاڭادان تانىمال بولىپ كەلەدى. اتالعان سپورتقا بالالارىن بەرۋگە ىنتالى اتا- انالاردىڭ سانى كوبەيۋدە.
الايدا، ول ءالى وليمپيالىق سپورت تۇرىنە جاتپايدى.
ويتكەنى وليمپيالىق كۇرەستە كوپتەگەن ادىستەرگە تىيىم سالىنعان.
بارلىق قازاقستاندىقتار سياقتى البەرت تە گولوۆكين- كانەلو جەكپە-جەگىن اسىعا كۇتىپ ءجۇر. ول وتانداسىمىزدىڭ جەڭەتىنىنە سەنىمدى. الايدا، ۇپايمەن بە، الدە نوكاۋتپەن بە ول جاعىنا بولجام جاسامادى.
ايتا كەتۋ كەرەك، مەيۆەزەر- ماكگرەگور جەكپە-جەگىندە امەريكاندىق بوكسشى 10-راۋندتا جەڭىسكە جەتكەن بولاتىن.